यशैया 46 - नेवाः बाइबलबेबिलोनया द्यःत 1 बेल द्यः लज्या चायाः क्वछुइ, नेबो द्यः ग्यानाः भ्वसुली। कु क्वबिपिं पशुतय्सं इमिगु मूर्तित क्वबी। अले इमिसं क्वबियायंकूगु मूर्तित थाकूयाः तसकं झ्यातुगु कु थें जुइ। 2 द्यःत क्वछुइ अले नापं भ्वसुली। द्यःतय्सं थःत बचय् याये फइ मखु। इपिं द्यःतय्त कब्जा यानाः यंकी। 3 परमप्रभुं धयादी, “हे याकूबया घराना न्यँ! इस्राएलया घरानाय् बचय्जूपिं सकसिनं न्हाय्पं ब्यु! छिपिं बूसांनिसें जिं छिमित सुसाःकुसाः यानागु दु। 4 छिपिं बुरा जुयाः सं तुयुसे च्वनीबलय् तक छिमित सुसाःकुसाः याइम्ह जि व हे खः। जिं छिमित दय्कागु खः अथे जुयाः जिं छन्त क्वबी। जिं छिमित तिबः बी अले बचय् याये। 5 “छिमिसं जितः सुनापं दाँजय् यायेगु? जि ति ग्यंम्ह सु दु? 6 मनूतय्सं थःगु म्हिचात चाय्काः लुँ प्वंकी, अले वहः ताल्जुइ लनी। इमिसं कारिगरयात ज्याला बियाः द्यःतय्गु मूर्ति दय्केबी। अले इपिं उकिया न्ह्यःने क्वछुनाः भागि याइ अले उकियात पुजा याइ। 7 इमिसं उकियात ब्वहलय् तयाः क्वबिया जुइ, अले उकियात तयेमाःगु थासय् तइ, अले व धस्वानाच्वनी। व थासं व थः हे थुखे उखे न्ह्यानावने फइ मखु। सुं मनूत न्ह्यःने वयाः तसलं हाला ग्वाहालि फ्वंसां वं लिसः बी फइ मखु, अले वयागु दुःखकष्टपाखें वं बचय् याये फइ मखु।” परमप्रभु छम्ह जक परमेश्वर 8 “हे विद्रोही मनूत, थ्व खँयात लुमंकी, उकियात मनय् पक्का या अले नुगलय् तयाति”। 9 न्हापाया पुलांगु खँयात लुमंकी। जि परमेश्वर खः, जि बाहेक मेपिं सुं मदु। जि परमेश्वर खः, जि थें ज्याःम्ह मेपिं सुं मदु। 10 शुरुंनिसें अन्त तक, व न्हापा पुर्खातय्गु इलंनिसें आः जू वइगु ई तकया खँ जिं छिमित सीकेबी। जिं धाये, जिगु योजना दया हे च्वनी जिं थःत यःकथं याये। 11 पुर्बं हमला याइम्ह पंक्षी सःते अले ताताःपाःगु देशं जिगु इच्छा पूवंकेगु निंतिं जिं छम्ह मनूयात सःते। जिं छु धयागु दु व जिं पूवंके। जिं छु योजना दय्कागु दु व जिं पूवंके। 12 हे छाःगु नुगः दुपिं व धार्मिकतापाखें तापाःपिं, जिगु खँयात न्यँ! 13 जिं थःगु धार्मिकता लिक्क हयाच्वनागु दु। व तामपाः, छिमिगु लिक्क हे दु। जिगु उद्धारं लिबाकी मखु। जिं सियोनयात उद्धार बी, अले इस्राएलयात जिगु महिमा क्यने। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.