प्रस्थान 39 - नेवाः बाइबलपुजाहारीतय्गु वसः 1 हारूनया निंतिं परमप्रभुं मोशायात उजं बियादीगुकथं पवित्र पालय् सेवा यायेत इमिसं वँचुगु, प्याजीगु, ह्याउँगु कां थानातःगु कापःयागु पवित्र वसः दय्कल। एपोद 2 इमिसं वँचुगु, प्याजीगु, व ह्याउँगु रंगयागु का, लुँयागु का व भिंगु सूती कापःयागु एपोद स्यल्लाक सुल। 3 इमिसं लुँयात मुगलं दायाः सालुगु पातात दय्कल। अले पातायात चानाः तार दय्काः उकियात वँचुगु, प्याजीगु व ह्याउँगु कानापं भिंगु सुति कापतय् बांलाक बुत्ता भरय् याये सःम्हय्सिनं थें तयाबिल। 4 अले थ्वयात कत्ताकातयेत निखेंया ब्वहलय् निगू ब्वहःकुचा स्वानाबिल। 5 परमप्रभुं मोशायात उजं बियादीगुकथं इमिसं एपोदया द्यःने बांलाक थानातःगु व हे ज्वलं वँचुगु प्याजीगु व ह्याउँगु कां व लुँयागु कां थानातःगु भिंगु सूती कापःयागु जँनी दय्कल। 6 इमिसं आनिक्स ल्वहं कयाः उकियात लुँयागु फाकुनय् थुनाबिल। उपिं ल्वहँतय् इस्राएलया झिंनिम्ह काय्पिनिगु नां बांलाक कियाबिल। 7 परमप्रभुं मोशायात उजं बियादीगुकथं इस्राएलया झिंनिगू कुलया नां लुमन्ति कथं हारूनं थ्व निकुतिं ल्वहंयात ब्वहलय् तल। छातिपाता 8 दकलय् तःधंम्ह पुजाहारीया निंतिं स्यल्लाःगु छातिपाता दय्कल। थ्व छातिपाता एपोद थें हे लुँयागु, वँचुगु, प्याजीगु व ह्याउँगु भिंगु सूती कापःयागु दय्कूगु खः। 9 थ्व प्यकुंलाःगु व निबः यानाः लथ्यानातःगु दु। अले थुकिया हाकः व ब्या क्वलाछि क्वलाछि दु। 10 थुकी प्यझ्वः यानाः थीथी मणि थुनाबिल। न्हापांगु झ्वलय् मानिक, पुष्पराज व फिरोजा, 11 निगूगु झ्वलय् प्याजीगु रंगयागु मणि, नीलम व पन्ना, 12 स्वंगूगु झ्वलय् कार्नेलेन, अकिक व प्याजीगु रंगयागु मणि। 13 प्यंगूगु झ्वलय् पुखराज, कार्नेलेन व जास्पर दय्कल। थ्व फुक्कयात लुँयागु फाकुनय् थुनाबिल। 14 इस्राएलया झिंनिम्ह काय्पिनिगु नांकथं झिंनिगः मणिया थी दु। झिंनिगलय् झिंनिगू हे कुलयागु नां कियाबिल। 15 छातिपातायात एपोदय् घायेत भिंगु लुँयागु निलातःगु सिखः दय्कल। 16 अले लुँयागु निगू फाकुं व निचाः चाः दय्काः उकियात छातिपाताया निखेंया कुनय् सुयाबिल। 17 लुँयागु निपुं सिखःयात छातिपाताय् च्वंगु निचालं लुँयागु चालय् चिनाबिल। 18 लुँयागु सिखःया मेगु च्वःयात एपोदया ब्वहलय् च्वंगु लुँयागु फाकुनय् चिनाबिल। 19 लुँयागु मेगु निचाः चाः दय्काः छातिपाताया ल्यूनेया च्वःपाखे एपोदया जँनी नापसं सुयाबिल। 20 हानं मेगु निचाः लुँयागु चाः दय्काः एपोदया न्ह्यःनेपाखे निखें जँनी चिनातःगु गथिया च्वसं सुयाबिल। 