यहोशू 24 - नेवाः बाइबलशकेमय् बाचा न्हूधाः याःगु 1 यहोशूं इस्राएलीतय् फुक्क कुलतय्त शकेमय् मुंकल। वं इस्राएलयापिं थकालित, कुलनायःत, न्याय याइपिं व इमि भारदारतय्त सःतल अले इपिं परमेश्वरया न्ह्यःने वल। 2 अले यहोशूं सकसितं धाल, “परमप्रभु इस्राएलया परमेश्वरं धयादी, ‘यक्व दँ न्हापा छिमि पुर्खा यूफ्रेटिस खुसियागु पारि च्वनीगु खः। इमिसं मेपिं द्यःतय्त पुजा याइगु खः। उपिं पुर्खा मध्ये छम्ह अब्राहाम व नाहोरया बौ तेरह खः। 3 तर जिं छिमि पुर्खा अब्राहामयात यूफ्रेटिस खुसि पारिं हयाः कनान देशयागु थाय् थासय् चाःहिका, अले वयात यक्व सन्तान बिया। जिं वयात इसहाक बिया, 4 हानं जिं इसहाकयात याकूब व एसाव बिया। जिं एसावयात सेइरया पहाडी देश बिया। छिमि पुर्खा याकूब व वया सन्तान धाःसा मिश्रय् वन। 5 “‘ताःई लिपा जिं मोशा व हारूनयात छ्वया, अले मिश्रय् थःगु ज्यां ततःधंगु महामारी हया। अले लिपा छिमित जिं पित हया। 6 जिं छिमि पुर्खातय्त मिश्रं पित हयाबलय् इपिं समुद्रय् थ्यंकः वयेवं मिश्रीत रथ व सलगइपिं ज्वनाः लाल समुद्र तक छिमि पुर्खातय्त ल्यू वल। 7 इमिसं परमप्रभुयात ग्वाहालि फ्वन अले वय्कलं इपिं व मिश्रीतय्गु दथुइ खिउँसे च्वंकादिल। वय्कलं समुद्रं इमित त्वपुयाबिल। जिं मिश्रीतय्त छु यानाः व छिमिसं थःगु हे मिखां खन। अनंलि छिपिं मरुभूमिइ यक्व दिं तक च्वन। 8 “‘जिं छिमित यर्दनया पुर्बय् च्वनिपिं एमोरीतय्गु देशय् हया। इमिसं छिपिंलिसे लडाइँ यात तर जिं इमित छिमिगु ल्हातय् बिया। जिं इमित छिमिगु न्ह्यःनें नाश यानाबिया अले छिमिसं इमिगु देशय् अधिकार यात। 9 हानं मोआबयाम्ह जुजु सिप्पोरया काय् बालाकं इस्राएलनापं लडाइँ यात। अले वं छिमित सराः बीत बओरया काय् बालामयात सःतके छ्वल। 10 तर जिं बालामयात सराः बीके मबिया। वं छिमित तःक्वः मछि सुवाः जक बिल। थुकथं छिमित बालाकया ल्हातं बचय् याना। 11 “‘अनंलि छिपिं यर्दन छिनाः यरीहोय् वल। यरीहोयापिं मिजंत छिपिंलिसें ल्वात, लिपा एमोरी, परिज्जी, कनानी, हित्ती, गिर्गाशी, हिव्वी व यबूसीत नं छिपिंनापं ल्वात। अय्नं जिं इमित छिमिगु ल्हातय् बिया। 12 एमोरीतय् निम्ह जुजुतय्त छिमिगु न्ह्यःनं लिनाछ्वयेत जिं छिमिगु न्ह्यःने न्ह्यःने आतंक छ्वयाबिया। व छिमिगु तरवार व धनुष जूगु मखु। 13 थथे छिमिसं छुं हे याये म्वाःगु बुँ व छिमिसं मदय्कूगु शहर जिं छिमित बिया। आः छिपिं अन च्वनाच्वंगु दु। छिमिसं मप्यूगु दाखक्यब व जैतूनया क्यबया फल नयाच्वंगु दु।’ 14 “उकिं आः परमप्रभुयागु ग्याःचिकु कयाः वय्कःयात दुनुगलंनिसें सेवा या। छिमि पुर्खातय्सं यूफ्रेटिस खुसि पारि व मिश्र देशय् पुजायापिं द्यःतय्त वांछ्व अले परमप्रभुया जक सेवा या। 15 परमप्रभुयागु सेवा याये मयःसा सुयागु सेवा यायेगु खः व छिमिसं थौं ल्य। छिमि पुर्खातय्सं यूफ्रेटिस खुसिया उखे पुजा याःपिं द्यःत कि छिपिं आः च्वनाच्वंगु देशयापिं एमोरीतय् द्यःत? जि व जिमि छेँजःपिन्सं धाःसा परमप्रभुयागु हे सेवा याये।” 