लेवी 13 - नेवाः बाइबलछेंगूया पुनेयःगु ल्वय् 1 परमप्रभुं मोशा व हारूनयात धयादिल, 2 “सुं मनूयागु म्हया छेंगुलिइ मनावल, इल्ल मिंक कै दयावल वा चातः दयावल धाःसा थ्व पुनेयःगु छेंगूया ल्वय् जुइफु। वयात पुजाहारी हारून वा वया काय्पिं मध्ये छम्ह पुजाहारीयाथाय् हयेमाः। 3 थज्याःगु घाः पुजाहारीं स्वयेमाः अले वयागु ल्वचं काःगु थासय् बुयावःगु सँ तुयुसे च्वंसा वा व घाः छेंगू स्वयाः गाः वंगु खनेदत धाःसा, व पुनेयःगु ल्वय् खः। पुजाहारीं उकियात जाँचय् यानाः स्वये धुंकाः वयात अशुद्ध थहरय् यायेमाः। 4 तर व चातः छेंगुलिइ तुयुसे च्वंसा, अले स्वइबलय् व छेंगू स्वया गाः वंगु खने मदुसा, अले उकी बुयावःगु सँ नं तुयुसे च्वनावःगु मदुसा, पुजाहारीं व ल्वगियात न्हय्न्हु तक अलग तयेमाः। 5 न्हय्न्हु दुखुन्हु पुजाहारीं वयात जाँचय् यानाः स्वइबलय् व घाः न्हापां गथे खः अथे हे खनेदुसा अले छेंगुलिइ व घाः न्यनावंगु मदुसा पुजाहारीं वयात हानं न्हय्न्हु तक अलग तयेमाः। 6 न्हय्न्हु खुन्हु पुजाहारीं वयात हानं जाँचय् यानाः स्वइबलय् ल्वय् कम जुइ धुंकूगु दु अले छेंगुलिइ न्यनावंगु मदुसा, पुजाहारीं वयात शुद्ध थहरय् यायेमाः। व चातः जक खः। वं थःगु वसः ही, अले व शुद्ध जुइ। 7 तर शुद्ध थहरय् यायेत पुजाहारीयात क्यने धुंकाः व चातः छेंगुलिइ न्यनावन धाःसा, वं हानं पुजाहारीया थासय् वनाः थःत हे क्यनेमाः। 8 अले पुजाहारीं जाँचय् यायेबलय् छेंगुलिइ चातः न्यनावन धाःसा पुजाहारीं वयात अशुद्ध थहरय् यायेमाः। थ्व पुनेयःगु ल्वय् खः। 9 “सुं मनूयात छेंगूया पुनेयःगु ल्वचं काल धाःसा वयात पुजाहारीयाथाय् हयेमाः। 10 अले पुजाहारीं जाँचय् यानाः स्वइबलय् व छेंगुलिइ तुयुसे मनावःगु दुसा व उकियागु चिमिसँ तुयुसे च्वंगु अले मनावःगु थासय् न्हूगु घाः दुसा 11 वयागु म्हय् दुगु थ्व धात्थें हे पुनेयःगु ल्वय् खः। अले पुजाहारीं वयात अशुद्ध थहरय् यायेमाः। व अशुद्ध थहरय् याय् धुकूंम्ह जूगुलिं पुजाहारीं वयात न्हय्न्हुया निंतिं अलग तयेम्वाः। 12 “तर ल्वय् छेंगुलिइ न्यनावना च्वंसा, अले उकियात पुजाहारीं स्वइबलय् ल्वगियागु छ्यनंनिसें तुति तकं छेंगुलि न्यनावंगु दुसा, 13 पुजाहारीं वयात बांलाक स्वयाः व ल्वय् म्ह छम्हं न्यनावने धुंकूसा व मनूयात शुद्ध थहरय् यायेमाः। व ला धात्थें हे तुयुसे च्वने धुंकल, अले व शुद्धम्ह खः। 14 तर उकी न्हूगु घाः खनेदत धाःसा व अशुद्ध खः। 15 पुजाहारीं वयागु न्हूगु घाः जाँचय् यानाः वयात अशुद्ध थहरय् यायेमाः। व न्हूगु घाः अशुद्ध खः, व पुनेयःगु ल्वय् खः। 16 तर व न्हूगु घाः तुयुसे च्वन धाःसा व मनू पुजाहारीयाथाय् वनेमाः। 17 अले पुजाहारीं वयात जाँचय् याइबलय् व चातः तुयुसे च्वने धुंकूसा पुजाहारीं व ल्वगियात शुद्ध थहरय् यायेमाः, व शुद्धम्ह खः। 18 “सुं मनूया छेंगुलि पिहां वःगु कै लाल धाःसा 19 अले व कै दुगु थासय् तुयुसे च्वंक मनावल वा ह्याउँसे च्वंगु तुयुगु चातः दयावल धाःसा, वं पुजाहारीयात क्यनेमाः। 20 अले वं जाँचय् यानाः स्वइबलय् व छेंगू स्वयाः गाः वंगु खनेदुसा अले अन दुगु चिमिसँ नं तुयुसे च्वंगु दुसा, पुजाहारीं वयात अशुद्ध थहरय् यायेमाः। व पुनेयःगु ल्वय् खः। व कैपाखें पिहां वःगु खः। 