लूका 14 - नेवाः बाइबलम्हंमफुम्ह मनूयात लाय्कादीगु 1 छकः विश्रामबार खुन्हु येशू छम्ह तःधंम्ह फरिसीयागु छेँय् भ्वय् सःतातःगुलिं झाल। मनूतय्सं वय्कःयात अन नं चिवा यानाच्वन। 2 वय्कःया न्ह्यःने ल्हाःतुति मनावःम्ह छम्ह मनू च्वनाच्वंगु दु। 3 वय्कलं शास्त्रीत व फरिसीतय्त थथे धयादिल – “विश्रामबार खुन्हु सुयातं लाय्काबीगु ज्या याये ज्यू ला?” 4 इपिं छम्हय्सिनं हे नवाय् मछाल। अले वय्कलं व ल्हाःतुति मनावःम्ह मनूयात थियाः लाय्का छ्वयादिल। 5 अले इमित धयादिल – “छिकपिनि सुयां काय् अथवा द्वहं तुंथिइ कुतुंवन धाःसा विश्रामबार खुन्हु जूसां काचाकाचां सालाः थमकाइ ला?” 6 इमिसं थुकियागु लिसः बी मफुत। भ्वय् सःतूम्ह व भ्वय् वइपिं 7 अन भ्वय् वःपिं मनूतय्सं च्वय् फ्यतुइत स्वः जूगु खनाः वय्कलं इमित थथे धकाः छगू उखान कनादिल – 8 “सुनानं छिकपिन्त ब्याहा भ्वजय् सःतातःगु दःसा छिकपिं च्वय् च्वनादी मते, छाय्धाःसा छिकपिं स्वयाः नं तःधंपिन्त भ्वय् सःतातःगु दये फु। 9 भ्वय् सःतूम्हय्सिनं छिकपिन्त थथे धाइ – ‘अनयात थाय् त्वःतादिसँ।’ अले छिकपिं मछालाः क्वय् च्वंवने माली। 10 “छिकपिन्त सुनानं भ्वय् सःतल धाःसा छिकपिं वनाः दकलय् क्वय् लाःगु थासय् च्वं झासँ। अले भ्वय् सःतूम्हय्सिनं वयाः छिकपिन्त थथे धाइ – ‘पासा, भचा च्वय् झासँ।’ अले च्वय् च्वं झायेबलय् फुक्कसिगु न्ह्यःने छिकपिन्त बांलाइ। 11 सुनां थःत थःम्हं तःधंकी व चिधनी। अले सुनां थःत थःम्हं चिधं ताय्की व तःधनी।” 12 अले हानं वय्कलं भ्वय् सःतूम्हय्सित नं धयादिल – “भ्वय् न्याय्केबलय् छिं थः पासापिं, दाजुकिजापिं, फुकीत, जःखः च्वंपिं व तःमिपिन्त भ्वय् सःतादी मते, छाय्धाःसा पलेसा पुलेत इमिसं छितः नं भ्वय् सःती। 13 भ्वय् न्याय्केबलय् छिं नये मखंपिं, ल्हाःतुति खूपिं, अले कांपिन्त भ्वय् सःतादिसँ। 14 अले छितः आशिष दइ, छाय्धाःसा अज्याःपिन्सं छितः पलेसा पुले फइ मखु। बरु धर्मीपिं सिनाः हानं म्वाना वइबलय् परमेश्वरं छितः थुकियागु पलेसा पुलादी।” तःधंगु भ्वय्यागु उखान मत्ती २२:१-१० 15 थ्व न्यनाः वय्कःयागु लिक्कसं च्वनाच्वंम्ह छम्ह मनुखं थथे धाल – “स्वर्गय् परमेश्वरयागु राज्यय् च्वनाः नयेत्वने याये खनीम्ह मनू ला तसकं धन्यम्ह जुइ।” 16 वय्कलं धयादिल – “छन्हु छम्ह मनुखं तसकं तःधंक भ्वय् न्याय्कल, अले यक्व मनूतय्त भ्वय् सःतल। 17 भ्वय् नयेगु ई जुइकाः वं थः च्यःयात भ्वय् सःता तःपिन्त हानं छकः ‘फुक्कं ठीक जुइ धुंकल, भ्वय् झासँ’ धकाः धाय्के छ्वत। 