यर्मिया 52 - नेवाः बाइबलयरूशलेम पतन जूगु २ राज २४:१८–२५:७ 1 सिदकियाह निइछदँ दुबलय् जुजु जूगु खः। वं यरूशलेमय् झिंछदँ शासन यात। वया मांया नां हमुतल खः। व लिब्नाय् च्वंम्ह यर्मियाया म्ह्याय् खः। 2 यहोयाकीम जुजुं याःगु थें वं परमप्रभुया मिखाय् मभिंगु ज्या यात। 3 यरूशलेम व यहूदाय् जूगु घटनां परमप्रभुयात तंचाय्कूगुलिं वय्कलं इमित थःगु न्ह्यःनं पितिनाछ्वयादिल। सिदकियाहं बेबिलोनयाम्ह जुजुया विरोधय् विद्रोह यात। 4 उकिं सिदकियाहं राज्य यानाच्वंगु गुंगूगु दँया झिगूगु लाया झिन्हु दुखुन्हु बेबिलोनयाम्ह जुजु नबूकदनेसर यरूशलेमय् हमला यायेत थः फुक्क सेना ज्वनावल। इमिसं शहरया पिने छाउनी तल अले शहरयात घेरय् यात। 5 थुकथं सिदकियाह जुजुया झिंछगूगु दँ तक शहरयात घेरय् याना तल। 6 प्यंगूगु लाया गुन्हु दुखुन्हु थुलि तःधंगु अनिकाल जुल कि मनूतय्के नयेत तकं छुं मन्त। 7 बेबिलोनीतय्सं शहरया पःखाः तछ्यानाबिल। इमिसं शहर घेरय् यानातःगु जूसां चान्हय् सिदकियाह जुजु व सकलें सिपाइँत जुजुया क्यब लिक्कयागु निगू पःखाःया दथुइ दुगु लुखा जुयाः बिस्युं वन। इपिं अराबापाखे बिस्युं वन। 8 तर बेबिलोनी सिपाइँतय्सं सिदकियाहयात लित अले वयात यरीहोया ख्यलय् नापलाकल। वया फुक्क सिपाइँत वयात त्वःताः बिस्युं वन। 9 बेबिलोनी सिपाइँतय्सं सिदकियाहयात ज्वनाः वयात हमात देशय्, रिब्ला धाःगु थासय् बेबिलोनयाम्ह जुजुयाथाय् हल। अन वं वयात सजाँय बीगु आज्ञा बिल। 10 अन रिब्लाय् हे बेबिलोनयाम्ह जुजुं सिदकियाहया काय्पिन्त वयागु मिखाया न्ह्यःने हे स्याकेबिल, अले यहूदाया फुक्क हाकिमतय्त नं स्याकेबिल। 11 अनंलि वं सिदकियाहया मिखा लिकाकेबिल। बेबिलोनयाम्ह जुजुं वयात कँय्यागु सिखलं चिनाः बेबिलोनय् यंकल। अले वयात मसीतले कुनातल। देगः नाश जूगु २ राज २५:८-१७ 12 बेबिलोनया जुजु नबूकदनेसरया झिंगुंगूगु दँया न्यागूगु लाया झिन्हु दुखुन्हु बेबिलोनया जुजुयात सेवा याइम्ह अङ्गरक्षकतय् सेनापति नबूजरदान यरूशलेमय् वल। 13 वं परमप्रभुया देगः, जुजुया दरबार, व यरूशलेमया फुक्क छेँ मिं नकाबिल। वं ततःखाःगु फुक्क छेँ मिं नकाबिल। 14 जुजुया सेनापतिया अधीनय् दुपिं फुक्क सेनां यरूशलेमया छचाःखेरं दुगु पःखाः थुनाबिल। 15 अनंलि सेनापति नबूजरदानं मनूत मध्ये दकलय् चीमिपिं, शहरय् ल्यनाच्वंपिं मनूत व बेबिलोनया जुजुयाथाय् बिस्युं वंपिं मनूत व ज्या सःपिं कालिगरतय्त ज्वनाः बेबिलोनय् यंकल। 16 तर नबूजरदानं देशयागु दाखक्यब व बुँइ ज्या यायेत छुं गरीबतय्त त्वःताः थकल। 17 अले बेबिलोनीतय्सं परमप्रभुया देगलय् दुगु कँय्यागु थांत, लिधंसा, कँय्यागु तग्वःगु त्यांकि कुचा कुचा यानाः फुक्क कँय् बेबिलोनय् यंकल। 