इजकिएल 39 - नेवाः बाइबलगोगया सेनायात स्याःगु 1 “अय् सीमानिम्ह मनू, गोगया विरोधय् थ्व अगमवाणी यानाः धा, ‘परमप्रभु परमेश्वरं थथे धयादी – हे मेशेक व तूबलयाम्ह मू शासक गोग, जि छंगु विरोधय् दु। 2 जिं छन्त फनक्क चाःहिकाः साला हये। जिं छन्त तापाःगु उत्तरंनिसें हयाः इस्राएलया पहाड पहाडय् लडाइँ यायेत छ्वये। 3 अन जिं छंगु खव ल्हातय् दुगु धनुसयात कय्के, अले छंगु जव ल्हातय् दुगु वाणयात कुर्काबी। 4 इस्राएलया पहाड पहाडय् छ, छंगु फुक्क सेना व छलिसें मिलय् जूपिं फुक्कं सी। जिं छन्त ला नइपिं झंगःत व गुँपशुतय्गु आहारा यानाबी। 5 छ चक्कंगु मैदानय् हे ग्वतुली, छाय्धाःसा जि, परमप्रभु परमेश्वरं थ्व घोषणा यानागु खः। 6 जिं मागोग व समुद्रया सिथय् याउँक च्वनाच्वंपिन्के मि छ्वयाहये, अले इमिसं जि हे परमप्रभु खः धकाः सी। 7 “‘जिं थःगु पवित्र नां जिगु प्रजा इस्राएलया दथुइ क्यने। जिं थःगु पवित्र नांयात अपमान याकेबी मखु। अले जात जातिं जि परमप्रभु हे इस्राएलया पवित्र परमेश्वर खः धकाः सी। 8 स्व! थ्व घटना जुइतिनि, थथे जू हे जुइ! परमप्रभु परमेश्वरं धयादी। जिं धयागु दिं थ्व हे खः। 9 “‘अबलय् इस्राएलया शहर शहरय् च्वनीपिं पिने पिहां वइ अले शत्रुतय्गु हतियारत मुंकाः सिँ थें च्याकी। तःधंगु चिधंगु ढालत, धनुसत व वाणत, लडाइँया कथित व भालात फुक्क न्हय्दँ तक इमिसं सिँ थें च्याकी। 10 इमिसं मैदानय् सिँ मुनेमाली मखु। इमिसं जंगलय् वनाः सिँ पालाः हयेमाली मखु। छाय्धाःसा इमिसं उपिं हतियार सिँया निंतिं छ्यली। इमिसं थःपिन्त लुतय् याःपिन्त लुतय् याइ। थःत लाकाकाइपिन्त लाका काइ, परमप्रभु परमेश्वरं धयादी। 11 “‘उखुन्हु गोगयात जिं इस्राएलय्, समुद्रया पुर्बय् लँजुवाःतय्गु बेंसीइ छगू चिहान बी। अनं जुयाः वनीपिं लँजुवाःतय्त लँ पनी छाय्धाःसा गोग व वया फुक्क सेनायात अन थुनी अले व थाय्यात हामोन-गोगया ब्यासि धाइ। 12 “‘देशयात शुद्ध यायेत इस्राएलया घरानां इमित न्हय्ला तक थुनातइ। 13 देशयापिं सकलें मनूत मिलय् जुयाः इमित थुनी। अले जिगु महिमा जुइगु दिं इमिगु निंतिं छगू लुमनाच्वनीगु दिं जुइ, परमप्रभु परमेश्वरं धयादी। 14 “‘न्हय्ला फुइ धुंकाः ल्यनाच्वंगु सीम्हत मालाः थुनेत मनूत ल्ययाः देशन्यंक छ्वइ, अले इमिसं देशयात शुद्ध याइ। 15 इपिं देशया प्यखें वनीबलय् गनं मनूया क्वँय् खन धाःसा उकिया लिक्क छगू चिं तइ। थ्व चिं चिहान म्हुइपिन्सं व क्वँय् हामोन-गोगया ब्यासिइ मथुंतले दयाच्वनी। 