इजकिएल 5 - नेवाः बाइबलवइगु न्यायया चिं 1 “आः, अय् सीमानिम्ह मनू, छपु ज्वःगु तरवार का, उकियात नौयागु ख्वःचा थें छ्यलाः उकिं थःगु सँ व दाह्री खा! अले लनेगु तराजु कयाः सँयात ब्वथ! 2 शहरयात घेरय् याःगु दिं सिधइबलय् सँयागु स्वब्वय् छब्वयात शहरया दुने मिइ छ्वय्काब्यु! मेगु स्वब्वय् छब्व सँयात शहरया प्यखेरं तरवारं कुचा कुचा यानाब्यु, ल्यं दुगु स्वब्वय् छब्वयात धाःसा फसय् ब्वय्काब्यु। छाय्धाःसा उमित जिं तरवार ज्वनाः लिनाछ्वये। 3 तर छं भचा सँ कयाः थःगु वसतय् प्वःचिनाः ति! 4 हाकनं उकिं नं भचा सँ कयाः मिइ तयाः छ्वय्काब्यु। अनं मि पिहां वयाः फुक्क इस्राएलयात छ्वयेकाबी।” परमेश्वरं यरूशलेमयात सजाँय बी धकाः धयादीगु 5 “जि, परमप्रभु परमेश्वरं थथे धाये – यरूशलेम थ्व हे खः, थुकियात जिं जातितय्गु दथुइ तयागु दु, थुकियागु छचाःखेरं देशत दु। 6 तर थ्वं जिगु नियमया विरोधय् ज्या यानाः मेगु जातितय्सं स्वयाः अप्वः मभिंगु ज्या यात। अले जिगु विधिया विरोधय् ज्या यानाः प्यखेरं च्वंगु जातितय्सं स्वयाः अप्वः बांमलाःगु ज्या यात। धात्थें इमिसं जिगु नियमयात हेला यात। धात्थें इमिसं जिगु नियम पालन याःगु मदु। 7 “उकिं जि, परमप्रभु परमेश्वरं थथे धाये – छिपिं थःगु प्यखेरं दुपिं जातित स्वयाः अप्वः जिगु नियम पालन मयाइपिं जूगु दु, छिमिसं जिगु विधि व नियम पालन याःगु मदु। छिपिं जःखः दुपिं जातितय्गु तह तक नं थ्यंगु मदु। 8 “उकिं जि, परमप्रभु परमेश्वरं थथे धाये – हे यरूशलेम, जि हे छंगु विरोधय् दु, अले मेगु जातितय्गु न्ह्यःने हे जिं थःम्हं छन्त सजाँय बी। 9 अले छंगु फुक्क घच्चाइपुगु ज्याया कारणं जिं छन्त थथे याये, गथे जिं आः तक गुबलें यानागु मदु, अले लिपा गुबलें याये नं मखु। 10 उकिं छंगु दथुइ मांबौनं थः मस्तय्त व मस्तय्सं थः मां बौयात नइ। छाय्धाःसा जिं छन्त सजाँय बी, अले छिमि म्वानाच्वंपिन्त फसय् छ्यालब्याल यानाबी। 11 “गथे जि धात्थें म्वाःम्ह खः, जि, परमप्रभु परमेश्वरं धाये, छंगु फुक्क घच्चाइपुगु मूर्तित व छं याःगु घच्चाइपुगु व्यवहारपाखें जिगु पवित्र थाय्यात छं अशुद्ध याःगुलिं जिं धात्थें हे छिमित नाश याये, जिं छिमित मायां स्वये मखु अले जिं छन्त दया नं याये मखु। 12 छिमि स्वब्वय् छब्व मनूत महामारी वा अनिकालं सी, अले स्वब्वय् छब्व छंगु पःखाःया पिने तरवारं सी, अले स्वब्वय् छब्वयात जिं प्यखेरं छ्यालब्याल यानाबी। अले नांगा तरवार ज्वनाः जिं इमित ली। 13 “थुकथं जिगु तं क्वलाइ, अले इमिगु विरोधय् दुगु जिगु तं शान्त जुइ। जिं थुकथं बदला काये। जिगु तं इमिके प्वंके धुंकाः इमिसं जि परमप्रभुं हे थःगु जोशय् थ्व खँ धाःगु खः धकाः सी। 14 “उकिं, जिं छन्त तहसनहस यानाबी। छंगु प्यखेंपाखेंयापिं जातियापिं मध्ये सुं अनं जुयाः वनीबलय् वं छिमित हेस्याइ। 15 जिगु तं व झ्वँक छंके लाइबलय् अले जिं छन्त सजाँय बीबलय् छिमि प्यखेरं च्वंपिं जातित ग्याइ। इमिसं छन्त बेक्वः मिखां स्वइ, अले छन्त हेस्याइ। जि परमप्रभुं हे थ्व धयागु खः। 16 जिं छन्त अनिकालया जिगु च्वामुगु व नाश याइगु वाणं कय्कीबलय् छन्त नाश यानाः हे त्वःते, अले जिं छन्थाय् झन अप्वः अनिकाल हये। अले छिमिगु अन्न वइगु दिकाबी। 17 जिं छिमिगु दथुइ अनिकालनापं गुँपशुत छ्वयाहये, इमिसं छपाखें छिमि मस्त लाका काइ। छिमिगु दथुइ महामारी व हि बाः वइगु ज्या जुया हे च्वनी। जिं छन्त तरवारं पाले। जि परमप्रभुं हे थ्व धयागु खः।” |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.