इजकिएल 44 - नेवाः बाइबलशासक, लेवीत व पुजाहारीत 1 उम्ह मनुखं जितः देगःया पुर्बपाखेया पिनेया मू ध्वाखाय् यंकल। ध्वाखा तिनातःगु दु। 2 परमप्रभुं जितः धयादिल, “थ्व ध्वाखायात तिना हे तयेमाः। व चाय्के मज्यू। सुं नं थ्व ध्वाखां दुहां वने दइ मखु। थ्व ध्वाखा तिना हे तयेमाः छाय्धाःसा परमप्रभु इस्राएलयाम्ह परमेश्वर थ्व ध्वाखां दुहां झाःगु दु। 3 शासक थः हे जक परमप्रभुया न्ह्यःने पवित्र भ्वय् नयेत ध्वाखाया दुने दुहां वने फइ। व लुखाया दलानं दुहां पिहां जुइमा।” देगलय् दुहां वनेगु नियम 4 अनंलि उम्ह मनुखं जितः देगःया न्ह्यःनेपाखे उत्तरयागु मू ध्वाखां देगःया दुनेया चुकय् यंकल। जिं स्वयाबलय् परमप्रभुया देगः वय्कःया महिमां जाःगु खना। जि बँय् भ्वसुला। 5 परमप्रभुं जितः धयादिल, “अय् सीमानिम्ह मनू, ध्यान ब्यु अले थःगु मिखां स्व! परमप्रभुया देगःया फुक्क विधिया बारे जिं छन्त धयागु फुक्क खँ थःगु न्हाय्पनं न्यँ! सु देगलय् दुहां वने फइ अले सुयात देगलं पितिना छ्वयेमाः व फुक्क बांलाक स्व! 6 विद्रोही इस्राएलया घरानायात थथे धा, ‘परमप्रभु परमेश्वरं थथे धयादी – हे इस्राएलया घराना, छिमिगु घच्चाइपुगु ज्या अप्वः जुल। 7 छिमिगु फुक्क घच्चाइपुगु व्यवहार बाहेक छिमिसं मन व म्हय् चिं मतःपिं विदेशीतय्त जिगु पवित्र थासय् दुने हयाः छिमिसं नसा, दाः व हि जिगु लागि छाःबलय् उकियात अशुद्ध यात, अले जिगु बाचा त्वाथल। 8 छिमिसं थःपिन्सं जिगु पवित्र ज्वलंया जिम्मा मकासें थःगु हे मनं छिमिसं मेपिन्त जिगु पवित्रगु थासय् मेपिनिगु जिम्माय् बिल। 9 परमप्रभु परमेश्वरं थथे धयादी – मनय् व म्हय् निगुलिं चिं मतःपिं विदेशीत व इस्राएलीतय्गु दथुइ तन व मन निगुलिं खतना मजूपिं विदेशी सुं नं जिगु पवित्र थासय् दुहां वये मज्यू। लेवीतय्त पुजाहारीया ज्या यायेत पंगु 10 “‘इस्राएलीत मखुगु लँय् वंगु दिनंनिसें जिपाखें तापाना वंपिं लेवीतय्सं व जितः त्वःताः थःगु मूर्तिया ल्यूल्यू जुया जूपिं लेवीतय्सं थःगु पापया सजाँय फये हे माः। 11 इमिसं जिगु पवित्र थासय् सेवा याये फु। देगःया ध्वाखातय्गु जिम्मा कयाः अन सेवा याये फु। इमिसं मनूतय्गु निंतिं होमबलि व बलि बीत छायेहपिं पशुत इमिसं स्याये फु। इपिं मनूतय् न्ह्यःने दनाः इमिगु सेवा याये फु। 12 तर उपिं लेवीतय्सं थःगु हे मूर्तितय्गु न्ह्यःने मनूतय्गु सेवा याःगु, अले इस्राएलया घरानायात पापय् कुर्काब्यूगु जुयाः इमिसं थःगु पापया सजाँय फये हे माः धकाः जिं थःगु ल्हाः ल्ह्वनाः पाफयागु दु, जि, परमप्रभु परमेश्वर न्ववानागु दु। 13 इपिं पुजाहारीत जिगु सेवा यायेत न्ह्यःने वये दइ मखु। इपिं जिगु छुं नं पवित्रगु खँ अथवा तच्वकं पवित्र भेटीया न्ह्यःने वये दइ मखु। थःम्हं याःगु घच्चाइपुगु ज्यायागु लज्या इमिसं भोगे याये हे माः। 