इजकिएल 48 - नेवाः बाइबलजमिन ब्वःथःगु 1 “इस्राएलया कुलतय्गु धलः व इमिसं काःगु फुक्क लागाया धलः थथे दु। उत्तरयागु सिमानाय् दानयात छब्व दइ। व हेतलोनया लँ जुयाः लेबो-हमातय् वनी। हसर-एनान व हमातया लिकसं च्वंगु दमस्कसया उत्तरयागु सिमाना धाःसा उकिया सिमानाया पुर्बंनिसें पच्छिमपाखे छब्व जुइ। 2 “दानया सिमानाया लिक्कसं, पुर्बंनिसें पच्छिमया सिमाना तक आशेरयागु छब्व जुइ। 3 “आशेरयागु सिमानाया लिक्कसं, पुर्बंनिसें पच्छिमया सिमाना तक नप्तालीयागु छब्व जुइ। 4 “नप्तालीया सिमानाया लिक्कसं, पुर्बंनिसें पच्छिम तक मनश्शेयागु छब्व जुइ। 5 “मनश्शेया सिमानाया लिक्कसं, पुर्बंनिसें पच्छिम तक एफ्राइमयागु छब्व जुइ। 6 “एफ्राइमया सिमाना लिक्कसं, पुर्बंनिसें पच्छिम तक रूबेनयागु छब्व जुइ। 7 “रूबेनया सिमानाया लिक्कसं, पुर्बंनिसें पच्छिमपाखे तक यहूदायागु छब्व जुइ। पुजाहारीत, लेवीत व देगःया इलाका 8 “पुर्बंनिसें पच्छिमपाखे तक यहूदाया सिमाना लिक्कसं छिमिसं अलग याःगु छगू विशेष भाग कोसेलिकथं छिमिसं बीमाः। उकिया ब्या १३ किलोमिटर जुइ, उकिया हाकः पुर्बंनिसें पच्छिम तक मेमेगु कुलयात ब्यूगु भाग ति हे जुइ। पवित्र देगः उकिया दथुइ जुइ। 9 “छिमिसं परमप्रभुयात छायेमाःगु भाग १३ किलोमिटर ताहाकःगु व ५.३ किलोमिटर तब्यागु जुइ। 10 थ्व पुजाहारीतय्गु निंतिं छगू पवित्र ब्व जुइ। उकिया ताहाकःगु उत्तरंनिसें दच्छिन तक ५.३ किलोमिटर, उकिया ब्या पुर्बंनिसें पच्छिम तक १३ किलोमिटर जुइ। परमप्रभुया पवित्रथाय् धाःसा उकिया दथुइ जुइ। 11 व अर्पण याःपिं पुजाहारीतय्गु निंतिं जुइ अर्थात सादोकीत। इमिसं विश्वास यायेबहःपिं जुयाः जिगु सेवा यात। इस्राएलीत मखुगु लँय् वंबलय् लेवीत नं मखुगु लँय् वं थें सादोकीत मखुगु लँय् मवं। 12 देशयागु पवित्र भागं, लेवीतय्गु लागा थियाच्वंगु तसकं पवित्रगु ब्व इमिगु निंतिं छगू विशेष कोसेलि जुइ। 13 “थ्व पुजाहारीतय्गु निंतिं छगू पवित्र ब्व जुइ। उकिया ताहाकःगु उत्तरंनिसें दच्छिन तक ५.३ किलोमिटर, उकिया ब्या पुर्बंनिसें पच्छिम तक १३ किलोमिटर जुइ। परमप्रभुया पवित्रथाय् धाःसा उकिया दथुइ जुइ। 14 इमिसं व मी मज्यू अले हिलाबुला याये मज्यू। थ्व देशयागु दकलय् भिंगु जग्गा खः, थ्व सुयातं बी मज्यू, छाय्धाःसा थ्व परमप्रभुया निंतिं पवित्र खः। 15 “ल्यं दुगु २.७ किलोमिटर तब्यागु व १३ किलोमिटर ताहाकःगु जमिन धाःसा शहरया साधारण ज्याया लागि, च्वनेगु थाय् व पशुत ज्वयेगु थाय्या लागि जुइ। उकिया दथुइ शहर दइ। 16 व जग्गाया हाकः व ब्या थथे जुइ, थ्व प्यखेंपाखे २.४ किलोमिटर दुगु प्यकूं लाःगु शहर जुइ। 17 शहरया चकंगु घाँय्ख्यः फुक्क चाकःछिं नापय् याइबलय् छगू छगूपाखे १३५ मिटर दुगु जुइ। 