21 तर पुजाहारीं जाँचय् याइबलय् उकी तुयुसे च्वंगु चिमिसँ मदुसा वा छेंगू स्वयाः गाः मवंसा तर चातः तनावना च्वंगु दुसा, पुजाहारीं वयात न्हय्न्हु तक अलग तयेमाः। 22 व छेंगुलिइ न्यनावंगु दु धाःसा पुजाहारीं वयात अशुद्ध थहरय् यायेमाः व पुनेयःगु ल्वय् हे खः। 23 तर तुयुसे च्वंगु चातः थःगु थासय् हे न्यनामवंसें च्वनाच्वंसा व घाःखू जक खः। पुजाहारीं व मनूयात शुद्ध थहरय् यायेमाः। 24 “सुं मनूया छेंगुलिइ मिं पुयाः घाः जुल धाःसा, अले व मिं पुनाजूगु घाःयागु न्हूगु ला ह्याउँसे च्वंगु तुयुगु चातः खनेदत धाःसा, 25 पुजाहारीं वयात जाँचय् यायेमाः। अले व घालय् बुयावःगु चिमिसँ तुयुसे च्वनावःसा, व घाः जूगु थासय् स्वइबलय् छेंगू स्वयाः गाः वंगु खनेदःसा, पुजाहारीं वयात अशुद्ध थहरय् यायेमाः। व मिं पुनाजूगु घाःपाखें वःगु पुनेयःगु ल्वय् खः। 26 “तर पुजाहारीं स्वइबलय् धात्थें व घालय् तुयुगु चिमिसँ बुयामवःसा, अले व छेंगू स्वयाः गाः मवंसा अले व गनावना च्वंसा, पुजाहारीं वयात न्हय्न्हु तक अलग तयेमाः। 27 पुजाहारीं वयात न्हय्न्हु दुखुन्हु जाँचय् यायेमाः। वयागु ल्वय् छेंगुलि न्यना वंसा पुजाहारीं वयात अशुद्ध थहरय् यायेमाः। व पुनेयःगु ल्वय् खः। 28 व घाःखू न्यनामवंसें मना जक वयाः अन हे च्वनाः गनावना च्वंगु दुसा व मिं पुया जूगु घाःखू खः। पुजाहारीं व मनूयात शुद्ध थहरय् यायेमाः। 29 “सुं मिजं वा मिसाया छेनय् वा मन्चाय् ल्वय् दुसा, 30 पुजाहारीं व ल्वय् जाँचय् यायेमाः अले व छेंगू गाः वंगु दुसा अले उकियागु सँ सालुगु म्हासुसे च्वंसा, वं वयात अशुद्ध थहरय् यायेमाः। थ्व छ्यं वा मन्चाय् दुगु अशुद्धगु चासुइगु ल्वय् खः। 31 तर पुजाहारीं व चासुइगु ल्वय् जाँचय् याःबलय् व छेंगू स्वयाः गाः मवंसा अले उकी हाकुगु सँ नं मदुसा, वं ल्वगियात न्हय्न्हु तक अलग तयेमाः। 32 न्हय्न्हु दुखुन्हु पुजाहारीं व ल्वय्यात जाँचय् यायेमाः अले व चासुइगु ल्वय् न्यनावंगु मदुसा, उकी सँ म्हासुसे मच्वंसा, अले व चासुइगु ल्वय् स्वइबलय् छेंगू स्वयाः गाः वंगु खने मदुसा, 33 पुजाहारीं व चासुइगु ल्वय् दुगु थाय् त्वःताः थःगु सँ व दाह्री खायेमाः। वयात हानं न्हय्न्हु तक अलग तयेमाः। 34 न्हय्न्हु दुखुन्हु पुजाहारीं हानं जाँचय् यायेमाः। व चासुइगु ल्वय् न्यनामवंसें छेंगू स्वयाः गाः वंगु खने मदुसा पुजाहारीं वयात शुद्ध थहरय् यायेमाः। अले वं थःगु वसः हियाः शुद्ध जुइ। 35 तर व शुद्ध थहरय् जुइ धुंकाः नं व चासुइगु ल्वय् छेंगुलि न्यनावन धाःसा 36 पुजाहारीं वयात हानं जाँचय् यायेमाः। व चासुकइ छेंगुलिइ न्यनावंगु दुसा पुजाहारीं सँ म्हासुसे च्वं ला मच्वं धकाः जाँचय् याये म्वाः। छाय्धाःसा व मनू अशुद्धम्ह खः। 37 तर पुजाहारीं जाँचय् यानाः स्वःबलय् व चासुइगु ल्वय् दुगु थाय् न्हापा गथे खः अथे हे जू, व उकी हाकुगु सँ बुयावःसा, व ल्वचं लाःगु खः। अले पुजाहारीं वयात शुद्ध थहरय् यायेमाः। 