होशे 1 - नेवाः बाइबल

होशेया कलाः व काय्‌म्‍ह्याय्‌पिं

¹ यहूदाया जुजुपिं उज्‍जियाह, योताम, आहाज व हिजकिया अले येहोआशया काय् इस्राएलया जुजु यारोबामं राज्‍य यानाच्‍वंबलय् परमप्रभुया वचन बेरीया काय् होशेयाथाय् वल।

² परमप्रभुं होशेपाखें दकलय् न्‍हापा नवानादीबलय्, परमप्रभुं होशेयात धयादिल, “हुँ, वनाः छम्‍ह वेश्‍यालिसें ब्‍याहा या। वयागु वेश्‍या ज्‍यां बूम्‍ह सन्‍तानयात थः नाला का, छाय्‌धाःसा इस्राएलं परमप्रभुया ल्‍यू वनेगु त्‍वःताः वेश्‍यायागु थें यक्‍व ज्‍या याःगु दु।”

³ अथे जुयाः वं वनाः दिब्‍लैमया म्‍ह्याय् गोमेरयात ब्‍याहा यात। अले व प्‍वाथय् दयाः वपाखें छम्‍ह काय्‌मचा बुइकल।

⁴ अले परमप्रभुं होशेयात धयादिल, “वयागु नां यिजरेल ति, छाय्‌धाःसा जिं याकनं हे येहूया घरानायात यिजरेलय् जूगु हत्‍याया सजाँय बी। इस्राएलया राज्‍य अन्‍त यानाबी।

⁵ उबलय् जिं इस्राएलया सिपाइँतय्‌गु शक्तियात यिजरेलया ब्‍यासिइ नाशयानाबी।”

⁶ गोमेरया हाकनं प्‍वाथय् दत अले वं छम्‍ह म्‍ह्याय् बुइकल। अले परमप्रभुं होशेयात धयादिल, “वयागु नां लो-रूहामा ति, छाय्‌धाःसा इस्राएलया घरानायात हाकनं जिं गुबलें दया यानाः क्षमा बी मखुत।

⁷ अय्‌नं जिं यहूदाया घरानायात माया याये। इमिगु उद्वार धनुष, तरवार, लडाइँ व सलगइपिंपाखें मखु, तर परमप्रभु इमि परमेश्‍वरपाखें याये।”

⁸ गोमेरं म्‍ह्याय्‌यात दुरु त्‍वंकेगु दिके धुंकाः वया हाकनं प्‍वाथय् दत अले मेम्‍ह काय् बुइकल।

⁹ परमप्रभुं होशेयात धयादिल, “वयागु नां लो-अम्‍मी ति, छाय्‌धाःसा इस्राएली मनूत जिगु प्रजा मखु अले जि इमि परमेश्‍वर मखु।”

¹⁰ “अथे जूसां इस्राएलीतय्‌गु ल्‍याः समुद्रया सिथय् च्‍वंगु फि थें जुइ, सुयात न नापय् याये फइ, न ल्‍याः खाये फइ। गन इमित थथे धाःगु खः, ‘छिपिं जिमि प्रजा मखु,’ अन इमित थथे धकाः धाइ, ‘छिपिं म्‍वाःम्‍ह परमेश्‍वरया सन्‍तान खः।’

¹¹ यहूदा व इस्राएलया मनूत मिले जुइ। अले इमिसं थःगु निंतिं छम्‍ह नायः ल्‍यइ, अले इपिं कैदी जुयाच्‍वंगु थासं लिहां वइ। धात्‍थें हे यिजरेलया व दिं छगू तःधंगु दिं जुइ।