इजकिएल 23 - नेवाः बाइबलनिम्ह व्यभिचारिणी तताकेहेँ 1 परमप्रभुयागु वचन जिथाय् वल, 2 “अय् सीमानिम्ह मनू, निम्ह मिसात दु, इपिं छम्ह हे मांया म्ह्याय्पिं खः। 3 इमिसं मिश्रय् ल्यासेबलय् हे वेश्याया ज्या यात। अन इमिगु दुरुप्वः ज्वन, अले इमिगु कुमारी म्हयात तिसिल। 4 तताम्हय्सिगु नां ओहोला खः। केहेँम्हय्सिगु नां ओहोलिबा खः। इपिं जिगु हे खः, इमिसं काय्म्ह्याय्पिं बुइकल। ओहोला सामरिया खः, ओहोलिबा यरूशलेम खः। 5 “जिमि कलाः जूसां ओहोलां वेश्याया ज्या याना हे च्वन, अले अश्शूरय् च्वंपिं प्रेमीतलिसें लसपस यायेगु त्वःमतू। 6 इपिं वँचुगु वसः फिनातःपिं राज्यपालत व हाकिमत खः। इपिं सकलें ल्वःवनापुसे च्वंपिं ल्याय्म्हपिं व सल गया जुइपिं खः। 7 वं इपिंलिसें हे व्यभिचार यात, इपिं सकलें अश्शूरयापिं ततःधंपिं मनूत खः। वं सुयात यय्कल, इमिगु हे मूर्तिं व अशुद्ध जुल। 8 थः मिश्र देशय् दुबलय्निसें याःगु वेश्याया ज्या वं त्वःमतू। छाय्धाःसा व ल्यासेबलय् मनूत वलिसें द्यन, वयागु कुमारी अवस्थायागु दुरुप्वलय् इमिसं ल्हाः तल, अले वलिसें व्यभिचार यात। 9 “वं वया अश्शूरी प्रेमीयात तसकं यय्कूगु खः। अथे जुयाः जिं वयात वया प्रेमीत, अश्शूरया ल्हातय् बिया। 10 इमिसं वयात नांगा यात। इमिसं वया काय् म्ह्याय्पिन्त ज्वन, वयात तरवारं पालाः स्यात। मिसात मध्ये व बदनाम जुल, वयात सजाँय बिल। 11 “वया केहेँ ओहोलिबां व खन, अय्नं ओहोलिबा वेश्याया ज्या यायेगुलिइ थः तता स्वयाः यक्व स्यनावन। 12 वं अश्शूरी हाकिमत, राज्यपालत व बांबांलाःगु सेनाया वसः फिनाः सल गया जुइपिन्त यय्कल। इपिं सकलें ल्वःवनापुसे च्वंपिं ल्याय्म्हपिं मनूत खः। 13 व नं अशुद्ध जुइ धुंकूगु जिं खना। इपिं निम्हं तताकेहेँपिं छगू हे लँय् वन। 14 “वं ला थःगु वेश्याया ज्या झन अप्वय्कल। वं अंगलय् ह्याउँगु रंगं दय्कातःगु बेबिलोनी मिजंतय्गु किपा खन। 15 इमिसं जँय् जनी व छेनय् ताहाकःगु फेटा चिनातःगु दु, इपिं सकलें रथया हाकिमत थें खने दु। इपिं बेबिलोनिया देशय् बूपिं बेबिलोनी मनूत थें खने दु। 16 वं इमित खनेवं इमित यय्काः बेबिलोनीतय्गु देशय् इमिथाय् दूतत छ्वल। 17 अले बेबिलोनीत वयाथाय् वयागु मतिनाया खाताय् लसपस याः वल। अले वनापं व्यभिचार यानाः वयात स्यंकाबिल। इपिंपाखें व अशुद्ध जुइ धुंकाः दिक्क चायाः वयागु मन इपिंपाखें तापानावन। 18 “वं खनेदय्कः वेश्याया ज्या यात अले थःगु नांगा म्ह सकसितं क्यंगुलिं वया ततापाखें जिगु मन तापाःगु थें अथे हे वपाखें नं जिगु मन तापात। 19 अय्नं वं थः ल्यासेबलय् थःम्हं मिश्रय् याःगु वेश्याया ज्यायात लुमंकाः वं थःगु वेश्याया ज्यायात झन झन अप्वय्काहल। 