18 शहरया पिने बुँज्या याइगु थाय् दइ, व पुर्बपाखे ५.३ किलोमिटर व पच्छिमपाखे ५.३ किलोमिटर नापयागु जुइ। अन छु सल व शहरय् ज्या याइपिनिगु लागि नयेत खः। 19 इस्राएलया फुक्क कुलं वःपिं शहरयापिं ज्यामितय्सं थ्व जमिनय् बुँज्या याइ। 20 व फुक्क भाग प्यखेरं हे १३ किलोमिटर दुगु प्यकूं लाःगु जुइ। शहरयागु जग्गानापं उगु पवित्र भाग विशेष कोसेलिकथं अलग ति। शासक व पवित्र थाय्या लागाया सिमाना 21 “पवित्र देश वा शहरय् ल्यंदुपिं पुर्बंनिसें पच्छिम तकया लागा इस्राएलयाम्ह शासकयागु जुइ। उपिं लागा इस्राएलया सिमाना जुयाः पुर्ब व पच्छिमपाखे १३.३ किलोमिटर तब्या जुइ। थुपिं निगुलिं इलाका कुलतय्गु इलाका ति हे ताहाकः जुइ थुपिं शासकयागु जुइ। गुकिं पवित्र देशया पवित्र देगःयात दथुइ लाकाबी। 22 शासकया लागाया दथुइ लेवीतय्गु जमिन व शहरयागु जमिन दइ। शासकया लागा धाःसा यहूदाया सिमाना व बेन्यामीनया सिमानाया दथुइ लाइ। ल्यं दुगु इस्राएली कुलतय्गु लागा 23 “ल्यं दुगु कुलतय्गु निंतिं पुर्बंनिसें पच्छिम तकयागु छब्व बेन्यामीनयागु। 24 “बेन्यामीनया सिमानाया लिक्कसं पुर्बंनिसें पच्छिम तकयागु छब्व शिमियोनयागु। 25 “शिमियोनया सिमानाया लिक्कसं पुर्बंनिसें पच्छिम तक छब्व इस्साखारयागु। 26 “इस्साखारया सिमानाया लिक्कसं पुर्बंनिसें पच्छिम तकयागु छब्व जबूलुनयागु। 27 “जबूलूनया सिमानाया लिक्कसं पुर्बंनिसें पच्छिम तकयागु छब्व गादयागु। 28 “गादया दच्छिन सिमाना तामारंनिसें मेरीबा कादेशया लः तक थ्यनी अले अनं व मिश्रया खुसिचाया लिक्क लिक्क जुयाः थ्व भूमध्यसागर तक थ्यनी। 29 “छिमिसं इस्राएलया कुल कुलयात सर्बयकथं इनाबीमाःगु देश थ्व हे खः, थुपिं हे इमिगु ब्व खः,” परमप्रभु परमेश्वरं धयादी। शहरया ध्वाखात 30 “शहरं पिहां वनेगु थाय्त थुपिं हे जुइ, २.४ किलोमिटर ताहाकःगु उत्तरया भागय् 31 स्वंगू ध्वाखात दइ। शहरया ध्वाखाया नां इस्राएलया कुल कुलया नां थें हे जुइ। उत्तर पाखेया स्वंगू ध्वाखात रूबेनया ध्वाखा, यहूदाया ध्वाखा अले लेवीया ध्वाखा जुइ। 32 “पुर्बपाखे, २.४ किलोमिटर ताहाकःगु पुर्बया भागय् स्वंगू ध्वाखा दइ, योसेफया ध्वाखा, बेन्यामीनया ध्वाखा व दानया ध्वाखा। 33 “२.४ किलोमिटर ताहाकःगु दच्छिनया भागय् स्वंगू ध्वाखा दइ, शिमियोनया ध्वाखा, इस्साखारया ध्वाखा व जबूलूनया ध्वाखा। 34 “२.४ किलोमिटर ताहाकःगु पच्छिमपाखे स्वंगू ध्वाखा दइ, गादया ध्वाखा, आशेरया ध्वाखा व नप्तालीया ध्वाखा। 35 “शहरयागु प्यखें पाखेयागु घेरा ९.६ किलोमिटर दइ। “उखुन्हुंनिसें शहरया नां ‘परमप्रभु अन दी’ जुइ।” |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.