14 अय्नं देगलय् यायेमाःगु ल्ह्वने ज्यायागु जिम्मा व अन अप्वः यानाः यायेमाःगु ज्यायागु जिम्मा जिं इमित हे बी। पुजाहारीत 15 “‘तर सादोकया परिवारयापिं लेवीतय् सन्तान पुजाहारीतय्सं धाःसा इस्राएलीत जिपाखें फस्वया वंसां तबि जिगु पवित्र थासय् यायेमाःगु ज्या इमान्दार जुयाः याना हे च्वन। थुपिं धाःसा जिगु सेवा यायेत जिगु न्ह्यःने वयेगु यायेमा, अले जिगु न्ह्यःने दाः व हि छायेत वयेगु यायेमा, परमप्रभु परमेश्वरं धयादी। 16 इपिं जक जिगु देगलय् दुहां वइ, अले जिगु न्ह्यःने सेवा यायेत जिगु टेबिलया न्ह्यःने वयाः इमिसं जिगु सेवा याइ। 17 “‘इपिं दुनेया चुकयागु लुखाय् दुहां वनीबलय् इमिसं सूती कापःयागु वसः फीमाः। इमिसं दुनेयागु चुकयागु लुखा लुखाय् वा देगःया दुने सेवा याइबलय् छुं नं ऊनयागु वसः पुने मज्यू। 18 इमिसं छेनय् सुतियागु फेटा व जँय् सुतियागु दुनेयागु वसः फीमाः। इमिसं चःति वइगु छुं कथं याःगु वसः फी मज्यू 19 इपिं पिनेया चुकय् मनूतय्थाय् वनीबलय् सेवा याःबलय् फ्यूगु वसः त्वयेमाः, अले व वसः पवित्र क्वथाय् तयाः मेगु वसः फी हे माः। मखुसा थ्व पवित्र वसःपाखें चुकय् च्वंपिं पवित्रतां सी हे माःगु खः। 20 “‘इमिसं थःगु छेनय् सँ खाये मज्यू अथवा ताहाक जुइके बी मज्यू, तर इमिसं थःगु सँ चिहाकः यानाः चायेमाः। 21 दुनेया चुकय् वनीबलय् सुं नं पुजाहारीं दाखमद्य त्वने मज्यू। 22 सुं नं पुजाहारीं भाःत मदये धुंकूम्ह वा भाःतं त्वःतूम्ह मिसालिसें ब्याहा याये मज्यू। इमिसं इस्राएलया वंशय् बूम्ह कुमारी मिसामचायात अथवा सुं पुजाहारीतय् भाःत मदये धुंकूम्ह मिसायात जक ब्याहा याये फइ। 23 इमिसं जिगु प्रजायात पवित्र व साधारण छु पाः व स्यनेमाः अले इमित शुद्ध व अशुद्ध छुतय् यायेगु स्यनेमाः। 24 “‘छुं ल्वापुख्यापु जुइबलय् पुजाहारीतय्सं हे न्यायाधीशं थें ज्या यायेमाः अले जिगु विधिकथं इमिसं मुद्दा फैसला यायेमाः। इमिसं जिगु नियमत व जिगु क्वःछिनातःगु फुक्क नखःचखःयागु विधित पालन यायेमाः। इमिसं जिगु विश्रामबारयात पवित्र तयाति! 25 “‘सीम्ह मनूया न्ह्यःने वनाः सुं पुजाहारीं थःत अशुद्ध याये मज्यू। अय्नं मां बौ, काय्म्ह्याय्पिं दाजुकिजापिं अथवा ब्याहा मजूनिपिं तता केहेँयागु सीम्हया न्ह्यःने वनाः व अशुद्ध जुइफु। 26 शुद्ध जुइ धुंकाः न्हय्न्हु तक वं पियाच्वनेमाः। 27 पवित्र थासय् सेवा यायेत पवित्रगु थाय्या दुनेया चुकय् दुहां वनेगु दिं वं थःगु निंतिं शुद्ध जुइगु बलि छायेमाः। परमप्रभु परमेश्वरं धयादी। 28 “‘पुजाहारीतय्त पुर्खातय्गु जमिन दइ मखु। इमिगु भागयागु जमिन जि हे खः। छिमिसं इस्राएलय् इमित छुं थःगु जमिन बी मज्यू, छाय्धाःसा जि हे इमिगु थःगु जमिनया भाग जुये। 29 इमिसं अन्नबलि, शुद्ध जुइगु बलि व दोषबलि नइ। इस्राएलय् परमप्रभुयात देछाय्माःगु फुक्क चिज इमिगु हे जुइ। 30 फुक्क न्हापां सःगु फलतय् दकलय् भिंगु न्हापांगु फलत व छिमिगु फुक्क कथंयागु व विशेष क्वसेलि फुक्क पुजाहारीतय्गु हे जुइ। छिमिगु घरानाय् आशिष वयेत न्हायातःगु छुचुंयागु दकलय् न्हापायागु ब्व नं पुजाहारीतय्त हे ब्यु! 31 अथें सीम्ह अथवा मेम्ह पशुं स्याःम्ह झंगःपन्छि वा पशुया ला पुजाहारीतय्सं नये मज्यू।’” |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.