16 अले मनूतय्सं धाल, “परमप्रभुयात त्वःताः जिमिसं गुबलें नं मेपिं द्यःतय्त पुजा याये मखु। 17 छाय्धाःसा परमप्रभु, झी परमेश्वरं झीत व झी पुर्खातय्त मिश्रं पित हयादीगु खः। झीपिं व देशय् दास जुयाः च्वनागु खः। झीसं वय्कलं यानादीगु अजू चाइपुगु ज्या खनागु दु। झीपिं थीथी जातितय्गु देश जुया वयाबलय् वय्कलं झीत बचय् यानादिल। 18 परमप्रभुं झीगु न्ह्यःने फुक्क जातित, अले थ्व देशयापिं एमोरीतय्त नं लिनाछ्वल। उकिं जिमिसं नं परमप्रभुयागु सेवा याये छाय्धाःसा वय्कः हे जिमि परमेश्वर खः।” 19 अले यहोशूं मनूतय्त धाल, “छिमिसं परमप्रभुयागु सेवा बांलाक याये फइ मखु, छाय्धाःसा वय्कः पवित्रम्ह व नुगः मुइकादीम्ह परमेश्वर खः। वय्कलं छिमिगु अपराध व पाप क्षमा यानादी मखु। 20 छिमिसं परमप्रभुयात त्वःताः मेपिं द्यःतय्त पुजा यात धाःसा आः तक वय्कलं छिमिगु भिं यानादीगु जूसां छिमित नाश यानादी। मभिं यायेत वय्कः लिहां झाइ अले छिमित भस्म याइ।” 21 अले मनूतय्सं यहोशूयात धाल, “मखु, जिमिसं परमप्रभुयागु हे सेवा याये।” 22 यहोशूं इमित धाल, “छिमिसं परमप्रभुया सेवा यायेगु खँ ल्यःगु दु धयागुया छिमिगु साक्षी छिपिं थः हे खः।” इमिसं धाल, “खः जिपिं हे साक्षी खः।” 23 यहोशूं धाल, “अथे हे खःसा थःके दुगु मूर्तितय्त वांछ्वयाब्यु अले दुनुगलंनिसें परमप्रभु इस्राएलया परमेश्वरयात मानय् यायेगु बचं ब्यु।” 24 अले मनूतय्सं यहोशूयात धाल, “जिमिसं परमप्रभु झी परमेश्वरयागु हे सेवा याये अले वय्कःया खँ न्यने।” 25 यहोशूं उखुन्हु हे शकेमय् मनूतलिसें बाचा चिन। उकी परमप्रभुं इमित बियादीगु विधि व नियम बांलाक मानय् यायेमाः धकाः लुमंकूगु दु। 26 थुपिं फुक्क खँ यहोशूं परमेश्वरयागु व्यवस्थाया सफुलिइ च्वल। अले वं छगः तःग्वःगु ल्वहँ कयाः स्वसिमाक्वय् पवित्रथाय् सतिक थन। 27 यहोशूं फुक्क मनूतय्त धाल, “स्व! थ्व ल्वहं झीगु साक्षी जुइ। थुकिं छिमित थ्व बाचा लुमंकाबी। छिपिं परमेश्वरपाखें तापाना मवंसें न्ह्याबलें परमेश्वरया आज्ञा पालन यानाच्वनी।” 28 थथे यहोशूं इमित इमिगु थथःगु सर्बयया इलाकाय् छ्वल। यहोशू व एलाजार सीगु 29 थुपिं फुक्क खँ जुइ धुंकाः परमप्रभुया दास, नूनया काय् यहोशू सछि व झिदँ दुबलय् सित। 30 अले इमिसं वयात गाश पहाडया उत्तरय् एफ्राइमया पहाडी देशया तिम्नथ-सेरहय् वयागु थःगु हे सर्बयया जमिनय् थुनाबिल। 31 यहोशूयागु जिवंकाछि व यहोशू सी धुंकाः म्वाःपिं व परमप्रभुं इस्राएलया निंतिं यानादीगु फुक्क ज्याया बारे स्यूपिं थकालितय्गु जिवंकाछि नं इस्राएलीतय्सं परमप्रभुयागु सेवा यात। 32 इस्राएलीतय्सं मिश्र देशं हःगु योसेफया अस्थि शकेमय् थुनाबिल। व जमिन याकूबं शकेमया बौ हमोरया काय्पिन्के सछि वहःयागु कुचा बियाः न्यानाकाःगु खः। थ्व जमिन योसेफया सन्तानया पुर्खाया सम्पत्तिकथं दत। 33 हारूनया काय् एलाजार नं सित। व शहर एफ्राइमया पहाडी देशय् वया काय् पीनहासयात ब्यूगु खः। अले वयात गिबाय् थुनाबिल। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.