एस्तर 5 - नेवाः बाइबलएस्तरं जुजु व हामानयात भ्वय् सःतूगु 1 अपसं च्वंगु स्वन्हु खुन्हु एस्तरं थःगु शाही वसः पुन। अले दरबारया दुने च्वंगु चुकय् वनाः दनाच्वन। उबलय् जुजु लुखापाखे स्वयाः सिंहासनय् फेतुनाच्वंगु खः। 2 जुजुं एस्तर रानीयात चुकय् दनाच्वंगु खन। एस्तर रानीयात खनाः लय्ताल, अले ल्हातय् दुगु लुँया राजदण्ड व पाखे ल्ह्वन। एस्तर वनाः राजदण्डयागु च्वकाय् ज्वंवन। 3 जुजुं वयात धाल, “रानी एस्तर छन्त छु माल? छं न्ह्यागु हे फ्वंसां बी, जिगु बच्छि राज्य तकं छन्त बी।” 4 एस्तरं लिसः बिल, “महाराज, छसपोलयात येल धाःसा जिं छिगु लागिं ज्वरय् यानागु भ्वय् भपीत थौं हामाननापं झासँ।” 5 एस्तर याःगु इच्छा पूवंकेगु निंतिं जुजुं थथें हे हामानयात सःतके छ्वत। अले जुजु व हामान एस्तरं ज्वरय् यानातःगु भ्वय् नयेत वन। 6 दाखमद्य त्वँत्वं जुजुं एस्तरयात धाल, “छं जिके न्ह्यागु हे फ्वंसां जिं छन्त बी। छंगु इनाप छु खः? जिगु बच्छि राज्य तकं छन्त बी।” 7 एस्तरं लिसः बिल, “जिगु बिन्ति व इनाप थ्व दु, 8 छसपोलं जितः यय्कादियागु खःसा जिं फ्वनागु खँ पूवंकादीगु खःसा अले जिं इनाप यानागु खँ छितः यल धाःसा, कन्हय् नं छसपोल व हामान जिं ज्वरय् यानागु भ्वय् भपीत झासँ। कन्हय् हे जिं छसपोलयात थःगु खँ धाये।” हामानं मोर्दकैयात स्यायेगु ग्वसाः ग्वःगु 9 उखुन्हु हामान लय्तातां व खुसि जुजुं लिहां वन। तर वं मोर्दकैयात दरबारया मू ध्वाखाय् थःगु न्ह्यःने मदंसे व मग्यासें च्वनाच्वंगु खनाः व तसकं तंम्वल। 10 तर थम्हं थःत कःघानाः व छेँ वन। अनंलि वं थः पासापिन्त व थः कलाः जेरेशयात सःतके छ्वत, 11 अले हामानं इमित थःके धन-सम्पत्ति व काय्पिं यक्व दु धकाः धक्कु त्वःतल। जुजुं थःत तःधंगु पद ब्यूगु व मेपिं भारदारत व हाकिमत स्वयाः गुलि तःधं धकाः इमित धक्कु त्वःतल। 12 हामाननं धाल, “उलि जक मखु, रानी एस्तरं ज्वरय् याःगु भ्वय् नयेत जुजु व जितः जक इनाप याःगु खः। अले कन्हय् नं जितः जुजुनापं वं ज्वरय् याःगु भ्वय् नयेत इनाप याःगु दु। 13 गबले तक जिं यहूदी मोर्दकै दरबारया मू ध्वाखाय् फेतुनाच्वंगु खनी उबलय् तक व फुक्क जिगु निंतिं छुनं मखु।” 14 अले वया कलाः व सकल पासापिन्सं वयात धाल, “निइन्यागू मिटर तःजाःगु छगू फांसि बीगु थां थनादिसँ, अले सुथय् मोर्दकैयात थामय् यख्खाय्त जुजुयात इनाप यानादिसँ। अले खुसि जुयाः जुजुनापं भ्वय् नयेत झासँ।” हामानयात थ्व खँ तसकं यल अले वं व फांसि बीगु थां धस्वाके बिल। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.