16 अनयागु शहरयागु नां नं “हामोनाह” खः। अले थुकथं इमिसं देशयात शुद्ध याइ।’ 17 “अय् सीमानिम्ह मनू, परमप्रभु परमेश्वरं थथे धयादी – फुक्क कथंयापिं झंगःपन्छित व फुक्क गुँपशुतय्त सःताः धा, ‘प्यखेंनं मुनावा, जिं छगू तःधंगु बलिदान इस्राएलया पहाडय् छिमिगु निंतिं तयार यानाच्वनागु दु। अन छिमिसं ला नइ अले हि त्वनी। 18 छिमिसं बल्लाःपिं मनूतय्गु ला नइ, अले पृथ्वीयापिं शासकतय्गु हि त्वनी। थुपिं सकलें बाशानयापिं ल्ह्वंपिं भ्याःचात, चीधिकःपिं भ्याःचात, दुगुचात व द्वहंत थें खः। 19 जिं छिमिगु निंतिं तयार यानागु बलिया भ्वय्लय् दा ननं छिमिगु प्वाः जाइ, हि त्वँत्वं छिपिं काइ। 20 जिगु टेबिलय् सलत व सलगइपिं, बल्लाःपिं मनूत व सिपाइँत फुक्क कथंयापिं मनूत नयाः छिमिगु प्वाः जाइ, परमप्रभु परमेश्वरं धयादी।’ 21 “जात जातिया दथुइ जिं थःगु महिमा क्यने। फुक्क जातिं जिं बियागु सजाँय व इमिगु द्यःने लाःगु जिगु झ्यातुगु ल्हाः खनी। 22 उखुन्हुंनिसें इस्राएलया घरानां जि हे परमप्रभु इमि परमेश्वर खः धकाः सी। 23 अले जात जातितय्सं इस्राएलयापिं मनूतय्त इमिगु थःगु पापं यानाः ज्वना यंकूगु खः धकाः सी, छाय्धाःसा इमिसं जितः विश्वासघात यात। उकिं जिं इपिंपाखें थःगु ख्वाः फस्वय्का, इमित इमि शत्रुतय्गु ल्हातय् लःल्हानाबिया, इपिं सकलें लडाइँलय् सित। 24 जिं इमित इमिगु अशुद्धता व अपराध कथं सजाँय बिया, जिं जिगु ख्वाः इपिंपाखें फस्वय्का।” परमेश्वरया मनूत हाकनं थापं जूगु 25 “उकिं परमप्रभु परमेश्वरं थथे धयादी – जिं याकूबया सुख व शान्ति हाकनं लित हयाबी, जिं इस्राएलयापिं फुक्कं मनूतय्त माया याये। जिं जिगु पवित्र नांया इज्जतयात रक्षा याये। 26 इमित ख्याइपिं सुं मदयाः थःगु देशय् याउँक च्वने धुंकाः इमिसं न्हापायागु लज्या व विश्वासघातया जिम्मा काइ। 27 जिं जात जातितय्गु दथुं इमित लित हयेबलय् अले इमित थः शत्रुतय्गु देशं मुंकेबलय् यक्व जातितय्गु मिखाय् इमिगु दथुइ जिं थःत पवित्र क्यने। 28 अले इमिसं जि परमप्रभु इमि परमेश्वर खः धकाः सी, छाय्धाःसा जिं इमित जाति जातितय्गु दथुइ ज्वंकाछ्वसां इपिं मध्ये सुं नं त्वःमफिक जिं हे इमित इमिगु थःगु हे देशय् मुंके। 29 जिं हाकनं गुबलें थःगु ख्वाः इपिंपाखें फस्वय्के मखु, छाय्धाःसा जिं थःगु आत्मा इस्राएलया घरानायाके प्वंके, परमप्रभु परमेश्वरं धयादी।” |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.