न्यायकर्ता 5 - नेवाः बाइबलदबोरा व बाराकं हाःगु म्ये 1 उखुन्हु दबोरा व अबीनोअमया काय् बाराकं थ्व म्ये हाल, 2 इस्राएलयापिं राजकुमारत न्हेज्यात, मनूतय्सं थःयसें थःत देछात। परमप्रभुया प्रशंसा या! 3 “हे जुजुपिं न्यँ, हे सेनापतित न्हाय्पं ब्यु, जिं परमप्रभुया लागि म्ये हाले, खः, जिं इस्राएलयाम्ह परमप्रभु परमेश्वरयागु भजन हाले।” 4 “हे परमप्रभु, छि सेइरं पिहां झाःबलय्, छि एदोम देशं पिहां झाःबलय्, पृथ्वी थुरथुर खात, अले आकाशं फुति फुति वा वल, खः, सुपाचं वा वल। 5 परमप्रभुया न्ह्यःने, सीनैयाम्ह परमप्रभुया न्ह्यःने, परमप्रभुया न्ह्यःने, इस्राएलयाम्ह परमेश्वरया न्ह्यःने, पहाडत ग्यानाः थुरथुर खात।” 6 “अनातया काय् शमगरया पालय्, याएलया पालय्, देशयागु दथुं बन्जाःत मवं। लँजुवाःत चाचाःहिलाः जक वनीगु खः। 7 इस्राएलय् जि दबोरा मां जुया मदंतले इस्राएलया गांया जीवन दित। 8 न्हूपिं न्हूपिं द्यःतय्त ल्यःबलय् शहरया ध्वाखाय् लडाइँ थ्यंकः वल। इस्राएलया पिइद्वः मनूयाके भाला व ढाल छुनं खने मदु। 9 जिगु मन इस्राएलया सेनापतित नापं दु, मनूत मध्येया थःगु इच्छां थःत लःल्हाःपिं प्रजानापं। परमप्रभुया प्रशंसा या!” 10 हे गलैंचाय् फेतुनाः तुयुपिं गधात गइपिं, हे लँय् वनेमाःपिं, बांलाक न्यँ। 11 मिस्त लः काःवइगु थासं म्ये हालिपिनिगु सः ताये दयाच्वंगु दु। अन इमिसं परमप्रभु त्याःगुया बारे अले इस्राएलीत त्याःगुया बारे धयाच्वंगु दु। अले परमप्रभुया मनूत शहरया ध्वाखाय् मुं वन। 12 दँ, दँ हे दबोरा! दँ, दँ, म्ये न्यंकि, हे अबीनोअमया काय् बाराक दँ! थःम्हं कुना तःपिं मनूतय्त ज्वनाः छ न्ह्यज्या। 13 अले बचय्जूपिं मनूत भारदारतथाय् कुहां वल। परमप्रभुया मनूत बल्लाःपिं शत्रुतय् विरोधय् जिनापं वल। 14 इपिं एफ्राइमं बेसी तक वल, बेन्यामीन कुलयापिं ल्यूल्यू वल। माकीरं कप्तानत कुहां वल, जबूलून कुलं सेनाया कप्तानया कथि ज्वनाः मनूत वल। 15 इस्साखारया नायःत दबोरा नापं वल, खः, इस्साखारं बाराकयात ग्वाहालि यात, इपिं ल्यूल्यू बेसी तक वन। रूबेनया जिल्ला जिल्लाय् मन स्वयेगु ज्या यक्व जुल। 16 छिपिं छाय् फैगलय् फैजवाःतय्गु तिसः न्यनेत च्वंच्वनागु? रूबेनया जिल्ला जिल्लाय् मन स्वयेगु ज्या यक्व जुल। 17 गिलाद यर्दनया उखे हे च्वन। अले दान छाय् जहाजतय्गु लिक्क पियाच्वंगु? आशेर समुद्रया सिथय् हे लिबाकाच्वन, अले थःगु हे गुफातय् च्वन। 18 जबूलूनया मनूतय्सं धाःसा थःगु ज्यानयात खतराय् लाकल। अथें तुं नप्तालीतय्सं नं देशया ततःजाःगु थासय्। 19 “जुजुपिं वयाः लडाइँ यात। कनानया जुजुपिन्सं मगिद्दोया बुँगाःचाया लिक्क तानाकय् लडाइँ यात। तर इमिसं वहः व लुतय् याःगु सामान मयंकू। 20 आकाशं नगुतय्सं लडाइँ यात, इमिगु लँपुं इमिसं सीसरालिसें ल्वात। 21 कीशोन खुसिं इमित चुइकाः यंकल। व हे पुलांगु खुसि, कीशोन खुसि। हे जिगु मन, आँट पिकयाः न्ह्यज्या! 22 अले सलया तुतिया ख्वःयागु ध्वानानाना सः वल। वया बल्लाःपिं सलत जोडं ब्वाँय् वन। 23 परमप्रभुया दूतं, ‘मेरोजयात सराः ब्यु’ धाल, ‘सराः ब्यु, वया मनूतय्त सराः ब्यु छाय्धाःसा इमिसं परमप्रभुयात भतिचा नं ग्वाहालि मब्यू, परमप्रभुयात बल्लाःपिंलिसें ल्वायेत ग्वाहालि मब्यू।’” 24 “केनी हेबेरया कलाः याएलयात सकल मिसात स्वयाः सुवाः लायेमा, पालय् च्वनिपिं सकल मिस्तय्त स्वयाः सुवाः लायेमा। 25 सीसरां लः फ्वन वं वयात बांलाःगु ख्वल्चाय् धौ बिल। 26 वं छपा ल्हातय् नकिं काल, मेगु ल्हातं मुगःचा ल्ह्वन, मुगलं वं सीसराया छेनय् छ्यात, सीसरायागु छ्यं तछ्यानाबिल। वं नकिं नं तानाः वयागु छ्यं पिचाय्काबिल। 27 सीसरा व मिसाया न्ह्यःने ग्वतुल, अले वयागु हे तुतिइ ग्वारातुल अन हे व सित।” 28 सीसराया मामं झ्यालं स्वयाच्वन, “छाय् सीसराया रथ वयेत लिबात?” तिकिझ्यालं वं न्यन, वया सलत वयेत छाय् थुलि लिबात? 29 वया मिस्त मध्ये बुद्धि दुम्ह छम्हय्सिनं वयात लिसः बी। धात्थें हे वया मामं नं थःम्हं थःत थथे धयाच्वनी, 30 “इपिं लाकाहःगु सामान माला च्वन जुइ व इना च्वन जुइ, छम्ह छम्ह मनूयात छम्ह छम्ह वा निम्ह निम्ह मिसामचा, सीसराया निंतिं लुतय् यानाहःगु रंगीचंगी कापः, बुत्ता भरय् यानातःगु रंगीचंगी कापः, जिगु गःपतय् हिनेत रंगीचंगी कापः।” 31 “हे परमप्रभु, थुकथं हे छि सकल शत्रुत नाश जुइमा। परमेश्वरयात माया याइपिं धाःसा थियाच्वंगु सूर्य थें जुइमा।” हाकनं देशय् पिइदँ तक शान्ति जुल। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.