न्यायकर्ता 12 - नेवाः बाइबलयिप्ता व एफ्राइम कुलयापिं 1 छुं ई लिपा एफ्राइमयापिं मनूतय्सं थः सेनायात मुंकल। अले खुसिया उखे वनाः सापोनय् इमिसं यिप्तायात धाल, “अम्मोनीतलिसें लडाइँ याःवनाबलय् जिमित छाय् सःता मदीयागु? जिमिसं छितः व छिगु छेँ छ्वयेकाबी।” 2 यिप्तां लिसः बिल, “जि व जिमि मनूतय् अम्मोनीतलिसें तःधंगु ल्वापु जुयाच्वंगु खः। अले जिं छिमित ग्वाहालिया निंतिं सःतागु खः अय्नं छिमिसं जिमित इमिगु ल्हातं बचय् मयाः। 3 छिमिसं जिमित ग्वाहालि बी मखु थें च्वन, उकिं जि थःगु ज्यान पानाः अम्मोनीतलिसें ल्वायेत वना। अले परमप्रभुं इमित जिगु ल्हातय् बियादिल। आः छु धकाः छिपिं थौं जिलिसें ल्वाः वयाच्वनागु?” 4 अले यिप्ता गिलादयापिं मनूतय्त मुंकाः एफ्राइमीतलिसें ल्वात। “अय् गिलादीत, छिपिं एफ्राइम व मनश्शेया लागाय् च्वनाच्वंगु जूसां छिपिं एफ्राइमपाखें बिस्युं वंपिं खः” धकाः एफ्राइमीतय्सं धाःगुलिं गिलादीतय्सं इमित हमला यात। 5 गिलादीतय्सं एफ्राइमपाखे वनेत यर्दन खुसि छीगु थाय्त त्याका काल। अले सुं बचय् जूम्ह एफ्राइमी वयाः “जितः खुसिया उखे वनेब्यु” धाःसा गिलादयापिं मनूतय्सं वयात “छु छ एफ्राइमी खः?” धकाः न्यनीगु। वं “मखु” धाल धाःसा 6 इमिसं “अथे जूसा ‘शिब्बोलेत’ धा” धकाः धाइगु। वं व खँग्वः बांलाक धाये मफयाः “सिब्बोलेत” धाल धाःसा इमिसं वयात ज्वनाः यर्दन छीगु थासय् स्याइगु। उबलय् एफ्राइमयापिं पिइनिद्वः मनूतय्त स्यात। 7 यिप्ता खुदँ तक इस्राएलयाम्ह न्ह्यलुवाः जुल। गिलादी यिप्ता सित, वयात गिलादया छगू शहरय् थुनाबिल। इब्सान, एलोन व अब्दोनयात न्यायकर्ता ल्ययादीगु 8 यिप्ता लिपा बेथलेहेमयाम्ह इब्सान इस्राएलयाम्ह न्ह्यलुवाः जुल। 9 वया स्विम्ह काय् व स्विम्ह म्ह्याय् दु। वं इपिं स्विम्ह म्ह्याय्पिन्त मेगु वंशयापिं मिजंतलिसें ब्याहा यानाबिल। अले थः काय्पिनिगु लागि मेगु वंशपाखें स्विम्ह भौपिं हल। व न्हय्दँ तक इस्राएलयाम्ह न्ह्यलुवाः जुल। 10 अले इब्सान सित। वयात बेथलेहेमय् थुनाबिल। 11 वया लिपा जबूलूनी एलोन झिदँ तक इस्राएलयाम्ह न्ह्यलुवाः जुल। 12 अले एलोन सित, वयात जबूलून देशया अय्यालोनय् थुनाबिल। 13 अनंलि पिरातोनी हिल्लेलया काय् अब्दोन इस्राएलयाम्ह न्ह्यलुवाः जुल। 14 वया गधा गया जुइपिं पिइम्ह काय् व स्विम्ह छय् दु, इपिं सकलें न्हयेम्ह गधा गया जुइपिं खः। अब्दोन च्यादँ तक इस्राएलयाम्ह न्ह्यलुवाः जुल। 15 अले हिल्लेलया काय् अब्दोन सित, वयात अमालेकीतय्गु पहाडी देशय् एफ्राइमया पिरातोनय् थुनाबिल। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.