यर्मिया 30 - नेवाः बाइबलथः प्रजायात परमप्रभुया बचं 1 परमप्रभुपाखें यर्मियायाथाय् वःगु वचन थ्व हे खः, 2 “परमप्रभु, इस्राएलया परमेश्वरं थथे धयादी, ‘जिं छन्त धयागु फुक्क खँ छगू सफुलिइ च्व। 3 जिं जिमि प्रजा इस्राएल व यहूदायात बेबिलोनं लित हयेगु दिं वयेत्यंगु दु। जिं इमि पुर्खातय्त बियागु देशय् जिं इमित लित हये। इमिसं हाकनं उगु देशय् अधिकार याइ,’” परमप्रभुं धयादी। 4 इस्राएल व यहूदाया बारे परमप्रभुं धयादीगु खँ थ्व हे खः, 5 परमप्रभुं थथे धयादी, “‘ख्याइगु सः, छगू भयया ख्वःसः ताये दयाच्वंगु दु तर शान्तियागु मखु। 6 छकः न्यनाः ला स्व! सुं मिजंम्हय्सिनं मचा बुइके फइ ला? छाय् जिं सकलें मिजंतय्सं मचाबू ब्यथा जूम्ह मिसां थें थःगु प्वाथय् ल्हाः तःगु खना? छाय् सकसिगु ख्वाः सीम्ह थें म्हासुसे च्वंगु? 7 हाय! व दिं गुलि ग्यानापुसे च्वंगु दिं जुइ। व थें ज्याःगु मेगु दिं दइ मखु। जिमि मनूत याकूबया सन्तानया निंतिं व दुःखया दिं जुइ तर व वपाखें बचय् जुयाः वइ।’” 8 “‘दक्व शक्ति दुम्ह परमप्रभुं धयादी, उखुन्हु जिं व जुवा इमिगु ककुं त्वथुलाबी, अले इमिगु सिखः कुचा कुचा यानाबी। इपिं हाकनं विदेशीतय् दास जुइ मखु। 9 तर इमिसं जि परमप्रभु थः परमेश्वरयागु व जिं इमिगु लागि ल्ययाम्ह दाऊद जुजुया सेवा याइ। 10 “‘उकिं परमप्रभुं धयादी, हे जिम्ह दास, याकूबया सन्तान, ग्याये मते। हे इस्राएलयापिं मनूत, नुगः क्वतुंके मते। जिं थम्हं हे छिमित तापाःगु देशं व छिमि सन्तानयात ज्वनायंकातःगु देशं बचय् यानाः हये। याकूबयात हाकनं शान्ति व सुरक्षा दइ। सुनानं वयात ख्याये फइ मखु।’ 11 परमप्रभुं धयादी, ‘जि छनापं दइ अले छन्त बचय् याये। जिं छन्त छु छु जातितय्थाय् छ्यालब्याल यानागु खः, जिं व फुक्क जातियात नाश यानाबी, अय्नं जिं छन्त भज्यंक नाश याये मखु। जिं छन्त सजाँय मब्यूसे त्वःते ला मखु अय्नं भिंकेबलय् खःकथं न्याय यानाः भिंके।’” 12 “परमप्रभुं थः मनूतय्त थथे धयादी, “‘छंगु घाः लनी मखु व छंगु घाःपाः तःधं। 13 छंगु पंलिनाः न्ववाइम्ह सुं मदु। छंगु घालय् तयेत पट्टी नं मदु, मलम नं मदु। 14 छं फुक्क पासापिन्सं छन्त ल्वःमंके धुंकल। इमिसं छन्त वास्ता मयाः। छं तःधंगु अपराध याःगुलिं व यक्व पाप याःगुलिं जिं छन्त शत्रु थें कय्कागु दु। अले दयामाया मदुम्हय्सिनं थें छन्त सजाँय बियागु दु। 15 छाय् छ थःगु घाःया निंतिं ख्वयागु? छंगु स्याःचाः लनीगु वासः मदु। छंगु अधर्म तःधं अले छं यक्व पाप याःगु दु उकिं जिं छन्त थज्याःगु व्यवहार याना। 16 “‘छन्त नःपिं सकसितं नइ। छिमि फुक्क शत्रुतय्त देशं पितिनाछ्वइ। छंगु धन-सम्पत्ति लाकाकाइपिनिगु धन-सम्पत्ति लाका काइ। छन्त स्यंकीपिन्त जिं स्यंके।’ 17 परमप्रभुं धयादी, ‘जिं छन्त वासः यानाः छंगु घाः लाय्काबी, छाय्धाःसा छन्त सकसिनं अलग यानातःम्ह सुनां वास्ता मयाःम्ह सियोन धकाः धाइगु।’ 18 “परमप्रभुं थथे धयादी, “‘जिं थःम्हं हे थः प्रजायात इमिगु देशय् लित हये अले फुक्क परिवारयात दयामाया याये। शहरयात व नाश जूगु थासय् हे हाकनं दय्की। जुजुया दरबार नं हाकनं थःगु थासय् दय्की। 19 अनयापिं मनूतय्सं प्रशंसाया म्ये हाली अले लय्ताइ। जिं इमिगु ल्याः अप्वय्काबी इमिगु ल्याः कम जुइ मखु। जिं इमित इज्जत बीके, सुनानं इमित क्वह्यंकी मखु। 20 इमि मस्त न्हापायापिं थें हे जुइ। इमिगु खलः जिगु न्ह्यःने पलिस्था जुइ। इमित क्वत्यलीपिन्त जिं सजाँय बी। 21 इमि नायः इपिं मध्ये हे छम्ह जुइ। इमि शासक इमिगु दथुं हे पिहां वइ। जिं वयात सःतेबलय् व जिगु लिक्क वइ। छाय्धाःसा जिं मसःतेकं सुनां जिगु न्ह्यःने वयेगु साहस याइ?’ परमप्रभुं धयादी। 22 ‘थुकथं छिपिं जिम्ह मनूत जुइ, जि छिमि परमेश्वर जुये।’” 23 स्व, तम्वय् परमप्रभुयागु ग्वःफय् मुयावइ, दुष्टतय्गु छेनय् व न्याइ। 24 थःगु मनय् दुगु इच्छा पूमवंतले परमप्रभुया तच्वःगु तं क्वलाइ मखु। लिपा छिमिसं थ्व बांलाक सी। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.