यहोशू 7 - नेवाः बाइबलआकानया पाप 1 तर देछायेमाःगु धनमालया बारे इस्राएलीत विश्वास यायेबहः मजुल, यहूदा कुलयाम्ह जेरहया छुइ, जब्दीया छय् व कर्मीया काय् आकानं देछायेमाःगु धनमालं छुं काल। अथे जुयाः इस्राएलीत खनाः परमप्रभु तसकं तंचायादिल। 2 यहोशूं बेथेलया पुर्बपाखे व बेथ-आवनया न्ह्यःने लाःगु ऐ शहरय् यरीहों थथे धयाः मनूत छ्वल, “अन वनाः उकियागु चिवा का।” उपिं मनूत वन अले ऐ शहरयागु चिवा काल। 3 इमिसं यहोशूयाथाय् लिहां वयाः धाल, “शहरयात त्याका कायेत निद्वः (२,०००) वा स्वद्वः (३,०००) ति जक मनूत वंसा गाः, फुक्क वने म्वाः। फुक्क मनूतय्त अन वनेगु दुःख बियादी मते, छाय्धाःसा अन यक्व मनूत मदु।” 4 उकिं स्वद्वः (३,०००) ति मनूत जक अन वन, अय्नं ऐ शहरयापिन्सं इमित बुकल, अले इमित बिस्युं वने माय्काबिल। 5 ऐयापिं मनूतय्सं इमि स्विखुम्ह ति मनूतय्त स्यात। इमिसं शहरया मू ध्वाखांनिसें ल्वहं लिकाय्गु थाय् तक लिनाः तँचाय् इस्राएलीतय्त स्यात। अनंलि ग्यानाः इस्राएलीतय्गु नुगः भाराभारा मिन। 6 अथे जूगुलिं यहोशू व इस्राएलीया नायःपिन्सं थथःगु वसः खुनाः छेनय् धू ह्वलाः परमप्रभुया सनूया न्ह्यःने बँय् भ्वसुलाः सन्ध्याकाः ई तक हे च्वनाच्वन। 7 अले यहोशूं धाल, “हे परमप्रभु परमेश्वर, छिं थुपिं मनूतय्त एमोरीतय्गु ल्हातय् बियाः नाश यायेत छाय् यर्दन खुसि छिकाः हयादियागु? जिपिं लय्तायाः यर्दन खुसिया उखे हे च्वनेमाःगु। 8 हे परमप्रभु, जिं छु धायेफु धकाः, आः इस्राएलीत ला थः शत्रुतलिसें बूगु दु! 9 कनानी व थ्व देशयापिं मेपिं मनूतय्सं थ्व खँ न्यनेवं इमिसं जिमित घेरय् यानाः पृथ्वीं जिमिगु नां हुया बी। अनं लिपा छिं थःगु तःधंगु नांया लागिं छु यानादी?” 10 परमप्रभुं यहोशूयात धयादिल, “दँ! छ छाय् बँय् भ्वसुलाच्वनागु? 11 इस्राएलं पाप याःगु दु। जिं इपिंलिसें चिनागु बाचा इमिसं त्वाथूगु दु। देछायेमाःगु धनमालं इमिसं छुं काःगु दु, इमिसं खुया काःगु दु। इमिसं मखुगु खँ ल्हानाः उकियात थःगु धनमालनापं तःगु दु। 12 उकिं इस्राएलीत थः शत्रुतय् न्ह्यःने दने फइ मखु। शत्रुतय्गु न्ह्यःनें इपिं बिस्युं वनी। छाय्धाःसा इपिं थःपिं हे देछायेमाःगु धनमाल जूगु दु। छिमिसं थःगु दथुं देछायेमाःगु धनमालयात नाश याना मछ्वतले जि छिपिंनापं च्वने मखु। 13 “हुँ! मनूतय्त शुद्ध या। इमित थथे धा, ‘कन्हय्या लागि थःत शुद्ध या। छाय्धाःसा परमप्रभु इस्राएलयाम्ह परमेश्वरं थथे धयादी, हे इस्राएल, देछायेमाःगु छुं धनमाल छिमिके दु। छिमिसं उकियात चीका मछ्वतले छिपिं शत्रुतय्गु न्ह्यःने दने फइ मखु। 