20 अन गधायागु थें लिंग दुपिं व सलयागु थें वीर्य दुपिं थः प्रेमीपिन्त यय्काजुल। 21 थुकथं मिश्र देशय् छंगु छातिइ ल्हाः तःगु, छंगु ल्यासेबलय्या दुरुप्वः तिस्सिगु खँ लुमंकाः छं थःगु ल्यासेबलय्यागु कामुकताया इच्छा यात। ओहोलिबायात परमप्रभुया न्याय 22 “उकिं हे ओहोलिबा, जि, परमप्रभु परमेश्वरं थथे धाये – स्व! जिं छ दिक्क चाःपिं छिमि प्रेमीपिन्त छंगु विरोधय् ग्वाके अले इमित प्यखेरं छंगु विरोधय् हये। 23 जिं बेबिलोनयापिं मिजंपिं व फुक्क बेबिलोनियायापिं मिजंपिं, पकोद, शोअ व कोअयापिं मिजंपिं अले फुक्कं अश्शूरीतय्त हये। जिं उपिं फुक्क बांलाःपिं, ल्याय्म्हपिं हाकिमत, मू मू हाकिमत व सल गया जुइपिं सकसितं प्यखेरं छंगु विरोधय् हये। 24 इपिं छंगु विरोधय् उत्तरं ल्वाभः, रथत व गाडात व जाति जातियापिं सिपाइँतय्गु पुचःनापं वइ। तःधंगु व चिधंगु ढालत ज्वनाः व नँयागु तपुलि पुनाः इमिसं छन्त घेरय् याइ। जिं छन्त इमिगु ल्हातय् सजाँयया लागि बी। इमिसं थःगु चलन कथं छन्त सजाँय बी। 25 जिं थःगु दाहाया तं छपाखे स्वय्के, इमिसं छलिसें बांमलाःगु व्यवहार याइ। इमिसं छंगु न्हाय् व न्हाय्पं ध्यनाबी, छिमि म्वानाच्वंपिन्त तरवारं पालाः स्यानाबी। इमिसं छिमि काय् म्ह्याय्पिन्त लाकायंकी, छिमि ल्यंदुपिं मिं भस्म जुइ। 26 इमिसं छंगु वसः खुनाः छंगु बांबांलाःगु तिसातासा लाकायंकी। 27 थुकथं छं मिश्र देशय् शुरु यानाः आः तक याना वयाच्वंगु छंगु वेश्याया ज्या व मभिंगु ज्या जिं पनाबी। छं हाकनं गुबलें इमिपाखे कुइच्छां स्वइ मखु। छं हाकनं मिश्र देशयात लुमंकी मखु। 28 “छाय्धाःसा परमप्रभु परमेश्वरं थथे धयादी, जिं छन्त छं तसकं मयय्कूपिनिगु ल्हातय् लःल्हाये त्यनागु दु, जिं छन्त छ दिक्क चाःपिं मनूतय्गु ल्हातय् लःल्हाये त्यनागु दु। 29 इमिसं छन्त घृणा याइ। छंगु फुक्क कमाइ लाका काइ, अले छन्त नांगा यानाः त्वःताबी। छंगु वेश्याया ज्याया लज्या खने दइ। छं वेश्याया ज्या याःगुलिं व छ स्यनावंगुलिं 30 छन्त थज्याःगु अवस्थाय् हःगु खः। छाय्धाःसा जाति जातिया निंतिं छ वेश्या जुल अले इमिगु मूर्तितय्त पुजा यानाः छं थःत अपवित्र यात। 31 छ थः तताया लँय् वंगु दु। उकिं जिं वयागु सजाँयया ख्वला छंगु ल्हातय् बी। 32 “परमप्रभु परमेश्वरं थथे धयादी – “छं तग्वःगु व तःजाःगु छिमि ततायागु ख्वलां त्वनी, सकसिनं छन्त हेस्याइ अले हेला याइ, छाय्धाःसा उगु ख्वलाय् यक्व न्ह्यं। 33 थुकिं म्हाइपुइकाबी अले लगय् जुइकाबी, व छिमि तता सामरियायागु ख्वला खः, नाश व उजाडया ख्वला। 34 छं व ख्वला खालि मजुतले त्वनी, छं थुकियात कुचा कुचा जुइक तछ्याइ। अले छकु कुचा कयाः थःगु दुरुप्वलय् कियाबी।” जि परमप्रभु परमेश्वरं थ्व खँ न्ववानागु खः। 