उत्पत्ति 40 - नेवाः बाइबलफारोया च्यःतय् म्हगस 1 छुं ई लिपा फारोया दाखमद्य त्वंकीम्ह नायः व मरि छुइम्ह नायलं थः मालिकया विरोधय् मभिंगु ज्या यात। 2 फारो इपिं निम्ह खनाः तसकं तंम्वल। 3 अले वं इमित पिवाःतय् कप्तानया छेँय् दुगु झ्यालखानाय् कुनाबिल। योसेफयात नं अन हे कुनातःगु खः। 4 पिवाःतय् कप्तानं इमित योसेफया जिम्माय् तयाबिल। छुं ई लिपा झ्यालखानाय् च्वना च्वंबलय् हे 5 इपिं निम्हय्सिनं नं थीथी अर्थ दुगु म्हगस खन। 6 सुथय् योसेफ अन वःबलय् इपिं भुगुलुं च्वनाच्वंगु खन। 7 उकिं वं इमिके न्यन, “थौं छिकपिं छाय् भुगुलुं च्वनाच्वनागु?” 8 इमिसं धाल, “जिपिं निम्हय्सिनं नं म्हगसय् खना। उकिया अर्थ कनिपिं धाःसा थन सुं हे मदु।” अले योसेफं इमित धाल, “फुक्क म्हगसया अर्थ परमेश्वरयाके मदु ला? जितः छिकपिनिगु म्हगसया खँ कनादिसँ।” 9 अले दाखमद्य त्वंकीपिनि नायलं थःगु म्हगसया खँ योसेफयात थुकथं कन, “जिं म्हगसय् जिगु न्ह्यःने दाखमा छमा खना। 10 व दाखमाय् स्वकचा दु। उकी बुँ ह्वयेवं स्वां नं ह्वयावल, अले ज्वाँय्ज्वाँय् दाख सयाः पाकय् नं जुल। 11 जिगु ल्हातिइ फारोया ख्वला दु, जिं दाख तिस्सिनाः व ख्वलाय् तयाः फारोयाथाय् यंकाः बिया।” 12 योसेफं वयात धाल, “छिं म्हगसय् खंगु स्वकचाया अर्थ स्वन्हु खः। 13 स्वन्हुया दुने हे फारों छितः छिगु ज्या लित बियाः छिगु छ्यं धस्वाकाबी। अले न्हापा याना थें छिं फारोया ख्वला वय्कःया ल्हातिइ तयादी खनी। 14 छिगु भिं जुइ धुंकाः धाःसा छिं जितः लुमंकादिसँ। फारोयात जिगु खँ बिन्ति यानाः जितः थ्व झ्यालखानां पिकयादिसँ। 15 छाय्धाःसा धात्थें धायेमाल धाःसा जितः हिब्रूतय्गु देशं खुयाहःगु खः। अले जिं थन झ्यालखानाय् लाइगु ज्या नं छुं यानागु मदु।” 16 योसेफं म्हगसया अर्थ भिंगु कथं कंगुलिं मरि छुइम्ह नायलं नं वयात धाल, “जिं नं म्हगस छगू खनागु दु। म्हगसय् जिं मरि दुगु स्वंगः धकि छेनय् क्वबिया तयागु दु। 17 दक्वसिबय् च्वय्यागु धकिइ फारोया लागि थीथी कथंया मरिचरि दु। झंगःपंक्षीतय्सं वयाः जिगु छ्यं च्वय्च्वंगु धकिइ मरि नयाच्वन।” 18 योसेफं धाल, “थुकिया अर्थ खः, ‘स्वंगः धकि धयागु स्वन्हु खः। 19 स्वन्हुया दुने हे फारों छिगु छ्यं ध्यनाबी, अले छितः थामय् यख्खाइ। झंगःपंक्षीतय्सं छिगु ला त्वाथं क्वात्तु क्वानाः नइ।’” 20 स्वन्हु खुन्हु फारो बूगु दिं खः। उखुन्हु थःथाय् ज्या याइपिं फुक्क हाकिमतय्त भ्वय् सःतल। उपिं फुक्कसिया न्ह्यःने वं दाखमद्य त्वंकीम्ह नायः व मरि छुइम्ह नायःयात थने हल। 21 दाखमद्य त्वंकीम्ह नायःयात वयागु ज्याय् हाकनं तल, 22 मरि छुइम्ह नायःयात धाःसा यख्खानाः स्यात। थ्व फुक्क योसेफं धाःथें जुल। 23 दाखमद्य त्वंकीम्ह नायलं धाःसा योसेफयात लुममंकू। वं वयात ल्वःमंकल। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.