इजकिएल 43 - नेवाः बाइबलपरमप्रभुया महिमा लिहां वःगु 1 हाकनं वं जितः पुर्बपाखे स्वःगु मू लुखाय् हल, 2 अले जिं इस्राएलया परमेश्वरया महिमा पुर्बपाखें वयाच्वंगु खना। वय्कःया सः यक्व लःयागु थें च्वं, वय्कःया महिमां जमिन प्वालप्वाल थित। 3 थ्व दर्शन वय्कः शहरयात नाश यायेत झाःबलय् जिं खनागु दर्शन व कबार खुसिया सिथय् जिं खनागु दर्शन थें च्वं, अले जि बँय् भ्वसुला। 4 परमप्रभुया महिमा पुर्बपाखे स्वःगु मू लुखां देगः दुने दुहां वल। 5 आत्मां जितः ल्ह्वनाः दुनेया चुकय् हयादिल, परमप्रभुया महिमां देगः जाल। 6 व मनू जिगु लिक्क दनाच्वंबलय् देगलय् दुनेनं सुं नवानाच्वंगु जिं ताल। 7 वय्कलं जितः धयादिल, “अय् सीमानिम्ह मनू, थ्व ला जिगु सिंहासनया थाय् खः, अले थ्व थाय् जिगु तुति पालीया निंतिं नं खः। थन जि इस्राएलीतनापं सदां सदां च्वने। इस्राएलया घरानां व इमि जुजुपिन्सं थःगु व्यभिचारपाखें व पुजा याइगु थासय् दुगु थः जुजुपिनिगु जीवन मदुगु मूर्तितपाखें हाकनं गुबलें जिगु पवित्र नांयात अशुद्ध याइ मखु। 8 इमिसं थःगु लुखाखलु जिगु लुखाखलुया लिक्क व थःगु लुखाया थांत जिगु लुखाया थांया न्ह्यःने दय्कूबलय् जिगु व इमिगु दथुइ छगू पःखाः तःबलय् इमिगु घच्चाइपुगु व्यवहारपाखें इमिसं जिगु पवित्र नांयात अपवित्र यात। उकिं तंम्वय् जिं इमित नाश याना। 9 आः इमिसं थःगु व्यभिचार व थः जुजुपिनिगु मूर्तित जिगु न्ह्यःनं चीकाःछ्वयेमा, अले जि इमिगु दथुइ न्ह्याबलें च्वनांच्वने। 10 “अय् सीमानिम्ह मनू, इस्राएलयापिं मनूतय्त थ्व देगःया बारे धा, गुकिं यानाः इपिं थःगु पापया निंतिं मछालेमाः। इमिसं थ्व देगःया नमूनायात बिचाः यायेमा। 11 इमिसं छु छु याःगु खः उकिया निंतिं इपिं लज्या चाःगु दुसा छं इमित देगःया नमूनाया बारे थुइकाब्यु। थुकिया नमूना, थुकिया पिने वनीगु लँपु, ध्वाखा, आकार, विधित व थुकिया फुक्क नियम वयात कनाब्यु। अले इमिगु न्ह्यःने च्व, गुकें यानाः इमिसं थुकिया फुक्क आकार व थुकिया विधित मानय् यायेमा अले थुपिं कथं जुइमा। 12 “देगःया नियम थ्व हे खः, पर्वतया च्वकाया प्यखेरंया लागा तच्वकं पवित्र जुइ। देगःया नियम थ्व हे खः।” वेदी 13 “वेदीया नाप थथे दु – वेदीया छचाःखेरं धों दु, व ५३ सेन्टिमिटर तज्जाः अले ५३ सेन्टिमिटर तब्या। उकिया छचाःखेरं दुगु बालाया नाप २७ सेन्टिमिटर दु। 14 वेदीया जाः थथे दु – धोंया च्वकांनिसें क्वय्यागु फःया च्वका तक १ मिटर तज्जाः अले व फः ५३ सेन्टिमिटर तब्या, क्वय्यागु फःया च्वकांनिसें च्वय्यागु फःया च्वका तक २.१ मिटर तःजाः, फः ५३ सेन्टिमिटर तब्या। 15 वेदीया भुतू २.१ मिटर तज्जाः, पेम्ह सिंहत उकिया पेंगुलिं कुन्चाय् च्वय्पाखे थाहां वःगु दु। 16 भुतू धाःसा ६.४ मिटर ताहाकःगु व ६.४ मिटर ब्या दुगु पेकूंलाःगु खः। 17 वेदीया च्वय्यागु फः नं पेकूंलाः, उकिया हाकः ७.४ मिटर दु अले उकिया ब्या नं ७.४ मिटर दु। बाला ५३ सेन्टिमिटर तःफि, उकिया प्यखेरं २७ सेन्टिमिटर तःजाःगु धों दु। वेदीया त्वाथःत पुर्बपाखे स्वःगु दु।” 18 अले वं जितः धाल, “अय् सीमानिम्ह मनू, परमप्रभु परमेश्वरं थथे धयादी – वेदी दय्के धुंकाः होमबलि छायेत व वेदीइ हि हाः यायेगु विधि थ्व हे खः। 19 छिमिसं जिगु न्ह्यःने सेवा यायेत वइपिं सादोकया परिवारया लेवीतय् सन्तान पुजाहारीतय्त शुद्ध जुइगु बलिया निंतिं छम्ह द्वहंचा बीमाः, परमप्रभु परमेश्वरं धयादी। 20 वयागु भचा हि कयाः इमिसं वेदीया प्यपुं नेकुलिइ, च्वय्यागु चाकःया पेंगुलिं कुन्चात व उकिया प्यखेरं तयाबीमा। थुकथं छिमिसं वेदी शुद्ध याइ, वयागु निंतिं प्रायश्चित याइ। 21 अनंलि शुद्ध जुइगु बलिया द्वहं कयाः पवित्रगु थाय्या पिनेपाखे क्वःछिनातःगु थासय् छिमिसं व मिइ छु। 22 “कन्हय् खुन्हु छिमिसं छम्ह खू मदुम्ह दुगुचा शुद्ध जुइगु बलिया निंतिं छा। छिमिसं द्वहंपाखें वेदी शुद्ध याःथें थुकिं नं वेदी शुद्ध या। 23 छिमिसं वेदी शुद्ध याये धुंकाः बथांयापिं मध्ये छम्ह खू मदुम्ह द्वहंचा व छम्ह खू मदुम्ह भ्याःचा छा। 24 छिमिसं इमित परमप्रभुया न्ह्यःने छा। पुजाहारीतय्सं इमिगु म्हय् चि ह्वलाः परमप्रभुया न्ह्यःने होमबलिकथं उपिं छायेमाः। 25 “छिमिसं न्हय्न्हु तक शुद्ध जुइगु बलिया निंतिं न्हियान्हिथं छम्ह दुगुचा तयार यायेमाः। छिमिसं बथांयाम्ह छम्ह खू मदुम्ह द्वहंचा व छम्ह खू मदुम्ह भ्याःचा छायेगु या। 26 न्हय्न्हु तक इमिसं वेदीया निंतिं प्रायश्चित यानाः उकियात शुद्ध यानाच्वनेमा, थुकथं इमिसं उकियात अर्पण याइ। 27 न्हय्न्हु फुइ धुंकाः च्यान्हु दुखुन्हुंनिसें पुजाहारीतय्सं वेदीइ छिमिगु होमबलि व मेलबलि छायेगु यायेमाः। अले जिं छिमित स्वीकार याये, परमप्रभु परमेश्वरं धयादी।” |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.