18 इमिसं वेदी सफा यायेबलय् छ्यलीगु बेल्चा व नौ तयेगु थल, मत मिले याइगु ज्वलंत, बलि बीबलय् हि फइगु थलत, मकःत व आम्खुरा, ख्वल्चा, करुवा, फुक्क कँय्यागु सामान यंकल। 19 जुजुया अङ्गरक्षकतय् सेनापतिं भिंगु लुँ वा वहःयागु बातात, गुँगू मकःत, छ्वाकेगु बातात, थलबलत, त्वाःदेवात, त्वँसाबलि छाइगु ख्वला व बातात नं यंकल। 20 उपिं निपु थां, छगः कँय्यागु तग्वःगु त्यांकि, उकिया क्वय् दुगु झिंनिम्ह कँय्यागु द्वहंत, थुखे उखे यंके ज्यूगु लिधंसात गुगु सोलोमन जुजुं परमप्रभुया देगःया निंतिं दय्कूगु खः उपिं फुक्क लने हे मफय्क दु। 21 निपुं थां ८-८ मिटर तःजा। उकिया चाकः ५.३ मिटर दु, व न्हय्गू व बागू सेन्टिमिटर तःफि, व फुस्लुं च्वं। 22 छपु छपु थांया च्वय् कँय्यागु त्वपुलि दु। छगः छगः क्वपु २.२-२.२ मिटर तःजा। छगः छगः क्वपु कँय्यागु जालि व धालेग्वःया बुत्तां प्यखेरं भरय् यानातःगु दु। 23 लिक्क लिक्क गुइगः धालेग्वःत दु। प्यखेरं जालियात घेरय् यानातःगु धालेग्वःत मुक्कं गुइखुगः दु। यहूदायापिं मनूतय्त ज्वनाः बेबिलोनय् यंकूगु २ राज २५:१८-२१ , २७-३० 24 बेबिलोनया सेनापतिं दकलय् तःधंम्ह पुजाहारी सरायाह व निगूगु थासय्याम्ह पुजाहारी सपन्याहयात व स्वम्ह पालेतय्त नं ज्वना यंकल। 25 शहरय् ल्यनाच्वंपिं मध्ये वं सिपाइँतय् कप्तान व न्हय्म्ह जुजुयात सल्लाह बीपिन्त यंकल। वं देशयापिं मनूतय्त सिपाइँलय् भर्ना याइम्ह दक्व शक्ति दुम्ह हाकिम व शहरय् लुया वःपिं खुइम्ह सिपाइँतय्त नं यंकल। 26 थुमित अङ्गरक्षकतय् सेनापति नबूजरदानं रिब्ला शहरय् बेबिलोनयाम्ह जुजुयाथाय् यंकल। 27 बेबिलोनयाम्ह जुजुं हमात देशया रिब्ला शहरय् थुमित स्यायेगु आज्ञा बिल। थुकथं यहूदायापिं मनूतय्त थःगु देशं ज्वना यंकल। 28 नबूकदनेसरं ज्वनायंकूपिं मनूतय्गु ल्याः थथे दु – वया शासनया न्हय्गूगु दँय् ३,०२३ म्ह यहूदाया मनूत। 29 वयागु शासनया झिंच्यागूगु दँय् नबूकदनेसरं यरूशलेमं ८३२ म्ह यंकल। 30 वयागु शासनया निइस्वंगूगु दँय् जुजुया सेनापति नबूजरदानं ७४५ म्ह यहूदाया मनूतय्त ज्वनाः बेबिलोनय् यंकल। मुक्कं ४,६०० म्ह मनूत दु। यहोयाकीनयात त्वःतूगु 31 यहूदायाम्ह जुजु यहोयाकीनयात ज्वनाः बेबिलोनय् यंकूगु स्विन्हय्दँ दुबलय् एबील-मरोदक बेबिलोनयाम्ह जुजु जुल। झिंनिगूगु लाया निइन्यान्हु दुबलय् जुजु एबील-मरोदकं यहोयाकीनयात झ्यालखानां त्वःतल। 32 वं वलिसें बांलाक न्ववानाः बांलाःगु व्यवहार यात। अले व थें बेबिलोनय् कैदी जुयाच्वंपिं मेपिं जुजुपिन्त स्वयाः वयात अज्ज अप्वः इज्जतया थासय् तल। 33 थुकथं यहोयाकीनं कैदीया वसः त्वःतल अले म्वानाच्वंतले बरोबर जुजुया टेबिलय् नल। 34 यहोयाकीन म्वानाच्वंतले बेबिलोनयाम्ह जुजुं वयात न्हिन्हि नयेत माःगु खर्च बियाच्वन। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.