एज्रा 10 - नेवाः बाइबलमनूतय्सं पाप मानय् याःगु 1 एज्रा परमेश्वरया देगःया न्ह्यःने बँय् भ्वसुलाः ख्वख्वं पाप मानय् यानाः प्रार्थना यानाच्वंबलय् हे ग्वाः ग्वाः इस्राएली मिजं, मिसा व मस्त वयागु प्यखें मुन। इपिं नं ह्वाँय्ह्वाँय् ख्वल। 2 अनं लिपा एलामया परिवारयाम्ह यहीएलया काय् शकन्याहं एज्रायात धाल, “झीसं थ्व देशयापिं मेगु जातियापिं मिस्त ब्याहा यानाः थः परमेश्वरया आज्ञा पालन मयानागु दु, अय्नं इस्राएलया निंतिं अज्ज नं छुं आशा दनि। 3 अथे जुयाः आः झीसं झी प्रभुयागु व थः परमेश्वरयागु आज्ञा मानय् याइपिनिगु सल्लाहकथं थज्याःपिं सकलें मिस्त व इमि मस्ततय्त त्वःतेत परमेश्वरया न्ह्यःने छगू बाचा चीनु। अले व्यवस्थाकथं ज्या यायेनु। 4 छि दनादिसँ, छाय्धाःसा थ्व खँ छिगु हे ल्हातय् दु, जिपिं छिनापं दु, मग्यासे थ्व ज्या यानादिसँ।” 5 थथें हे एज्रां मू पुजाहारीत, लेवीत व सकल इस्राएलीतय्त शकन्याहं धाःथें ज्या याये धकाः पाफय्कल। अले इमिसं पाफल। 6 अनं लिपा एज्रा परमेश्वरयागु देगःया न्ह्यःनं एल्यासीबया काय् येहोहानानया कोथाय् वन। अन च्वंतले एज्रां छुं नं मनः, लः नं मत्वं, छाय्धाःसा बेबिलोनं लिहां वःपिनिगु अपराधं यानाः वया नुगः ख्वः। 7 अनंलि बेबिलोनं लिहांवःपिं सकल मनूत यरूशलेमय् मुनेत यहूदा व यरूशलेम न्यंक खबर छ्वल। 8 स्वन्हुया दुने सुं वइ मखु हाकिमत व न्याय याइपिनिगु फैसला कथं वयागु फुक्क धन-सम्पत्ति जफत जुइ, अले वं थःम्हं थःत बेबिलोनं लिहां वःपिनिगु सभां पितिनाछ्वइ धकाः नं नायःतय्सं आज्ञा बिल। 9 स्वन्हुया दुने, गुंगूगु लाया निइन्हुखुन्हु यहूदा व बेन्यामीनया सकलें मनूत यरूशलेमय् मुन। सकलें मनूत थ्व तःधंगु घटनां यानाः दुखी जुयाः अले तसकं वा वयाः चिकुसे च्वंगुलिं थुरथुर खानाः परमप्रभुया देगःया न्ह्यःने चुकय् च्वनाच्वन। 10 अले पुजाहारी एज्रां दनाः इमित धाल, “छिमिसं विदेशी मिस्तलिसें ब्याहा यानाः अपराध याःगु दु, अले थुकिं यानाः इस्राएलया दोष अप्वः जूगु दु। 11 उकिं आः थः पुर्खाया परमप्रभु झी परमेश्वरया न्ह्यःने थथःगु पाप मानय् या। वय्कःया इच्छा पूवंकि अले विदेशी मनूतपाखें व छिमि विदेशी कलाःपाखें छिपिं ब्यागलं च्वँ।” 12 अले सभाय् मूंपिं सकल मनूतय्सं तःसलं लिसः बिल, “छिं गथे धयादिल, जिमिसं अथे हे याये। 13 अय्नं थन यक्व मनूत दु। अले वा वयाच्वंगु दु, उकिं जिपिं पिने दनाच्वने फइ मखु। थ्व ज्या छन्हुनिन्हुं सिधइ मखु, छाय्धाःसा थ्व खँय् जिपिं मध्ये यक्वसिनं पाप यानागु दु। 14 झी हाकिमतय्सं सकल मनूतय्गु लागि ज्या यानाबीमाः। परमेश्वरया तं क्वमलाःतले व थ्व ज्या सिमधःतले झीगु शहरय् ग्वःम्हसिनं विदेशी मिसा ब्याहा याःगु दु, इपिं क्वःछिनातःगु इलय् थःगु शहरयापिं थकालित व न्याय याइपिंलिसें वयेगु यायेमाः।” 