इजकिएल 29 - नेवाः बाइबलमिश्र देशया बारे अगमवाणी 1 झिगूगु दँया झिगूगु लाया झिनिन्हु दुखुन्हु परमप्रभुयागु थ्व वचन जिथाय् वल, 2 “अय् सीमानिम्ह मनू, छंगु ख्वाः फारोपाखे स्वय्काः वयागु व फुक्क मिश्र देशया विरोधय् अगमवाणी धा। 3 वलिसें खँ ल्हा, अले वयात थथे धा, ‘परमप्रभु परमेश्वरं थथे धयादी – “‘हे मिश्र देशयाम्ह जुजु फारो, जि छंगु विरोधय् दु, थःगु खुसिचातय्गु दथुइ च्वनाच्वनीम्ह छ तःधीम्ह लखय् च्वनीम्ह जन्तु, छं थथे धाःगु दु, “निल खुसि जिगु हे खः, व जिगु निंतिं दय्कागु खः।” 4 जिं छंगु वाकुधीलय् बल्छीत तयाबी, छंगु बिखुलिइ छंगु खुसिचाया न्यात जिं प्यपुंके बी। छंगु बिखुलिइ प्यपुनाच्वंपिं उपिं न्यातनापं जिं छन्त छंगु खुसिचातय्गु दथुं सालाः लिकाये। 5 छ व छंगु खुसिचायापिं फुक्क न्यातय्त जिं मरुभूमिइ त्वःताबी। छ चक्कंगु ख्यलय् क्वःदली। छन्त सुनानं मुंकी मखु वा लानाकाइ मखु। जिं छन्त पृथ्वीयापिं पशुत व आकाशयापिं झंगःपन्छितय्गु आहारा यानाबी। 6 “‘अले मिश्र देशय् च्वंपिं सकसिनं जि हे परमप्रभु खः धकाः सी। “‘छ इस्राएलया घरानाया निंतिं छपु तिंकथि थें जूगु दु। 7 इमिसं छन्त ज्वनीबलय् छ त्वःदुलिगु, अले इमिगु ब्वहलय् घाःपाः हे घाःपाः जुइगु। इपिं छंके लिधनीबलय् छ त्वःदुलिगु, अले इमिगु जन्हुँफा मर्के जुइगु। 8 “‘उकिं परमप्रभु परमेश्वरं थथे धयादी – जिं छंगु विरोधय् छगू सेना हये, जिं छिमि पशुत व मनूत निखलःसितं स्यानाबी। 9 मिश्र देश झिजांमिजां दंगु सुनसान थाय् जुइ। अले इमिसं जि हे परमप्रभु खः धकाः सी। “‘छाय्धाःसा छं धाःगु दु, “नील खुसि जिगु हे खः, जिं उकियात दय्कागु खः।” 10 उकिं जि छ व छंगु खुसिचातय्गु विरोधय् दु, उत्तरय् मिग्दोलंनिसें दच्छिनय् आश्वान तक व कूश देशया सिमाना तक जिं मिश्र देशयात झिजांमिजां व नाश यानाबी। 11 पिइदँ तक अन सुं मनू वा पशुं पलाः तक नं तइ मखु, न अन सुं च्वनी। 12 जिं मिश्र देशयात नाश जूगु देशतय्गु दथुइ उजाड यानाबी, अले उकिया शहरत नाश जूगु शहरतय्गु दथुइ पिइदँ तक उजाड हे जुयाच्वनी। अले जिं मिश्रीतय्त जाति जातितय्गु दथुइ छ्यालब्याल व देश देशय् उखेलाः थुखेलाः यानाबी। 13 “‘अय्नं परमप्रभु परमेश्वरं थथे धयादी – पिइदँ फुइ धुंकाः जिं मिश्रीतय्त इपिं छ्यालब्याल जूगु जाति जातितय्गु दथुं मुंके। 14 अले इमिगु लसता व शान्ति नं लित हयाबी। अले जिं इमित इमि पुर्खातय्गु देश, दच्छिन मिश्रय् हये। अन इपिं छगू चिधंगु राज्य जुयाच्वनी। 15 व फुक्क राज्यत मध्ये दकलय् चिधंगु राज्य जुइ। इमिसं गुबलें नं मेगु जातियात शासन याये फइ मखु। जिं इमित हाकनं गुबलें मेगु जातियात शासन याये मफय्क कमजोर यानाबी। 16 इस्राएलयापिं मनूतय्सं हाकनं गुबलें मिश्र देशयात भलसा याइ मखु। तर झीसं न्हापा मिश्रयात भलसा यानाः गुलि बांमलाःगु ज्या याना धकाः मिश्रयागु छ्यालब्याल जूगु अवस्थां इस्राएलयात सिइके बी। अनंलि इमिसं जि हे परमप्रभु परमेश्वर खः धकाः सी।’” नबूकदनेसर जुजुं मिश्रयात त्याकी 17 जिमित ज्वनाः बेबिलोनय् यंकूगु न्हय्गूगु दँया न्हापांगु लाया न्हापांगु दिनय् परमप्रभुयागु थ्व वचन जिथाय् वल, 18 “अय् सीमानिम्ह मनू, बेबिलोनयाम्ह जुजु नबूकदनेसरं टुरोसयात घेरय् यायेत थः सेनायात थुलि थाकुगु ज्या याकल कि इमिगु छेनय् च्वंगु सँ हे हाया वन, फुक्कसिगु ब्वहयागु छेंगू च्वतुत, अय्नं थुलि दुःख याना नं जुजु व सेनां छुं नं काये मखन। 19 उकिं परमप्रभु परमेश्वरं थथे धयादी – जिं मिश्र देश बेबिलोनयाम्ह जुजु नबूकदनेसरयात बी, वं अन दुगु धन-सम्पत्ति यंकी। वं देशयागु फुक्क लुटपाट यानाः थः सेनायात ज्यालाबी। 20 जिं वयागु कुतःया लागि वयात मिश्र देश बियागु दु छाय्धाःसा वया सेनां थ्व जिगु लागि यात, परमप्रभु परमेश्वरं धयादी। 21 “उखुन्हु जिं इस्राएलया घरानाया निंतिं छपु नेकू बुइके, छं नवाइबलय् मनूतय्सं छंगु खँ न्यनी धकाः पक्का याये। अले इमिसं जि हे परमप्रभु खः धकाः सी।” |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.