यशैया 53 - नेवाः बाइबल1 झीगु बुखँय् सुनां विश्वास याःगु दु? परमप्रभुया बल्लाःगु ल्हाःया शक्ति सुयात क्यन? 2 व ला वय्कःया न्ह्यःने क्यातूगु मा थें व गंगु बं पिहां वःगु हा थें तःमा जुयावल। वयात स्वयेत झःझः मधाः अले बांलाः नं मजू। वयागु ख्वालय् झीत यःगु छुं नं मदु। 3 वयात मनूतय्सं हेला यानाः मयय्कल, व दुःखय् लाःम्ह मनू खः, वं दुःख बांलाक स्यू। व खनाः मनूतय्सं थःगु ख्वाः फहीकीगु। वयात हेला यात, झीसं वयात छुं मू वंम्ह मतायेका। 4 धात्थें वं झीगु ल्वय्त क्वबिल, अले झीगु कष्ट फयादिल, अय्नं झीसं वयात परमेश्वरं सजाँय ब्यूम्ह, व दुःखकष्टय् लाःम्ह तायेका। 5 तर वयात ला झीगु हे अपराधया निंतिं सुयाबिल। वयात झीगु अधर्मया निंतिं क्वत्यल। वं सजाँय फःगुलिं झीत सुख शान्ति दत। वं कोर्रा नःगुलिं झीपिं लन। 6 झीपिं फुक्कं फैत थें लँ तनाच्वंपिं खः। झीपिं फुक्क थःगु हे लँय् वनाच्वना, अले परमप्रभुं वयाके झीगु फुक्क अधर्म तयादीगु दु। 7 व क्वत्यका च्वनेमाल, वयात सास्ती जुल, अय्नं वं थःगु म्हुतुं छसः नं न्वमवाः। स्यायेत यंकूम्ह चीधिकःम्ह भ्याःचायात थें वयात यंकल, तँय चाइम्हय्सिगु न्ह्यःने फै सुम्क च्वंथें वं थःगु म्हुतुं छुं न्वमवाः। 8 तसकं सास्ती बियाः व दोपं बियाः वयात इमिसं यंकल। वयात जुइगु बारे सुनां ध्यान मब्यू। छाय्धाःसा वयात म्वाःपिनिगु देशं अलग तल, जिमि प्रजाया अपराधया निंतिं वयात दाल। 9 इमिसं वयागु चिहान दुष्ट मनूतय्गुनापं दय्कल, व सीबलय् तःमिपिंनापं हे थुन, खः ला, वं छुं ल्वापुख्यापु याःगु मदु, वयागु म्हुतुं मभिंगु व मखुगु खँ ल्हाःगु मदु। 10 वयात दुःखकष्ट सह याकेगु हे परमप्रभुया इच्छा खः, परमप्रभुं वयागु जीवनयात पलेसा बीगु बलिदान थें यानादीसां, वं थः सन्तानतय्त खनाः थःगु दिं ताहाकय्की। परमप्रभुया इच्छा कथं व ताःलाइ। 11 वं थःगु प्राणं तसकं सास्ती नये धुंकाः वं जीवनया जः खनी अले थः लुधनी। थःगु ज्ञानं यानाः जिमि धर्मीम्ह दासं यक्वसित धर्मी यानाबी, वं हे इमिगु अधर्म क्वबिइ। 12 अथे जुयाः जिं तःधंपिंनापं हे वयात नं छगू भाग बी, वं लाकाहःगु माल बल्लाःपिंनापं इनी। छाय्धाःसा वं थःगु जीवन पानाबिल, व पापीतनापं हे वयात ल्याः खात। वं यक्वसिगु पाप क्वबिल, व पापीतय्गु निंतिं स्वापु तइम्ह जुल। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.