15 असाहेलया काय् जोनाथन व तिक्भाया काय् याजयाहं जक मशुल्लाम व लेवी सब्बतैया पंलिनाः थुकियागु विरोध यात। 16 अय्नं ज्वनायंकाः लितः छ्वयाहःपिन्सं अथे हे यात – पुजाहारी एज्रां परिवार परिवारयापिं मू मू मनूत ल्यल। वं छगू छगू परिवार पुचलं छम्ह छम्ह मनू ल्यल। छम्ह छम्ह मनूयात नां काकां ल्यःगु खः। अले झिगूगु लाया न्हापांगु दिनंनिसें इमिसं थ्व खँया बारे गय् गथे खः धकाः स्वयेगु ज्या शुरु यात। 17 अले न्हापांगु लाया न्हापांगु दिं तक इमिसं विदेशी मिस्त ब्याहा याःपिं मिजंतय्गु बारे गय् गथे खः धकाः स्वयेगु ज्या सिधय्कल। विदेशी मिस्तलिसें ब्याहा याःपिनिगु नां धलः- 18 विदेशी मिस्त ब्याहा याःपिं पुजाहारी परिवारं – योसादाकया काय् येशूअ व वया दाजुकिजापिनि परिवारं – मासेयाह, एजीएजर, यारीब व गदल्याह खः। 19 इमिसं थःथः कलाः त्वःतेगु बचं बिल, अले इमिसं दोषबलिकथं थथःगु बथानं छम्ह छम्ह भ्याःचा नं हल। 20 इम्मेरया परिवारं – हनानी व जबदियाह। 21 हारीमया परिवारं – मासेयाह, एलिया, शमायाह, यहीएल व उज्जियाह। 22 पशहूरया परिवारं – एल्योएनै, मासेयाह, इश्माएल, नतनेल, योजाबाद व एलासा। 23 लेवीतपाखें – योजाबाद, शिमी, कलीता धाःम्ह केलायाह, पतहियाह, यहूदा व एलीएजर। 24 म्ये हालीपिंपाखें – एल्यासीब। देगलय् पिवाः च्वनिपिंपाखें – शल्लूम, तेलेम व ऊरी। 25 अले मेपिं इस्राएलीतपाखें – परोशया परिवारं – रम्याह, यिज्याह, मल्कियाह, मियामीन, एलाजार, मल्कियाह व बनायाह। 26 एलामया परिवारं – मत्तन्याह, जकरिया, यहीएल, अब्दी, यरेमोत व एलिया। 27 जत्तूया परिवारं – एल्योएनै, एल्यासीब, मत्तन्याह, यरेमोत, जाबाद व अजीजा। 28 बेबैया परिवारं- येहोहानान, हनन्याह, जब्बै व अत्लै। 29 बानीया परिवारं – मशुल्लाम, मल्लूक, अदायाह, याशूब, शाल व यरेमोत। 30 पहत-मोआबया परिवारं – अदना, केलाल, बनायाह, मासेयाह, मत्तन्याह, बजलेल, बिन्नूई व मनश्शे। 31 हारीमया परिवारं- एलीएजर, यिशियाह, मल्कियाह, शमायाह, शिमेओन, 32 बेन्यामीन, मल्लूक व शमरयाह। 33 हाशूमया परिवारं – मत्तनै, मत्तता, जाबाद, एलीपेलेत, येरेमै, मनश्शे व शिमी। 34 बानीया परिवारं – मादै, अम्राम, ऊएल, 35 बनायाह, बेदयाह, कलूही 36 भन्याह, मरेमोत, एल्यासीब 37 मत्तन्याह, मत्तनै व यासू। 38 बिन्नूईया परिवारं – शिमी, 39 शेलेम्याह, नातान, अदायाह, 40 मक्नादबै, शाशै, शारै, 41 अज्रेल, शेलेम्याह, शमरयाह 42 शल्लूम, अमर्याह व योसेफ। 43 नेबोया परिवारं – यीएल, मत्तित्याह, जाबाद, जबीना, यद्दै, योएल व बनायाह। 44 थुपिं सकसिनं विदेशी मिस्तलिसें ब्याहा याःगु खः। थुपिं मध्ये छुं मनूतय् थुपिं बिदेशी मिस्तपाखें मचाखाचा नं दुगु खः। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.