यशैया 24 - नेवाः बाइबलपरमप्रभुं पृथ्वीइया विनाश याःगु 1 स्व, परमप्रभुं पृथ्वीयात झिजांमिजां यानादी। वय्कलं उकियात नाश यानादी, वय्कलं पृथ्वीया सतहयात तहसनहस यानादी, अन च्वंपिं मनूतय्त छ्यालब्याल यानादी। 2 पुजाहारी व प्रजा, मालिक व च्यः, न्याइपिं व मिइपिं, त्यासा काइपिं व त्यासा बिइपिं, तःमिपिं व मगाःमचाःपिं फुक्कसिगु दशा अथे हे जुइ। 3 पृथ्वी फुक्क नाश जुयावनी अले फुक्क थासय् लुतय् यायेगु याइ, परमप्रभुं हे थ्व खँ धयादीगु खः। 4 पृथ्वीइ गनाः सुकूचिनी, संसार कमजोर जुइ अले सुकूचिनी, पृथ्वीयापिं ततःधंपिं मनूत बःमलानावनि। 5 परमेश्वरया नियम अले वय्कलं सदांया निंतिं चिनादीगु बाचा त्वथुलाः मनूतय्सं पृथ्वीयात अशुद्ध याःगु दु। 6 अथे जुयाः छगू सरापं पृथ्वीयात भस्म याइ। अले अन दुपिं मनूतय्सं थःम्हं याःगु दोषया सजाँय फयेमाः। अथे जुयाः पृथ्वी च्वंपिं मनूतय्त मिं छ्वय्काछ्वइ। थुकथं म्हो जक मनूत बचय् जुइ। 7 दाखमा गनावनी अले न्हूगु दाखमद्य सुनावनी। छगू इलय् लसता हंपिन्सं आः नुगः मछिंकेगु याइ। 8 इमिगु दम्फु व वीणाया लसतां जाःगु संगीत दी धुंकूगु दु। न्ह्यइपुकेगु म्ये हालीपिनिगु सः दीगु दु। 9 सुनानं दाखमद्य त्वनाः लसतां म्ये हाली मखु, भिंगु अय्ला धकाः त्वंपिन्त खाइसे च्वने धुंकल। 10 नाश जूगु शहर छ्यालब्याल जुइ धुंकल। रक्षाया निंतिं मनूत फुक्कसिनं थथःपिनिगु छेँया खापा तिनाच्वंगु दु। 11 दाखमद्य काये मखंगुलिं मनूत लँय् हाःहू यानाच्वनी। लसता सदांया निंतिं मदयावन, देशं व तनावन। 12 शहर नाश जूगु दु, उकिया मू ध्वाखात दुना वनाः नाश जूगु दु। 13 बाली लयेगु इलय् फुक्क फल हायेकाः जैतूनया सिमा व दाखमा खालि जुयाः भचा जक फल ल्यं दु थें जाति जातितय्गु दशा नं अथे हे जुइ। 14 बचय्जूपिं लसतां म्ये हालाच्वनी। पच्छिमय् च्वनीपिन्सं परमप्रभुया तःधंगु महिमाया जयजय याइ! 15 अथे जुयाः पुर्बय् च्वनीपिन्सं परमप्रभुया प्रशंसा या! समुद्रया सिथय् च्वनीपिन्सं परमप्रभु इस्राएलया परमेश्वरया नांया प्रशंसा या! 16 पृथ्वीइ तापाक्क च्वंपिन्सं “धर्मीम्ह प्रभुया महिमा” धकाः हाःगु सः ताये दइ। तर जितः धाःसा छुं नं आशा मदु, जि गना वनाच्वंगु दु। धिक्कार जितः! बेइमानपिन्सं विश्वासघात याइ! बेइमानपिन्सं धोखा बियाः हे विश्वासघात यानाच्वनी! 17 अय् पृथ्वीइ च्वंपिं फुक्क मनूत! छिमित आतंक, गाः व स्वःतिपाँचं नं पिया च्वनाच्वंगु दु। 18 सु ग्यानाः बिस्युं वनी, व गालय् लाइ। सु गालं थाहां वइ व स्वःतिपाँय्लय् तक्यनी। स्वर्गया झ्याः चाइ अले पृथ्वीया जग तसकं सनी। 19 पृथ्वी चिरिबाइ अले चिरिबायाः निगू ब्वः जुइ। पृथ्वी तसकं सनी। 20 पृथ्वी अय्लाःगुलुत लँय् धेधेचुयाः जू थें व ग्वःफय् वयाः बल्चायात संकूगु थें सनी। अले थःपिन्सं यानागु विद्रोहया दोष वयात तःधंगु झ्यातुगु ल्ह्वने हे मफुगु कु थें जूगु दु गुकिं यानाः व गुबलें दने मफय्क क्वदःगु दु। 21 व दिंखुन्हु, परमप्रभुं आकाशया शक्तियात व पृथ्वीया जुजुतय्त सजाँय बियादी। 22 परमेश्वरं जुजुतय्त कैदीतय्त थें गालय् तयादी। इमिगु सजाँयया ई मवतले वय्कलं इमित झ्यालखानाय् यक्व दिं तक कुना तयादी। 23 तिमिला खिउँसे च्वनी अले सूर्यया जः तनावनी छाय्धाःसा दक्व शक्ति दुम्ह परमप्रभुं सियोन पर्वत च्वं यरूशलेमय् शासन यानादी अले मनूतय् नायःतय्सं वय्कःया महिमा खनी। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.