इजकिएल 15 - नेवाः बाइबलयरूशलेम, ज्यालगे मजूगु दाखमा 1 परमप्रभुयागु थ्व वचन जिथाय् वल, 2 “अय् सीमानिम्ह मनू, छमा दाखमाया सिँ गय् यानाः गुँइच्वंगु मेगु सिमातय् कचा स्वयाः भिं जुइ फइ? 3 उकिया सिं छुं चिज दय्के जी ला? मनूतय्सं उकिं छुं थल यख्खायेत नकिं दय्की ला? 4 अले उकियात सिँ यानाः मिइ तये धुंकाः अले उकिया निखेंपाखें मि च्यानाः दथुइच्वंगु ब्व हेंग्वाः जुइ धुंकाः व छुं ज्याया लागि ज्यालगे जुइ ला? 5 व छमा जूबलय् हे छुं ज्यालगे मजू धाःसा उकियात मिं छ्वय्काः हेंग्वाः जुइ धुंकाः झन व छु ज्या वइ धकाः? 6 “उकिं परमप्रभु परमेश्वरं थथे धयादी – गथे जिं गुँइच्वंगु सिमात मध्ये दाखया मायात सिँ जुइत मियात बियागु दु, अथे हे जिं यरूशलेमय् च्वंपिं मनूतय्त यानाबी। 7 अले जिं थःगु ख्वाः इमिगु विरोधय् तये, इपिं मिं पिहां वःसां इमित मिं हे भस्म यानाबी। जिं थःगु ख्वाः इमिगु विरोधय् स्वय्केबलय् छिमिसं जि हे परमप्रभु खः धकाः सी। 8 इमिसं जितः विश्वासघात याःगुलिं जिं इमिगु देशयात तहसनहस यानाबी, परमप्रभु परमेश्वरं धयादी।” |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.