हिब्रू 3 - नेवाः बाइबल

मोशा स्‍वयाः येशू तःधं

¹ यःपिं दाजुकिजापिं, छिमित हे खः, परमेश्‍वरं सःतादीगु। झीसं विश्‍वास यानाच्‍वनाम्‍ह येशूयात हे परमेश्‍वरं छ्वयाहयाः दकलय् तःधंम्‍ह पुजाहारी यानादिल। वय्‌कःयाके थःगु मन तया च्‍वँ।

² परमेश्‍वरयागु ज्‍याय् मोशा विश्‍वास याये बहःम्‍ह जू थें, येशू नं परमेश्‍वरं याके हयादीगु ज्‍याय् विश्‍वास याये बहःम्‍ह जुयादिल।

³ छेँ स्‍वयाः छेँ दय्‌कूम्‍हय्‌सिया इज्‍जत तःधं जुइ। अथे हे मोशा स्‍वयाः येशू यक्‍व अप्‍वः इज्‍जत याये बहःम्‍ह जुयादिल।

⁴ फुक्‍क छेँ मनूतय्‌सं हे दय्‌कूगु खः। अय्‌नं दक्‍व फुक्‍कं दय्‌कादीम्‍ह ला परमेश्‍वर हे खः।

⁵ परमेश्‍वरयागु छेँय् मोशा विश्‍वास याये बहःम्‍ह च्‍यः थें जुल। अले परमेश्‍वरं लिपा धयादीगु खँयागु साक्षी वं हे बियावन।

⁶ ख्रीष्‍ट धाःसा परमेश्‍वरयागु छेँय् अधिकार दुम्‍ह काय् थें विश्‍वास याये बहःम्‍ह जुयादिल। झीसं आशा याना थें उत्‍थें साहस व भरोसा तयाच्‍वन धाःसा झीपिं हे परमेश्‍वरया छेँ जुइ।

विश्‍वास यायेगु त्‍वःताछ्वये मते

⁷ पवित्र आत्‍मां थथे धयादीगु दु – “थौं छिमिसं परमेश्‍वरयागु सः ताल धाःसा,

⁸ छिमि तापाःबाज्‍यापिन्‍सं थें छिमिसं वय्‌कःयात मभिंकाः थःगु नुगः छाके मते। मरुभूमिइ इमिसं वय्‌कःयागु मन स्‍वल।

⁹ जिं पिइदँ पिइदँ तक ततःधंगु अजू चायापुगु ज्‍या याःगु खंक खंक नं छिमि तापाःबाज्‍यापिन्‍सं मरुभूमिइ जिगु मन स्‍वल।

¹⁰ अय्‌जूगुलिं तंम्‍वय्‌काः जिं इमित थथे धया – ‘छिमिगु मन थाःगाः दइ मखु, छिमिसं जिगु लँपु मसिल।’

¹¹ अय्‌जूगुलिं जिं तमं पाफयाः थथे धया – ‘छिमिसं गुबलें नं जिं बीगु आराम काये खनी मखु।’”

¹² यःपिं दाजुकिजापिं, होश‍ यानाच्‍वँ। छिपिं सुं नं म्‍वाःम्‍ह परमेश्‍वरयात त्‍वःताः विश्‍वास मयाइपिं व जिद्दी जूपिं जुइ मते।

¹³ “थौं” धयागु ई दतले छिमिसं थःथवय् साहस बीगु याना च्‍वँ। मखुसा पापं यानाः छिमिगु नुगः तसकं छाइ।

¹⁴ झीसं न्‍हापांनिसें लिपा तकं विश्‍वास थातं तयाच्‍वने फुसा झीपिं ख्रीष्‍टनापं च्‍वने दइ।

¹⁵ थथे धयातःगु हे दु – “थौं छिमिसं परमेश्‍वरयागु सः ताल धाःसा छिमि तापाःबाज्‍यापिन्‍सं थें छिमिसं वय्‌कःयात मभिंकाः थःगु नुगः छाके मते।”

¹⁶ सुनां परमेश्‍वरयागु सः तायाः नं वय्‌कःयात हे मभिंकल? मोशां मिश्र देशं लिगनाहःपिं मनूत हे, मखु ला?

¹⁷ सु नाप परमेश्‍वर पिइदँ तक तंम्‍वय्‌कादिल? पाप यानाः मरुभूमिइ सिनावंपिं नाप हे, मखु ला?

¹⁸ थथे खँ मन्‍यंपिन्‍त हे परमेश्‍वरं “छिमिसं जिं बीगु आराम कायेखनी मखु” धकाः पाफयादीगु, मखु ला?

¹⁹ परमेश्‍वरयात विश्‍वास मयाःगुलिं हे इपिं वय्‌कलं इमित बी धयादीगु देशय् दुहां वने मखंगु खः।