यहोशू 14 - नेवाः बाइबल

यर्दनया पच्‍छिमयागु देश इनाब्‍यूगु

¹ एलाजार पुजाहारी, नूनया काय् यहोशू व इस्राएलया कुलनायःतय्‌सं इस्राएलीतय्‌त सर्बयकथं इनाब्‍यूगु कनान देशयागु इलाका थथे दु।

² परमप्रभुं मोशायात आज्ञा बियादीगु थें यर्दनयागु पच्‍छिमय् दुगु देश सर्बयकथं चिट्ठा तयाः ल्‍यंदुपिं उपिं गुंगू व बच्‍छि कुलयात इनाबिल।

³ मोशां निगू व बच्‍छि कुलयात न्‍हापा हे यर्दनया पुर्बय् लाःगु देश सर्बयकथं इनाबी धुंकूगु खः। लेवीया सन्‍तानतय्‌त धाःसा वं देशयागु छुं सर्बय् ब्‍यूगु मदु।

⁴ योसेफया सन्‍तान निगू कुल जूगु दु, मनश्‍शे व एफ्राइम। लेवीया सन्‍तानतय्‌त व देशयागु बुँ ला मब्‍यू तर च्‍वनेत शहर व इमि पशुतय्‌गु पुचः व बथांया लागिं ज्‍वयेगु थाय् जक बिल।

⁵ थुकथं परमप्रभुं मोशायात आज्ञा बियादीगु थें हे इस्राएलीतय्‌सं देश इना काल।

कालेबयात हेब्रोन ब्‍यूगु

⁶ यहूदायापिं छुं मिजंत गिलगालय् यहोशूयात नापलाः वल। अले कनज्‍जी यपुन्‍नेया काय् कालेबं वयात धाल, “परमेश्‍वरया मनू मोशायात कादेश-बर्नेय् परमप्रभुं छिगु व जिगु बारे धयादीगु खँ छिं सि हे स्‍यू।

⁷ जि पिइदँ दुबलय् परमप्रभुया दास मोशां जितः थ्‍व देशयागु चिवा कायेत कादेश-बर्नेनं छ्वयाहःगु खः। अले जिं अनयागु खःगु खँ वयाथाय् हया।

⁸ तर जिनापं वंपिं इस्राएलीतय्‌सं मनूतय्‌त ख्‍यात। जिं धाःसा दुनुगलंनिसें परमप्रभु परमेश्‍वरयागु आज्ञा मानय् याना।

⁹ उकिं उखुन्‍हु मोशां पाफयाः जितः थथे धाल, ‘छं पलाः तःगु देश सदांया निंतिं छंगु व छिमि काय् म्‍ह्याय्‌पिनिगु सर्बय् जुइ। छाय्‌धाःसा छं दुनुगलंनिसें परमप्रभु जिमि परमेश्‍वरया आज्ञा मानय् यात।’

¹⁰ “आः स्‍वयादिसँ! परमप्रभुं मोशायात अथे धयादीगु पिइन्‍यादँ दये धुंकल। उबलय् इस्राएलीत मरुभूमिइ हे चाचाःहिलाच्‍वन। अनंलि थौं तक परमप्रभुं थःगु बचंकथं जितः म्‍वाका तयादीगु दु। थौं जि चयन्‍यादँ हे दये धुंकल।

¹¹ मोशां जितः छ्वःबलय् जिके गुलि बल दुगु खः आः नं जिके उलि हे बल दनि। उबलय् लडाइँलय् वनेत गुलि फुर्ति दुगु खः उलि हे फुर्ति आः नं जिके दनि।

¹² उकिं परमप्रभुं उखुन्‍हु धयादीगुकथं आः व पहाडी देश जितः बियादिसँ। उबलय् अन अनाकी धाःपिं ततःधिकःपिं मनूत च्‍वनीगु खः अले इमिके ततःजाःगु पखाः दुगु शहरत दु धकाः छिं न्‍यनादीगु खः। तर परमप्रभुयागु ग्‍वाहालिं वय्‌कलं धयादीगु थें जिं इमित लिनाछ्वये।”

¹³ अले यहोशूं यपुन्‍नेया काय् कालेबयात सुवाः बियाः वयात हेब्रोन शहर सर्बयकथं बिल।

¹⁴ थथे उखुन्‍हुंनिसें थौं तक हेब्रोन कनज्‍जी यपुन्‍नेया काय् कालेबयागु सर्बय् जुयाच्‍वंगु दु, छाय्‌धाःसा वं दुनुगलंनिसें परमप्रभु इस्राएलया परमेश्‍वरया आज्ञा मानय् यात।

¹⁵ हेब्रोनयात ततःधिकःपिं अनाकीतय् दकलय् तःधंम्‍ह मिजं अर्बायागु नामय् किर्यत-अर्बा धाइगु खः। अनंलि देशय् लडाइँपाखें शान्‍ति जुल।