यशैया 11 - नेवाः बाइबलयिशैपाखें पिहां वःगु कचा 1 यिशैया परिवारया थुथां छपु चुलि ह्वइ, अले उकिया हां पिहां वःगु न्हूगु कचां फल सय्की। 2 परमप्रभुया आत्मा वयाके वइ – बुद्धि व दुग्यांया आत्मा, सल्लाह व शक्तिया आत्मा, ज्ञान व परमप्रभुया भयया आत्मा। 3 अले परमप्रभुया भयलय् हे वय्कः तसकं लय्तायाच्वनी। वय्कलं मिखां खनेवं हे न्याय यानादी मखु, न्हाय्पनं तायेवं हे जक क्वःछिनादी मखु। 4 अय्नं वं मगाःमचाःपिनिगु न्याय धार्मिकतां यानादी, अले पृथ्वी च्वंपिं गरीबतय्गु न्याय निसाफ यानादी। थःगु वचनया शक्तिं पृथ्वीयात दायादी। अले थःगु म्हुतुया सासलं दुष्टतय्त नाश यानादी। 5 वय्कःया जँनी धार्मिकतायागु जुइ, अले वय्कःया जँय् च्वंगु जँनी विश्वासयागु जुइ। 6 गुँखिचा धाःसा चीधिकःम्ह भ्याःचानापं च्वनी अले चितुवा दुगुचानापं द्यनी। साचा, सिंह व दच्छि दुम्ह पशु छथाय् हे च्वनी। अले छम्ह चीधिकःम्ह मचां इपिं सकसित न्ह्यलुवाः जुयाः यंकी। 7 सा व भालू छथाय् हे जइगु जुइ अले इमि मचात छथाय् हे मुनाः ग्वार्तुलाच्वन। अले सिंहनं द्वहंतय्सं थें सु नइ। 8 दुरुत्वंम्ह मचा गोमन सर्पया प्वाः लिक्क म्हिताच्वनी, अले नकतिनि दुरुं वाःम्ह मचां तसकं बिख दुम्ह सर्पया प्वालय् थःगु ल्हाः दुछ्वइ। 9 इमिसं जिगु फुक्क पवित्र पर्वतय् छुं नं स्यंके फइ मखु, अले छुं मभिंगु खँ नं अन दइ मखु, छाय्धाःसा समुद्र लखं जाः थें पृथ्वी परमप्रभुया ज्ञानं जाइ। ज्वनायंकूपिन्त हाकनं लित हइतिनि 10 अले उखुन्हु मनूतय्गु निंतिं यिशैया हाया सन्तान छम्ह झण्डा थें दनी। जाति जातित फुक्क वय्कःयाथाय् मूंवइ, अले वय्कः छम्ह महिमां जाःगु आराम कायेगु थाय् जुइ। 11 उखुन्हु परमप्रभुं अश्शूर, क्वय् व च्वय् मिश्र, कूश, एलाम, बेबिलोनिया, हमात व समुद्रया टापुतपाखें थः प्रजाया ल्यंदुपिन्त त्वःतकेत निक्वः खुसि थःगु ल्हाः हाकनं ल्ह्वनादी। 12 वय्कलं जाति-जातितय्गु निंतिं छगू चिंया झण्डा धस्वाकादी अले त्वःतकाहःपिं इस्राएलया मनूत व छ्यालब्याल जुयाच्वंपिं यहूदाया मनूतय्त पृथ्वीया कूंकुलामं मुंकाः छथाय् हयादी। 13 एफ्राइमया दाहा मदयावनी अले यहूदाया शत्रुत नाश जुयावनी। एफ्राइमं यहूदालिसें दाहा याइ मखु, अले यहूदा एफ्राइमया शत्रु जुइ मखु। 14 इपिं पच्छिमपाखे पलिश्त देशया पहाडय् स्वात्त क्वहांवनि। इपिं मिलय् जुयाः पुर्बया मनूतय्त लुतय् याइ। इमिसं एदोम व मोआबय् ल्हाः तइ अले अम्मोनीत इमिगु अधीनय् वइ। 15 मिश्र देशया समुद्रया गाःयात परमप्रभुं गंकाबी, वय्कलं यूफ्रेटिस खुसिइ क्वाःगु फय्नापं थःगु ल्हाः संकादी, अले उकियात चिचीधंगु न्हय्गू खुसिइ ब्वथलादी। अले अनं न्ह्याम्ह मनूत नं न्यासि वनाः पुलावने फइ। 16 मिश्र देशं पितहःबलय् इस्राएलया पुर्खातय्गु निंतिं जू थें अश्शूरीतपाखें बचय्जूपिं इस्राएलया सन्तानतय्गु निंतिं नं वयेत थ्व छपु मू लँ जुइ। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.