एस्तर 2 - नेवाः बाइबलन्हूम्ह रानी माःगु 1 थनंलिपा थःगु तं क्वलाये धुंकाः जुजुं वश्ती रानी वं याःगु ज्याया विरोधय् पिकाःगु उर्दी लुमंकाच्वन। 2 अथे जुयाः जुजुयात सल्लाहबीपिं थः भारदारतय्सं थथे सल्लाह बिल, “छसपोलया निंतिं बांबांलाःपिं ब्याहा मजूनिपिं मिसात मालेत छ्वयादिसँ। 3 छसपोलं थः भारदारतय्त देशया फुक्क प्रान्तय् दुपिं बांबांलाःपिं बिया मछ्वनिपिं मिसात राजधानी शूशनय् च्वंगु मिसात तइगु दुनेया लाय्कुलिइ हयेत उजं बियादिसँ। अले इमित जुजुया मिसात कःघाना च्वंम्ह नपुंसक हेगेयात जिम्मा बियादिसँ। इमित थीथी कथंया समाः ज्वलं नं बियादिसँ। 4 अले छसपोलं गुम्ह मिसा यय्कादी वयात हे वश्ती रानीया पलेसा रानी दय्कादिसँ।” जुजुयात थ्व सल्लाह येल अले वं अथे हे यात। 5 राजधानी शूशनय् मोर्दकै नां दुम्ह छम्ह यहूदी च्वनीगु जुयाच्वन। मोर्दकै याईरया काय्, शिमीया छय् व कीशया छुइ अले बेन्यामीन कुलयाम्ह खः। 6 बेबिलोनया जुजु नबूकदनेसरं यहूदाया जुजु यहोयाकीननापं ज्वनाः यरूशलेमं यंकूपिनिगु पुचलय् मोर्दकैया परिवार नं दुगु जुयाच्वन। 7 मोर्दकैया एस्तर नांयाम्ह ककाया म्ह्याय् छम्ह दु। एस्तरया हिब्रू नां हदस्सा खः। व तसकं बांलाःम्ह व हिसि दुम्ह खः। वया मां-बौ सीधुंकाः मोर्दकैं वयात थः म्ह्याय् थें यानाः लहिनातःगु खः। 8 जुजुया उजं न्यंके धुंकाः राजधानी शूशनय् यक्व मिसात हल। उपिं मध्ये एस्तर नं छम्ह खः। अले वयात नं मिसात च्वनीगु दुनेया लाय्कुलिइ जुजुया मिसात कःघाना च्वंम्ह नपुंसक हेगेयात जिम्मा बिल। 9 एस्तरयात खनाः हेगे तसकं लय्तायाः वयात यय्कल अले एस्तरं वपाखें दया काये खन। थथें हे वं एस्तरयात समाः यायेत समाः ज्वलं व थीथी कथंया नसाज्वलं हयाबिल। एस्तरयात मिसात च्वनीगु लाय्कूया दुनेयागु दक्वसिबय् बांलाःगु थासय् यंकातल अले वयात समाः यायेत न्हय्म्ह लाय्कुलिइ ल्ययातःपिं भ्वातिं छ्वत। 10 मोर्दकैया आज्ञा कथं एस्तरं थः छम्ह यहूदी खः धयागु खँ सुपिकातःगु जुयाच्वन। 11 एस्तरयात छुं जुइ ला धकाः सीकेत मोर्दकै न्हियान्हिथं मिसात तइगु छेँया चुकया लिक्क चाःहिला च्वनीगु 12 मिसायात महाराज अहासूरसया न्ह्यःने यंके न्ह्यः वयात दच्छि थीथी कथं समाः यायेगु याइ, खुला तक मूर्रया चिकं व खुला तक चिकं व अत्तरया चिकं नं थाकेगु याइ। अले तिनि छम्ह छम्ह यानाः पालंपाः जुजुयाथाय् यंकीगु खः। 13 सुं नं मिसा जुजुया लाय्कुलिइ वनीबलय् वं फ्वंगु न्ह्याथें ज्याःगु खँ वयात मिसात तइगु छेँनं यंके बी। 14 बहनी व जुजु थः च्वनीगु क्वथाय् वनीगु अले कन्हय् सुथय् व मिसात तइगु मेगु छेँय् नपुंसक शाश्गजया जिम्माय् वनीगु खः। जुजुं नां कयाः मसःतुतले व हाकनं जुजुयाथाय् वने दइ मखु। एस्तर रानी जूगु 15 एस्तरया बौ अबीहेल खः। व मोर्दकैया कका खः। थ्व हे मोर्दकैया थः म्ह्याय् थें लहिनातःम्ह एस्तरया जुजुयाथाय् वनेगु पाः वल। वं मिसातय्त कःघाना च्वंम्ह नपुंसक हेगें सल्लाह ब्यूगु खँ बाहेक मेगु छुं नं मयंकू। एस्तरयात खँक्वसिनं तसकं बांलाः ताय्केगु खः। 16 थुकथं अहासूरसं राज्य याःगु न्हय्दँया तेबेत धाइगु झिला दुबलय् एस्तरयात जुजु च्वनेगु थासय् यंकल। 17 जुजुं मेपिं ब्याहा मजूनिपिं मिसातय्त स्वयाः एस्तरयात यक्वः माया यात। अले वयात तसकं यय्कल। अले वयागु छेनय् श्रीपेच पुइकाः वश्तीया थासय् वयात रानी यात। 18 अनंलि जुजुं एस्तरयात तःधंगु मान बियाः सकल भारदारत, हाकिमतय्त सःताः तःधंगु भ्वय् न्याय्कल। अले जुजुं फुक्क प्रान्तय् बिदा बीगु घोषणा यात अले जुजुं बीमाःगु कोसेलि इनाबिल। मोर्दकैनं जुजुयागु ज्यान बचय् याःगु 19 निक्व खुसि जुजुं ब्याहा मजूनिपिं मिसात मुंकूबलय् मोर्दकै जुजुया लाय्कूया मू ध्वाखाय् च्वनाच्वंगु खः। 20 मोर्दकैनं धाथें एस्तरं थः यहूदी खः धयागु खँ सुयातं मसीकू। थ्व खँ मोर्दकैनं धाःगु खः अले वं थ्व खँ मचां थें बांलाक मानय् यात। 21 छन्हु मोर्दकै जुजुया ध्वाखाय् च्वनाच्वंबलय् निम्ह जुजु ध्वाखा पिवाः बिग्थाना व तेरेश जुजुनापं असन्तोष जुयाः जुजुयात स्यायेगु ग्वसाः ग्वल। 22 थ्व मोर्दकैनं सियाः एस्तर रानीयात धयाबिल। रानीं मोर्दकैया नां कयाः जुजुयात थ्व खँ धयाबिल। 23 थ्व खँयात कयाः न्यंकं दुवालाः स्वःबलय् धात्थें खः धयागु दसि लुल अले जुजुं उपिं निम्ह मनूयात थामय् यख्खायाः स्यानाबिल। थुपिं फुक्कं खँ जुजुयागु न्ह्यःने इतिहासया सफुलिइ च्वल। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.