14 “‘उकिं सुथय् छिपिं थथःगु कुलकथं न्ह्यःने वा, व गुगु कुलयात परमप्रभुं क्यनादी। व कुल वंश-वंश यानाः न्ह्यःने वयेमाः। गुगु वंशयात परमप्रभुं क्यनादी। व वंशं छगू छगू छेँजः यानाः न्ह्यःने वयेमाः। गुगु छेँजःयात परमप्रभुं क्यनादी व छेँजलं छम्ह छम्ह मनू यानाः न्ह्यःने वयेमाः। 15 देछायेमाःगु धनमालनापं ज्वनीम्हय्सित व वयाके दुगु फुक्क मिइ छ्वय्काछ्व। छाय्धाःसा वं परमप्रभुयागु बाचा त्वाथूगु दु अले वं इस्राएलय् घच्चाइपुगु ज्या याःगु दु।’” 16 यहोशूं सुथ न्हापां दनाः इस्राएलीतय्त कुल कुल यानाः न्ह्यःने हल, व यहूदाया कुलयात क्यन। 17 वं यहूदाया वंश वंश यानाः न्ह्यःने हल व जेरहया वंशयात क्यन। अले वं जेरहया वंशया छेँजः छेँजः यानाः न्ह्यःने हल व जब्दीया छेँजःयात क्यन। 18 अले छेँजःयापिं मिजंत छम्ह छम्ह न्ह्यःने हल। यहूदा कुलया कर्मीया काय् आकानयात ज्वन (कर्मी जब्दीया काय् खः, जब्दी जेरहया काय् खः)। 19 अले यहोशूं आकानयात धाल, “हे जिमि काय्, परमप्रभु इस्राएलया परमेश्वरयात महिमा ब्यु, वय्कःयात इज्जत या! अले छं छु यानागु दु व जितः धा, जिगु न्ह्यःने व खँ सुचुके मते।” 20 आकानं यहोशूयात धाल, “धात्थें खः, जिं परमप्रभु इस्राएलया परमेश्वरयागु विरोधय् पाप यानागु दु। जिं थथे याना, 21 झीसं लाका कयागु सामानय् जिं बेबिलोनयागु छपु बांलाःगु गा, निसः शेकेल ति वहः व नेय्गू शेकेल ति लुँयागु कथि खनाबलय् जितः ल्वःवन अले जिं उपिं कया। उपिं जिगु पाल दुने बँय् सुचुका तयागु दु। व दकलय् क्वय् वहः दु।” 22 अले यहोशूं मनूत छ्वल, इपिं पालय् ब्वांय् वन। उपिं धनमाल पालय् सुचुकातःगु जुयाच्वन, वहः धाःसा दकलय् क्वय् दु। 23 अले इमिसं उपिं धनमाल पालं पिकयाः यहोशू व फुक्क इस्राएलीतय्थाय् हल। उपिं धनमाल परमप्रभुया न्ह्यःने तयाबिल। 24 अले यहोशू व सकल इस्राएलीतय्सं जेरहया काय् आकानयात व वहः, गा, लुँयागु कथि, वया काय्म्ह्याय्पिं, वया सा द्वहं, गधात व फैत, पाल अले वयाके दुगु फुक्क धनमालनापं आकोरया न्हसिकापय् हल। 25 यहोशूं धाल, “छं छाय् जिमित दुःख बियागु? थौं परमप्रभुं छन्त दुःख बियादी।” अले फुक्क इस्राएलीतय्सं वयात ल्वहँतं कय्कल। वया छेँजः व सम्पत्तियात नं ल्वहँतं कय्काः छ्वय्काबिल। 26 इमिसं वयागु सीम्हय् ल्वहँयागु तःधंगु द्वं मुंकल। गुगु थौं तक नं दयाच्वंगु दु। अले परमप्रभुयागु ग्यानापुगु तं क्वलात। उकिं व थाय्यागु नां थौं तक नं आकोरयागु न्हसिकाप जुयाच्वंगु दु। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.