यर्मिया 40 - नेवाः बाइबलयर्मियायात त्वःतूगु 1 जुजुया सेनापति नबूजरदानं यर्मियायात सिखलं चिनाः बेबिलोनय् यंकेत्यंपिं यरूशलेमयापिं व यहूदायापिं मेपिं कैदीतनापं लुइकूगु खः। वं वयात रामाय् त्वःता ब्यूबलय् परमप्रभुपाखें यर्मियायाथाय् वःगु वचन थ्व हे खः। 2 सेनापतिं यर्मियायात सःताः थथे धाल, “परमप्रभु छिमि परमेश्वरं थ्व थासय् थ्व विपत्ति वइ धकाः न्हापा हे धयादीगु खः। 3 आः वय्कलं थ्व विपत्ति हयाः थःम्हं धयादीगु थें यानादिल। छिमिसं परमप्रभुया विरोधय् पापयात, वय्कःया आज्ञा पालन मयात, उकिं थ्व फुक्क जुल। 4 तर थौं छंगु ल्हाःया सिखलं जिं छन्त मुक्त यानाबी। जिलिसें बेबिलोनय् वये मंदुसा वा! छन्त जिं स्वये। तर छन्त जिलिसें बेबिलोनय् वये मंमदुसा वये मते! स्व! थ्व फुक्क देश छंगु न्ह्यःने दु। छन्त गन वने मंदु अन हुँ!” 5 अय्नं यर्मिया वनेत्यंबलय् नबूजरदानं लिफः स्वयाः धाल, “शापानया छय्, अहीकामया काय् गदल्याहयाथाय् हुँ! वयात बेबिलोनयाम्ह जुजुं यहूदाया शहरया बडाहाकिम ल्यःगु दु। अन वनापं मेपिं मनूतलिसें च्वँ, अथवा छन्त गन वने मंदु अन हुँ!” सेनापतिं वयात नयेगु सामान व कोसेलि बियाः त्वःताबिल। 6 उकिं यर्मिया मिस्पाय् अहीकामया काय् गदल्याहयाथाय् वन, अले वलिसें देशय् त्वःताथकूपिंनापं च्वन। यहूदाया बडाहाकिम गदल्याह २ राज २५:२२-२४ 7 बेबिलोनयाम्ह जुजुं अहीकामया काय् गदल्याहयात देशया बडाहाकिम ल्यःगु दु अले ज्वनाः बेबिलोनय् मयंकूपिं देशयापिं दकलय् गरीबपिं मिजं, मिस्त व मस्त फुक्क वयागु ल्हातय् ब्यूगु दु धयागु खँ सेनायापिं सकलें कप्तानत व बस्ती बस्तीइ दुपिं सिपाइँतय्सं न्यन। 8 अले इपिं मिस्पाय् गदल्याहयाथाय् वल। इपिं थथे दु – नतन्याहया काय् इश्माएल, कारेहया निम्ह काय्पिं योहानान व जोनाथन, तन्हूमेतया काय् सरायाह, नतोपाती एफैया काय्पिं, माकातीया काय् याजन्याह व थुमि सकलें मनूत। 9 शापानया छय्, अहीकामया काय् गदल्याहं इपिं व इमि मनूतय्त साहस बीत पाफयाः थथे धाल, “बेबिलोनीतय्गु सेवा यायेत ग्याये मते। देशय् च्वनाः बेबिलोनयाम्ह जुजुया सेवा या! छिमिगु भिं जुइ। 10 जि धाःसा झीथाय् वइपिं बेबिलोनीतय् न्ह्यःने छिमि न्ह्यलुवाः जुयाः मिस्पाय् हे च्वने। छिमिसं धाःसा दाखमद्य, तांन्वःबलय्या फल व चिकं थथःगु थलय् मुंकाः ति, अले छिपिं छिमिसं काःगु शहरय् च्वँ।” 11 बेबिलोनयाम्ह जुजुं यहूदाया मनूतय् छुं मनूत त्वःताथकूगु दु व शापानया छय्, अहीकामया काय् गदल्याहयात बडाहाकिम ल्यःगु दु धयागु खँ मोआबय्, अम्मोनय्, एदोमय् व मेमेगु देशय् दुपिं यहूदीतय्सं न्यन। 12 अले सकलें यहूदी मनूत, गन गन इपिं छ्यालब्याल जूगु खः, व थासं लिहां वयाः यहूदा देशया मिस्पाय् गदल्याहयाथाय् वल। अले इमिसं यक्व हे दाख व तांन्वःबलय्या फल मुंकल। गदल्याहयात स्याःगु २ राज २५:२५-२६ 13 कारेहया काय् योहानान व बस्ती बस्तीइ दुपिं सेनाया सकलें कप्तानत मिस्पाय् गदल्याहयाथाय् वल। 14 इमिसं वयात थथे धाल, “छितः स्यायेत अम्मोनीतय् जुजु बालीसं नतन्याहया काय् इश्माएलयात छ्वयाहःगु दु।” तर अहीकामया काय् गदल्याहं व खँ पत्याः मयात। 15 अले कारेहया काय् योहानानं मिस्पाय् गदल्याहयात सुं मदुगु थासय् थथे धाल, “जि वनाः नतन्याहया काय् इश्माएलयात स्याये ला? थ्व खँ सुनानं सी मखु। छिगु प्येखेरं मुंवःपिं यहूदाया मनूतय्त छ्यालब्याल जुइके बीत, अले यहूदाया ल्यनाच्वंपिं नाश जुइके बीत वयात छाय् छिगु ज्यान काय्के बीगु?” 16 तर अहीकामया काय् गदल्याहं कारेहया काय् योहानानयात धाल, “छं थज्याःगु ज्या याये मते! छाय्धाःसा छं इश्माएलया बारे धाःगु खँ सत्य मखु।” |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.