35 “उकिं परमप्रभु परमेश्वरं थथे धयादी – छं जितः ल्वःमंकल, अले छंगु जँधूफाःया ल्युने जितः तल, उकिं छं थःगु महापाप व व्यभिचारया लिच्वः भोगे यायेमाली।” निम्ह तताकेहेँपिन्त परमप्रभुया न्याय 36 परमप्रभुं जितः धयादिल, “अय् सीमानिम्ह मनू, छु! छं ओहोला व ओहोलिबाया न्याय यायेगु ला? अथे खःसा इमिसं याःगु घच्चाइपुगु ज्या इमित कनाब्यु, 37 छाय्धाःसा इमिसं व्यभिचार याःगु दु, इमिगु ल्हातय् हि दु। इमिसं थःगु मूर्तितनापं व्यभिचार यात, जिगु लागि बुइकूपिं इमि काय् म्ह्याय्पिन्त इमिसं उपिं मूर्तितय्गु न्ह्यःने मिइ बलि छाल। 38 इमिसं जिलिसें थथे नं याःगु दु, उखुन्हु हे इमिसं जिगु पवित्र थाय्यात अशुद्ध यात अले जिगु विश्रामबारयात मानय् मयात। 39 इमिसं थःकाय् म्ह्याय्पिन्त इमिगु मूर्तितय्गु निंतिं बलि छाःगु दिनय् हे इपिं जिगु पवित्रथाय् दुने दुहां वल, अले उकियात अपवित्र यात। इमिसं जिगु देगलय् थज्याःगु हे ज्या यात। 40 इमिसं तातापापिं मनूतय्त दूतत छ्वयाः नं सःतल, इपिं वल। “अय् ओहोला व ओहोलिबा छिमिसं इमिगु निंतिं म्वःल्हुल, मिखाय् अजः तल, अले तिसा पुनाः थःत बांलाकल। 41 छिपिं छगू बांलाःगु ताहाकःगु बेन्चाय् च्वन, उकिया न्ह्यःने तेबिल तयाः जिगु धुपाँय् व चिकं तल। 42 “मरुभूमि ग्वाः ग्वाः मनूत ब्वनाः हल, इपिं सकलें तसकं लय्ताः, अले इमिगु सः तसकं तसः। इमिसं उपिं निम्ह तताकेहेँपिनिगु ल्हातय् चुरि न्ह्याकाबिल, इमिगु छेनय् बांबांलाःगु श्रीपेच पुइकाबिल। 43 व्यभिचार यायां बुरी जुइ धुंकूम्ह छम्हय्सिगु बारे जिं धया, ‘आः वयात मेपिं वेश्यायात थें छ्यलेमा, छाय्धाःसा व व हे जक खः।’ 44 अले इपिं वलिसें वेश्यानापं द्यं थें द्यन। अथे हे इपिं कामुक मिस्त ओहोला व ओहोलिबानापं द्यन। 45 तर धर्मी मनूतय्सं धाःसा इमित व्यभिचारिणी व मनू स्याइपिं मिस्त धकाः न्यायया सजाँय बी, छाय्धाःसा इपिं व्यभिचारिणी मिस्त खः। इमिगु ल्हातय् मनू स्याःगुया हि लाःगु दु। 46 “परमप्रभु परमेश्वरं थथे धयादी – इमिगु विरोधय् छगू भीड हजि, अले इमित लुट व आतंकयात लःल्हानाब्यु। 47 भीडं इमित ल्वहँतं कय्की, अले इमिगु तरवारं इमित खतम याइ, इमि काय् म्ह्याय्पिन्त इमिसं स्याइ अले इमिगु छेँ छ्वय्काबी। 48 “थुकथं जिं देशय् व्यभिचार बन्द यानाबी, इपिं निम्ह मिसातय्सं व्यभिचार मयायेमा धकाः सकलें मिसातय्गु निंतिं थ्व ख्याच्वः जुइ। 49 छंगु व्यभिचारया सजाँय छं फयेमाली, छं याःगु मूर्ति पुजाया पापया सजाँय छं भोगे याइ। अले जि हे परमप्रभु परमेश्वर खः धकाः छं सी।” |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.