उपदेशक 1 - नेवाः बाइबल

फुक्‍क खँ सितिं वं

¹ दाऊदया काय्, यरूशलेमया जुजु, उपदेशकया वचन –

² उपदेशकं धाइ, “सितिं वं, सितिं वं, फुक्‍क सितिं वं, अले फुक्‍क खँया छुं अर्थ मदु।”

³ थ्‍व संसारय् मनुखं थाकुक ज्‍या यानाः दुःख सी अय्‌नं वयात छु फाइदा दत लय्?

⁴ पुस्‍ता वइ अले पुस्‍ता वनी, तर पृथ्‍वी धाःसा न्‍ह्याबलें दयाच्‍वनी।

⁵ सूर्य लुया वइ अले बिनावनी। अले व गनं वःगु खः अन हे वनी, व हाकनं लुया वइ।

⁶ फय् दच्‍छिनपाखे न्‍ह्याइ, अले उत्तरपाखे लिहांवनी। व न्‍ह्याबलें थःगु हे चाःकलय् चाःहिलाच्‍वनी।

⁷ फुक्‍क खुसित न्‍ह्यानावनाः समुद्रय् जू वनी। अय्‌नं समुद्र गुब्‍सं नं जाइ मखु। गुगु थासं खुसित न्‍ह्यानावःगु खः हाकनं व हे थासय् तुं लिहांवनी।

⁸ फुक्‍क खं दिक्‍क चाय्‌की, सुनानं थुकियात बयान याये हे फइ मखु। न मिखां खनाः लुधनी, न न्‍हाय्‌पं न्‍यनाः हे सन्‍तुष्‍ट जुइ।

⁹ न्‍हापा छु जूगु खः व हाकनं जुइतिनि, अले न्‍हापा छु याःगु खः व हाकनं याइतिनि। थ्‍व संसारय् छुं नं न्‍हूगु ज्‍याखँ जूगु मदु।

¹⁰ छुं नं खँ दु ला, गुकिया बारे थथे धायेफु, “स्‍वःसा, छु थ्‍व न्‍हूगु ज्‍या खः?” थ्‍व न्‍हापा हे थन दुगु खः। थ्‍व ला झीगु ई स्‍वयाः न्‍हापा हे दुगु खः।

¹¹ पुलांगु इलय्‌यापिं मनूतय्‌गु छुं नं लुमन्‍ति दइ मखु। अले आः वइतिनिगु पुस्‍ता व वयां लिपायागु पुस्‍तायात तकं नं इमिगु लुमन्‍ति दइ मखु।

बुद्धि सितिं वं

¹² जि उपदेशकं यरूशलेमय् इस्राएलया जुजु जुयाः शासन याना।

¹³ आकाशया क्‍वय् छु छु याइ उपिं फुक्‍कं ज्ञानपाखें माला स्‍वयेगु जिं थःगु नुगलय् पक्‍का याना। गुलि तःधंगु बोझ परमेश्‍वरं मनूतय्‌त तयाब्‍यूगु दु।

¹⁴ थ्‍व संसारय् याःगु फुक्‍क ज्‍याखँ जिं खनागु दु। व फुक्‍कया छुं अर्थ मदु, फय्‌यात लिइगु थें जक खः।

¹⁵ छु बेक्‍वःगु खः उकियात तप्‍यंके फइ मखु, छु खँ द हे मदु उकियात ल्‍याः खाइ मखु।

¹⁶ जिं थःगु मनय् थथे बिचाः याना, “स्‍व, जि स्‍वयाः न्‍हापा यरूशलेमय् राज्‍य याःपिं फुक्‍क स्‍वयाः अप्‍वः जिं बुद्धिया अनुभव यानागु दु। ज्ञान व बुद्धिया जिं यक्‍व अप्‍वः अनुभव यानागु दु।”

¹⁷ अले जिं बुद्धि, वँय्‌सू व मूर्खता धयागु छु खः धकाः सीकेगु निंतिं उकिया बारे बिचाः याना। तर थ्‍व नं फय्‌यात लिइगु थें जक खः धकाः जिं सीकागु दु।

¹⁸ छाय्‌धाःसा यक्‍व बुद्धि दत कि अप्‍वः दुःख सी, यक्‍व ज्ञान दत कि नुगःया घाः अप्‍वः जुइ।