38 “सुं मिजं वा मिसायागु छेंगुलिइ तुयुसे च्वंगु चातः दःसा 39 पुजाहारीं व जाँचय् यायेमाः अले वयागु म्हय् व चातः भतिचा जक तुयुसे च्वंसा व छेंगुलिइ पिहां वःगु दाग जक खः, व मनू शुद्धम्ह खः। 40 “सुं मनूयागु सँ हायावंगु दुसा व खउ छ्यंयाम्ह ला खः तर व शुद्धम्ह हे खः। 41 वयागु छ्यंयागु न्ह्यःनेपाखें जक सँ मदयाः पाचुसे च्वंसा व शुद्धम्ह खः। 42 तर वयागु छ्यंयागु न्ह्यःनेपाखें वा लिछ्यंपाखें सँ मदयाः पाचुसे च्वंगु थासय् ह्याउँगु ह्याउँगु वा तुयुसे च्वंगु घाः खने दया वःसा व पुनेयःगु ल्वय् खः। 43 पुनेयःगु ल्वय् वइबलय् थें पुजाहारीं वयात जाँचय् यानाः स्वइबलय् सँ मदया पाचुसे च्वंगु थासय् मनावयाः ह्याउँसे ह्याउँसे च्वंगु तुयुगु घाः खनेदःसा 44 व मनू ल्वगि व अशुद्धम्ह खः। वयागु छेनय् दुगु घाःया हुनिं पुजाहारीं वयात अशुद्ध थहरय् याइ। 45 “पुनेयःगु ल्वय् दुम्ह मनुखं खुनातःगु वसः फीमाः, अले वयागु छ्यंयागु सँ भुलुसुलु दंका तयेमाः। वं थःगु म्हुतु त्वपुयाः तःसलं ‘अशुद्ध! अशुद्ध! अशुद्ध!’ धकाः हालेमाः। 46 गुबलय् वयात ल्वचं काइ उबलय् तक व अशुद्ध हे जुइ। व याकःचा हे च्वनेमाः। व छाउनी पिने हे च्वनेमाः।” वसः फ्वसापाखें अशुद्ध जूगु 47-49 “वसतय्, ऊनय् वा सुतिइ, अले सूती कापः वा ऊनयागगु, छेंगू वा छेंगुलिं दय्कूगु, न्ह्यागु हे वस्तुइ फ्वसा वयाः वाउँसे वा ह्याउँसे च्वंगु खनेदःसा पुजाहारीयात क्यनेमाः। छाय्धाःसा थ्व फ्वसां अशुद्ध जूगु खः। 50 पुजाहारीं उकियात जाँचय् यायेमाः अले उकियात न्हय्न्हु तक अलग तयेमाः। 51 उकियात न्हय्न्हु दुखुन्हु हानं जाँचय् यायेमाः, थानातःगु कापः वा छेंगुलिं दय्कूगु वस्तुइ नं व फ्वसा न्यनावंगु दुसा व ग्यानापुगु फ्वसा खः व चिज अशुद्ध खः। 52 अथे जुयाः व फ्वसा वःगु वसः थानातःगु ऊन, सुति वा छेंगूया न्ह्यागुयागु जूसां पुजाहारीं उकियात छ्वय्का छ्वयेमाः। छाय्धाःसा व ध्वग्गिगु फ्वसा खः। उकियात मिइ छ्वय्का छ्वयेमाः। 53 “तर पुजाहारीं स्वइबलय् व फ्वसा वसः थानातःगु कापः वा छेंगूयागु वस्तुइ न्यनावंगु मदुसा 54 व फ्वसा वःगु वस्तु हीमाः धकाः पुजाहारीं उजं बीमाः। अले हाकनं न्हय्न्हु तक उकियात अलग तयेमाः। 55 फ्वसा वःगु वस्तुयात ही धुंकाः पुजाहारीं उकियात हानं स्वयेमाः। फ्वसा न्हापा थें हे खनेदःसा व न्यना मवंसां व अशुद्ध खः। व फ्वसा चाहे दुनेपाखें जुइमा वा पिनेपाखें जुइमा, छं उकियात मिं छ्वयेकाब्यु। 56 व ही धुंकाः पुजाहारीं जाँचय् याइबलय् फ्वसा तना वनाच्वंगु दुसा व सुयातःगु वसः वा थानातःगु न्ह्यागुयागु कापः वा छेंगुलिं पुजाहारीं फ्वसा वःगु ब्व जक खुनाः छ्वयेमाः। 57 व फ्वसा हाकनं थानातःगु कापः वा सुयातःगु वसः वा छेंगूयागु हे वस्तुइ हानं खनेदत धाःसा व न्यनावंगु खः। व फ्वसा वःगु वस्तुयात मिं छ्वय्केमाः। 58 तर थानातःगु वा सुयातःगु न्ह्यागु हे वस्तु जूसां ही धुंकाः उकी फ्वसा मवःसा उकियात हानं हीमाः अले व शुद्ध जुइ।” 59 थानातःगु वा सुयातःगु वसः व ऊनया सुतिया वा छेंगूयागु न्ह्यागुयागु जूसां फ्वसा वइबलय् शुद्ध अशुद्ध धकाः क्वःछियेगु विधि थ्व हे खः। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.