मीका 1 - नेवाः बाइबल1 यहूदाया जुजुपिं योताम, आहाज व हिजकियां राज्य यानाच्वंबलय् मोरेशेत शहरय् च्वंम्ह मीकायाथाय् वःगु परमप्रभुया वचन, थ्व दर्शन वं सामरिया व यरूशलेमयागु बारे खंगु खः। 2 हे जात जातियापिं सकलें मनूत, थ्व खँ न्यँ। हे पृथ्वी व अन च्वंपिं फुक्क मनूत, ध्यान बियाः न्यँ। परमप्रभु परमेश्वरं छिमिगु विरोधय् साक्षी बियादी। न्यँ, वय्कलं थःगु पवित्र देगलं न्ववानादी। सामरिया व यरूशलेमया विरोधय् न्याय 3 स्वः! परमप्रभु वय्कः च्वनादीगु थासं झायाच्वंगु दु, वय्कः क्वहां झायाः पृथ्वीयागु दकलय् तज्जाःगु थासय् न्यासि जुयादी। 4 वय्कःया क्वय् पहाडत नायावनी, अले ब्यासित निब्व जुइ। पहाडत मिइ मैन नायावं थें नायावनी, भीरं लः क्वहां वः थें ल्वहंत सुल्ल क्वहां वनी। 5 थुपिं फुक्व याकूबया अपराध व इस्राएलया घरानाया पापया कारणं जूगु खः। याकूबया अपराध छु खः लय्? छु व सामरिया मखु ला? यहूदाया द्यःपुजा याइगु थाय् गन दु? छु व यरूशलेम मखु ला? 6 “अथे जुयाः जिं सामरियायात ल्वहंया कुचाकाचाया द्वँ दय्काबी, अले दाखया क्यब दय्काबी। जिं उकिया ल्वहंत ब्यासिइ वांछ्वयाबी। अले उकिया जग प्वलाबी। 7 वयागु फुक्क मूर्तितय्त कुचा कुचा याइ। वयागु दक्व देगःया क्वस्यालित मिइ छ्वय्काछ्वइ। अले वयागु फुक्क मूर्तित जिं नाश यानाबी। उपिं क्वस्यालित वेश्याया ज्या यानाः वं मुंकूगु खः, अले उपिं वेश्याया ज्याला थें हाकनं छ्यली।” ख्वख्वं विलाप याःगु 8 अथे जुयाः जिं ख्वख्वं विलाप याये। जि खालि तुति व नांगा जुयाः थुखे उखे जुये। जि ध्वंचा थें हाले अले न्हिकांझंगः थें ख्वये। 9 सामरियायागु घाः लनी मखु। व यहूदाय् नं वःगु दु, यरूशलेमया ध्वाखा तक नं थ्यंगु दु। 10 थ्व खँ छिमिसं गातय् वनाः कने मते अले ख्वये मते। बेथ-ओप्राया धुलय् ग्वारा ग्वारा तु। 11 हे शाफीरय् च्वंपिं मनूत, नांगा जुयाः लज्या चायाः पिहां वा। सानानय् च्वंपिं पिहां वइ मखु। बेथ-एजेल ख्वयाच्वंगु दु, वयागु शरण कायेगु थाय् छिमिगुपाखें यंकूगु दु। 12 मारोतया मनूत नुगः खुलखुल मिंका उद्धार पियाच्वंगु दु। तर परमेश्वरयापाखें विपत्ति यरूशलेमयागु ध्वाखाय् तक थ्यंकः वःगु दु। 13 हे लाकीशय् च्वंपिं मनूत, छिमिसं सलत रथय् च्यु। म्ह्याय् सियोनया पापया शुरु छिपिं हे खः। छाय्धाःसा इस्राएलया अपराधत छिमिके हे लुत। 14 अथे जुयाः मोरेशेत-गातयात छिमिसं कोसेलि बियाः बिदा बी। अक्जीबया शहरपाखें इस्राएलया जुजुपिन्सं धोखा नइ। 15 हे मारेशाय् च्वंपिं मनूत छिमित बुकीम्ह छम्हय्सित जिं हये। इस्राएलया महिमा अदुल्लाम गुफाय् वये माली। 16 थःयःपिं मस्तय्गु लागि दुखं च्वनाः थःगु छेनय् च्वंगु सँ खा। थःत गिद्ध थें पाचु छ्यं दय्की। छाय्धाःसा छिमि मस्तय्त ज्वनाः छिमिगुपाखें तापाक यंकी |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.