मीका 3 - नेवाः बाइबलनायःतय्त व अगमवक्तातय्त ब्वःब्यूगु 1 अले जिं धया, “हे याकूबया नायःत, हे इस्राएलया घरानायापिं शासकत, ध्यान बिया न्यँ। न्याययात सिकाकायेगु छु छिमिगु ज्या मखु ला? 2 छिमिसं ला भिंयात तस्सकं मयय्कू व मभिंयात यय्कू। छिमिसं जि प्रजाया छेंगू तुलीगु अले क्वँचं ला लिकाइगु। 3 छिमिसं जि प्रजाया ला नइगु, इमिगु छेंगू तुलीगु अले इमिगु क्वँय्त थलय् दय्केत कुचा कुचा यानाः त्वथुलीगु। इमिगु ला थलय् दय्केत कुचा कुचा याइगु।” 4 उबलय् नायःतय्सं परमप्रभुयाके ग्वाहालि फ्वनी। तर वय्कलं इमित लिसः बियादी मखु। इमिसं बांमलाःगु ज्या याःगुलिं उबलय् वय्कलं थःगु ख्वाः इपिंपाखें फस्वय्कादी। 5 परमप्रभुं थथे धयादी, “जिमि प्रजायात मभिंगु लँपुइ यंकीपिं अगमवक्तातय्त सुनानं नयेत ब्यूसा इमिसं ‘शान्ति शान्ति’ धकाः हाला हइ। वं नयेत मबिल धाःसा वयागु विरोधय् ल्वाःवनेत इपिं तयार जुइ। 6 उकिं छिमिके दर्शन मदुगु चा वइ। छिपिं तच्वःगु खिउँगुलिइ लाइ, अले छिमिसं ज्वखना स्वये फइ मखु। अगमवक्तातय्गु निंतिं सूर्य बिनावनी, छिमिगु निंतिं दिं खिउँसे च्वनी। 7 दर्शन खनीपिं मनूत लज्या चाइ, अले ज्वखना स्वइपिनिगु ख्वाः ह्याउँसे च्वनी। इपिं सकसिनं थःगु ख्वाः त्वपुइ, छाय्धाःसा इमित परमेश्वरपाखें लिसः दइ मखु।” 8 तर जि ला परमप्रभुया शक्तिं जाःगु दु, परमप्रभुया आत्मां जाःगु दु, अले न्याय व शक्तिं जाःगु दु। याकूबयात वयागु अपराध व इस्राएलयात वयागु पाप कनाबीत। 9 हे याकूबया घरानाया नायःत, हे इस्राएलया घरानाया शासकत, हे न्याययात मयय्कीपिं अले तप्यंगु खँयात बेक्व याइपिं मनूत, छिमिसं थ्व खँ बांलाक न्यँ! 10 छिमिसं हि बाः वय्काः सियोनयात अले मभिंगु ज्या यानाः यरूशलेमयात दय्कीगु। 11 अनच्वंपिं नायःतय्सं घुस कयाः न्याय याइ। अन च्वंपिं पुजाहारीतय्सं ज्याला कयाः स्यनी। अले अगमवक्तातय्सं धिबाया लागि अगमवाणी याइ। अथे जूसां इमिसं परमप्रभुयाके भलसा कयाः थथे धाइ “परमप्रभु झीगु दथुइ च्वनादीगु दु, झीत मभिं जुइ मखु।” 12 अथे जुयाः छिमिगु कारणं यानाः सियोनयात बुँ थें जोतय् याइ, यरूशलेम नाश जुयाः द्वँ चिनी, देगःया डाँडा धाःसा झाः बुयावया त्वःपुयाच्वंगु द्वम्बःचा थें जुइ। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.