21 छातिपाता एपोदय् थाकेत छातिपाताया चाः व एपोदया चाःयात वँचुगु पुतुं जँनीलय् चिनाबिल। परमप्रभुं मोशायात उजं बियादीगुकथं थ्व फुक्कं दय्कल। पुजाहारीतय्गु मेगु वसः 22 एपोदया दुने फीगु पुजाहारीया लं ब्याक्क वँचुगु बांलाक थानातःगु कापतं सुल। 23 उकिया दथुइलाक छ्यं दुछ्वयेत प्वाः दय्कल, अले मगुइमा धकाः गःतांया छचाखेरं कापः तयाः सुयाबिल। 24 क्वय् सिथय् सिथय् प्यखेरं वँचुगु, प्याजीगु व ह्याउँगु भिंगु सुति कां धालेग्वः सुयाः घानाबिल। 25 क्वय् सिथय्या घानातःगु धालेग्वःया दथुइ दथुइ तयेत इमिसं भिंगु लुँया गं दय्कल। 26 परमप्रभुं मोशायात उजं बियादीगुकथं सेवा याः वनीबलय् फीगु पुजाहारीया लंया क्वय् सिथय् प्यखेरं लुँयागु गं व धालेग्वःयात छगः छगः अतः गाय्काः घानाबिल। 27-29 हारून व वया काय्पिनिगु निंतिं इमिसं परमप्रभुं मोशायात उजं बियादीगुकथं थानातःगु भिंगु सूती कापःयागु जामालं, बेतालि, छ्यंबाला व बागः सुर्वाः, अले बुत्ता भरय् यानातःगु वँचुगु, प्याजीगु व ह्याउँगु सूती कापःयागु जँनी दय्कल। 30 इमिसं छेनय् चीत भिंगु लुँयागु बाला छगू दय्काः उकी “परमप्रभुया निंतिं पवित्र” धकाः कियाबिल। 31 अले परमप्रभुं मोशायात उजं बियादीगु थें इमिसं व वँचुगु कां बेतालिइ चिनाबिल। नापलायेगु पालया ज्या पूवंगु 32 थुकथं नापलायेगु पालयागु फुक्क ज्या क्वचाल। परमप्रभुं मोशायात उजं बियादीगु थें हे मुक्कं इस्राएलीतय्सं यात। 33 इमिसं नापलायेगु पालया फुक्क ज्वलं मोशायाथाय् हल – पवित्र पाल व उकिया फुक्क ज्वलं, उकिया अंकुसि, सिँपौ, खगः, थां, लिधंसा, 34 पाल त्वपुइत इलांया स्वंगूगु व प्यंगूगु तँया इलां– ह्याउँगु रंग छिनातःगु फैया छेंगू व डल्फिनया छेंगूयागु अले सनूया न्ह्यःने च्वंगु पर्दा, 35 बाचा चिनादीगु सनू व प्रायश्चितया कृपा-आसन व उकिया न्वःत, 36 तेबिल व उकिया फुक्क ज्वलं व देछाया मरि, 37 भिंगु लुँया त्वाःदेवा व उकिया पाल्चा व मेगु ज्वलं व भिंगु चिकं, 38 लुँयागु वेदी, अभिषेक यायेगु चिकं, नस्वाःगु गुँगू, पवित्र पालया लुखाया पर्दा, 39 कँय्यागु वेदी, उकिया कँय्यागु चालिंचा, उकिया न्वःत व फुक्क ज्वलं, बाता व उकिया लिधंसा, 40 चुक थनेत खिपः व नकि अले ख्वातुगु कापः व उकिया थां व लिधंसा अले चुकया ध्वाखाया पर्दा। थथे इमिसं नापलायेगु पालया फुक्क ज्वलं व पवित्र पालय् सेवा यायेत 41 हारून पुजाहारीया पवित्र वसः व वया काय्पिनिगु वसः मोशायाथाय् हल। 42 परमप्रभुं मोशायात बियादीगु उजंकथं फुक्क ज्या इस्राएलीतय्सं यात। 43 परमप्रभुं बियादीगु उजंकथं फुक्क ज्या जूगु खनाः मोशां इपिं सकसित सुवाः बिल। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.