यशैया 64 - नेवाः बाइबल

¹ छि आकाश चीकाः क्‍वहां झाःगु जूसा व पर्वतत छिगु न्‍ह्यःने थुरथुर खाःगु जूसा ज्‍यूगु।

² मिं झाःत च्‍या थें अले लः ग्‍वाराग्‍वारां दाय्‌कू थें, थः शत्रुतय्‌त थःगु शक्ति क्‍यनेत अले जाति– जातितय्‌त थरथर खाकेत छि क्‍वहां झासँ।

³ गुबलय् छिं तःधंगु ज्‍या यानादी, व जिमिसं मति हे तयागु मदु, अनंलि छि क्‍वहां झायादिल, अले पर्वतत छिगु न्‍ह्यःने थुरथुर खात।

⁴ थःगु लँ स्‍वइपिनिगु निंतिं ज्‍या यानादीम्‍ह छि थें ज्‍याःम्‍ह परमेश्‍वरयात संसारया शुरुंनिसें न न्‍हाय्‌पनं न्‍यंगु दु, न मिखां हे खंगु दु।

⁵ सु पाय्‌छिगु ज्‍या यायेत लय्‌ताइ अले सुनां छिगु लँयात लुमंकी, इमिगु निंतिं ग्‍वाहालि यायेत छि झायादी। तर जिमिसं छिगु विरोधय् पाप यानाच्‍वनागुलिं छि तंम्‍वयादिल। जिपिं गुकथं बचय् जुइ फइ धकाः?

⁶ जिपिं सकलें अशुद्ध मनूत थें जूगु दु, अले झीगु फुक्‍क धर्मया ज्‍या भ्‍वाथःगु कापः थें खः। जिपिं फुक्‍कं सिमाहः थें गनावनी अले जिमिगु पापं जिमित फसं थें पुइकायंकी।

⁷ छिगु नां काइपिं छम्‍ह नं मदु, छितः ज्‍वनेगु सुनानं कुतः याइ मखु, छाय्‌धाःसा छिं थःगु ख्‍वाः जिपिंपाखें सुपिकादीगु दु, अले जिमित जिमिगु पापया शक्तिइ त्‍वःतादीगु दु।

⁸ अय्‌नं हे परमप्रभु, छि जिमि अबु खः। जिपिं चा खः, अले छि धाःसा कुमाः खः। जिपिं छिगु हे ल्‍हाःया ज्‍यात खः।

⁹ हे परमप्रभु तसकं तंपिकयादी मते, जिमिगु पाप न्‍ह्याबलें लुमंकादी मते। बिन्‍ति याये, जिमित दया यानादिसँ, छाय्‌धाःसा जिपिं फुक्‍कं छिकपिनि हे प्रजा खः।

¹⁰ छिगु पवित्र शहरत मरुभूमि जूगु दु, सियोननापं मरुभूमि जूगु दु अले यरूशलेम नाश जूगु दु।

¹¹ जिमि पुर्खातय्‌सं छितः आराधना याइगु पवित्र व झःझः धाःगु देगः मिं नये धुंकूगु दु। झीसं तसकं मू वंगु ताय्‌कागु सम्‍पत्ति नाश जुइ धंकूगु दु।

¹² थुपिं फुक्‍क खँ जुइ धुंकाः हे परमप्रभु, छु छि लिज्‍यां झायादी ला? छु छि सुम्‍क च्‍वनाः जिमित दयेमाःगु स्‍वयाः अप्‍वः सजाँय बियादी ला?