होशे 8 - नेवाः बाइबल

इस्राएलं ग्‍वःफय् मुंगु

¹ “तुरही पु! छम्‍ह इमा परमप्रभुया देगलय् च्‍वय् ब्‍वयाच्‍वंगु दु, छाय्‌धाःसा मनूतय्‌सं जिगु बाचा त्‍वथूगु दु, अले जिगु व्‍यवस्‍थाया विरोधय् विद्रोही जूगु दु।

² इस्राएलं जितः इनाप याइ, ‘हे जिमि परमेश्‍वर, जिपिं इस्राएलीतय्‌सं छितः म्‍हस्‍यू।’

³ तर छु बांलाः व इस्राएलं इन्‍कार याःगु दु। छम्‍ह शत्रुं वयात लिनाछ्वइ।

⁴ इमिसं जितः न्‍यं हे मन्‍यंसे जुजुत ल्‍यल, इमिसं जितः न्‍यं हे मन्‍यंसे भारदारत ल्‍यल। इमिसं थःगु हे नाशया निंतिं थःगु लुँ व वहलं थःगु निंतिं मूर्ति दय्‌की।

⁵ अय् सामरिया! छंगु द्वहंचाया मूर्ति वान्‍छ्‌वया ब्‍यु। जिगु तं इमिगु विरोधय् च्‍यानाच्‍वंगु दु। इपिं गुबलें शुद्ध जुइ मफुपिं जुयाच्‍वनी?

⁶ इपिं इस्राएलीत खः। थ्‍व द्वहंचा कारीगरतय्‌सं दय्‌कूगु खः। व ला परमेश्‍वर मखु। सामरियायाम्‍ह व द्वहंचायात कुचा कुचा याइगु जुइ।

⁷ “इमिसं फय् ह्वली अले ग्‍वःफय् मुंकी। दंचाय् छुं नं बाला सइ मखु, उकियागु बालिं छ्वचुं दइ मखु। छुं दत धाःसां विदेशीतय्‌सं व नयाबी।

⁸ इस्राएलयात नुनाछ्वल, व जात-जातियापिं मनूतय्‌गु दथुइ ज्‍यागलय् मजूगु थल थें जुल।

⁹ गुँगधा याकःचा थुखे उखे वना जूगु थें इपिं अश्‍शूरय् वन। एफ्राइमं ज्‍याला कयाः थः प्रेमीतनापं थःत मियाछ्वःगु दु।

¹⁰ इमिसं थःत जात जातितय्‌त मिया छ्वःसां आः जिं इमित छथाय् मुंके। तःधंगु शक्ति दुम्‍ह जुजुं दुःखकष्‍ट ब्‍यूगुलिं इमिगु बल मदयावनी।

¹¹ “एफ्राइमं शुद्ध जुइगु बलिया वेदीत यक्‍व दय्‌कल। उपिं वेदीत हे वयागु निंतिं पाप याइगु वेदीत जूगु दु।

¹² जिं इमिगु निंतिं यक्‍व विधित जिगु व्‍यवस्‍थाय् च्‍वया, तर इमिसं उपिं विधियात मेपिनिगु चिज थें ताय्‌कल।

¹³ इमिसं जितः बलि छाइ, अले व ला नइ, तर परमप्रभु इपिंनापं लय्‌तायामदी। आः जिं इमिगु दुष्‍ट ज्‍या लुमंकाः इमिगु पापया निंतिं सजाँय बी। इपिं मिश्र देशय् लिहांवनी।

¹⁴ इस्राएलया मनूतय्‌सं थःत दय्‌कादीम्‍ह सृष्‍टिकर्ता परमेश्‍वरयात ल्‍वमंकाः ततःखागु छेँ दय्‌कल, यहूदाया मनूतय्‌सं यक्‍व शहरय् किल्‍लात दय्‌कल। तर जिं इमिगु शहरय् मि तयाबी, अले उकिं वया किल्‍लायात भस्‍म यानाबी।”