18 तर भ्वय् सःतातःपिं मनूतय्सं वये मलाः धकाः धयाहल। छम्हय्सिनं थथे धाल – ‘जिं बुँ छकू न्याना तयागु दु। बुँइ छकः स्वः वनेमानि। अय्जूगुलिं वये लाइ मखु, तंचायादी मते।’ 19 अले मेम्हय्सिनं धाल – ‘जिं न्याज्वः द्वहं न्याना तयागु दु, छकः ज्या याकाः स्वये मानि। अय्जूगुलिं वये लाइ मखु, तंचायादी मते।’ 20 अले हानं मेम्ह मनुखं धाल – ‘नकतिनि नकतिनि कलाः हयागुलिं जि वये मलाः।’ 21 “च्यलं लिहां वनाः मालिकयात फुक्क खँ धयाबिल। तसकं तंम्वय्काः वं च्यःयात थथे धाल – ‘हुँ, शहरया लँय् लँय् व गल्लिइ गल्लिइ वनाः नये मखंपिं, ल्हाःतुति खूपिं व कांपिन्त ब्वना हजि।’ 22 अले मालिकं धाःथें याये धुंकाः च्यलं वयाः वयात थथे धाल – ‘हजुर, छिं धयादी थें याये धुन, अज्ज नं थाय् दनि।’ 23 वं हानं वयात थथे धाल – ‘शहरं पिनेयागु लँय् लँय् व गल्लिइ गल्लिइ वनाः मनूतय्त कर याना जूसां ब्वना हजि। जिगु छेँ जाय्क मनूत दये हे माः। 24 जिं छिमित धात्थें धाये – न्हापा भ्वय् ब्वना तयापिं मनूत छम्हय्सिनं हे भ्वय् नयेखनी मखु।’” चेला जुइत त्याग यायेमाः मत्ती १०:३७-३८ 25 ग्वाः ग्वाः हे मनूत येशूया ल्यूल्यू वयाच्वन। वय्कलं इमित लिफः स्वयाः थथे धयादिल – 26 “सुं मनू जि नाप वये मास्ति वःसा वं थः मांबौ, कलाः, भाःत, मस्त, दाजुकिजा, तताकेहेँ, अले थःत नं जितः स्वयाः अप्वः माया याये मज्यू। अथे याये मफुम्ह मनू जिम्ह चेला जुइ फइ मखु। 27 थःगु क्रूस क्वबिया जिगु ल्यूल्यू मवइम्ह मनू जिम्ह चेला जुइ फइ मखु।” 28 “सुनानं धरहरा दय्केत्यन धाःसा न्हापालाक गुलि खर्च जुइ, अले धिबा गाः मगाः निं स्वइ। 29 जग तये धुंकाः सिधय्के मफुत कि वयात फुक्कसिनं थथे धकाः गिजय् याइ – 30 ‘थ्व मनुखं दय्केत ला दय्कल, अय्नं सिधय्के भाः मखन का।’ 31 “अथे हे छम्ह जुजुं मेम्ह जुजुलिसे ल्वाःवनेत न्हापालाक थःपिनि झिद्वः सिपाइँत शत्रुतय् निइद्वः सिपाइँतलिसे ल्वाये फइ ला कि फइ मखु धकाः बिचाः याना स्वइ। 32 शत्रुपाखे च्वंपिं सिपाइँत नाप ल्वाये मफु धयागु जूसा, इमिसं हय्काः वये न्ह्यः हे मनूत छ्वयाः मिलय् जुइत स्वइ। 33 अथे हे छिमिसं नं थःके दुगु फुक्कं त्वःते मफुसा छिपिं जिम्ह चेला जुइ फइ मखु। 34 “चि ला भिं जू। चिया सवाः हे तन धाःसा थ्वयात हानं छुकिं चि सवाः वय्केगु? 35 थथे सवाः तने धुंकूगु चि ला बुँइ तयेत नं मज्यू, साःद्वँय् तयेत नं मज्यू। अज्याःगु चियात ला मनूतय्सं वांछ्वइ। सुयाके न्हाय्पं दु वं न्यना का।” |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.