यशैया 52 - नेवाः बाइबलपरमेश्वरं यरूशलेमया उद्धार यानादी 1 दँ, दँ, हे सियोन! छं बल व शक्तियात लं थें फ्यु! हे पवित्र शहर, यरूशलेम, थःगु महिमां जाःगु वसः फ्यु। थनिंनिसें म्हय् चिं मतःपिं व अशुद्धपिं छन्थाय् दुहां वइ मखु। 2 छंके दुगु धू थाथा या! हे यरूशलेम, दं अले सिंहासनय् फेतु, हे ज्वनायंकूपिं यरूशलेमयापिं मनूत, छंगु गःपतय् चिनातःगु त्वःतकाब्यु। 3 छाय्धाःसा परमप्रभुं थथे धयादी, “छिमित सित्तिकं मियाछ्वत अले धिबा मब्यूसे हे त्वःतकीतिनि।” 4 छाय्धाःसा परमप्रभु परमेश्वरं थथे धयादी, “न्हापा जिमि प्रजा मिश्र देशय् बाय् च्वंवन, अले अनंलि इमित अश्शूरीतय्सं क्वत्यलातल। 5 “आः जिगु थन छु हे दु धकाः?” परमप्रभुं घोषणा यानादी। “छाय्धाःसा जिमि प्रजायात सितिकं यंकल, अले इमित शासन याइपिन्सं इमित हेस्याइ,” परमप्रभुं घोषणा यानादी। “न्हिच्छि हे जिगु नांयात ब्वः बियाच्वनी। 6 अथे जुयाः जिमि प्रजां जिगु नां म्हस्यू। थुकथं इमिसं व दिंखुन्हु इपिं लिसे नवाम्ह जि हे खः धकाः म्हसी। खः, जि व हे खः।” 7 डाँडात जुयाः सुसमाचार न्यंकःवनीपिनिगु तुति गुलि बांलाः, गुपिन्सं शान्तिया घोषणा याइ, गुपिन्सं भिंगु बुखँ हइ, अले उद्धारयात घोषणा याइ, गुपिन्सं सियोनयात थथे धाइ, “छिमि परमेश्वरं राज्य यानादी।” 8 ध्यान बियाः न्यँ! छिमि पाः च्वनाच्वंपिं पालेत लसतां थथे छसलं हाला हइ। परमप्रभु सियोनय् झाइबलय्, इमिसं व थःगु हे मिखां खनी। 9 हे यरूशलेमया भज्यंक नाश जूगु थाय्त, लसतां छसलं म्ये हा, छाय्धाःसा परमप्रभुं थः प्रजायात सान्त्वना बियादीगु दु। वय्कलं मू पुलाः यरूशलेमयात त्वःतकादीगु दु। 10 फुक्क जातितय्त परमप्रभुं थःगु पवित्र ल्हाःया शक्ति क्यनादीगु दु। पृथ्वीया कुंकुलामय् च्वंपिन्सं नं झी परमेश्वरया उद्धार खनी। 11 हुँ, थनं हुँ, कैदं पिहां हुँ, छुं नं अशुद्धगु थलबल थी मते! हे परमप्रभुया थल ज्वनीपिं, अनं पिहां वा, अले थःत शुद्ध या! 12 अय्नं छिपिं हथाय् चाचां बिस्युं वनी मखु, छाय्धाःसा परमप्रभु छिमिगु न्ह्यः न्ह्यः झायादी, इस्राएलया परमेश्वरं छिमिगु ल्यूल्यू च्वनाः रक्षा यानादी। परमप्रभुया दास दुःख व गौरव 13 स्व, जिमि दास ताःलाइतिनि। वयात च्वछाइ, थकाइ अले वयात तसकं तःधंकी। 14 गथे व खनाः यक्व मनूत गजब जुल वयागु रूप म्हसीके हे मफय्क व वयागु रूप मनूया स्वयाः नं अप्वः स्यंगु खः, 15 तर आः यक्व जातित वयात खनाः वातां जुइ। वयागु कारणं जुजुपिं सुम्क च्वनी। छाय्धाःसा इमित धा हे मधाःगु खँ इमिसं खनी, इमिसं न्यँ हे मन्यंगु खँ इमिसं थुइकी। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.