दानिएल 9 - नेवाः बाइबलदानिएलं थःमनूतय्गु निंतिं प्रार्थना याःगु 1 बेबिलोनियाय् जुजु जूम्ह मादीवंशयाम्ह अहासूरसया काय् दाराया न्हापांगु दँय् 2 जि दानिएलं यर्मिया अगमवक्तायात ब्यूगु परमप्रभुया वचनकथं, धर्मशास्त्रपाखें यरूशलेम न्हयेदँ तकया लागि नाश जुइ धकाः सीकाकया। 3 उकिं अपसं च्वनाः भांग्रा फिनाः नउ बुलाः परमप्रभु परमेश्वरया न्ह्यःने प्रार्थना व दुनुगलंनिसें बिन्ति याना। 4 अले जिं थःगु पाप मानय् यानाः थः परमप्रभु जिमि परमेश्वरयात थथे प्रार्थना याना। “हे परमप्रभु, छि तःधंम्ह व मानय् यायेमाःम्ह खः, छितः माया याइपिन्त अले छिगु खँ न्यनीपिन्त छिं थःगु दयामायाया बाचा पूवंकादी। 5 जिमिसं पाप यानागु दु अले द्वंकागु दु। जिपिं मभिंपिं जुयागु दु अले विद्रोही जुयागु दु। जिपिं छिगु आज्ञा व नियमपाखें फहिला वनागु दु। 6 जिमि जुजुपिं, शासकत, पुर्खा व देशयापिं सकल प्रजालिसें छिगु नामय् न्ववाइपिं छि सेवक अगमवक्तातय्गु खँ जिमिसं मन्यना। 7 “हे परमप्रभु छि धर्मीम्ह खः, अय्नं थौं जिमिगु ख्वाः लज्यां त्वपूगु दु। जिमिसं छिके भलसा मतयागुलिं जिपिं यहूदा, यरूशलेम व इस्राएलयापिं मनूतय्त छिं सतिगु व तापाःगु देशय् छ्यालब्याल यानादीगु दु। 8 हे परमप्रभु, जिमि जुजुपिं, शासकत व पुर्खातय्सं छिगु विरोधय् वनाः पाप याःगुलिं जिपिं लज्याय् लाःगु दु। 9 छिगु खँ मन्यंसे जिपिं विरोधी जुयागु दु। अथे जूसां परमप्रभु जिमि परमेश्वर, छि दयादुम्ह व क्षमा यानादीम्ह खः। 10 हे परमप्रभु जिमि परमेश्वर, जिमिसं छिगु आज्ञा मानय् यानागु मदु, अले छिकपिनि च्यः अगमवक्तापाखें ब्यूगु नियम नं मानय् यानागु मदु। 11 छिगु आज्ञा मानय् मयासें सकल इस्राएलं छिगु व्यवस्था त्वाथूगु दु अले छिपाखें फहिलावंगु दु। “उकिं परमेश्वरया च्यः मोशाया व्यवस्थाय् च्वयातःगु सराः व फैसला जिमित लाःगु दु। छाय्धाःसा जिमिसं छिगु खँ मन्यंसें पाप यानागु दु। 12 जिमिथाय् तःधंगु विपत्ति हयाः जिमिगु व जिमि शासकतय्गु बारे न्ववानादीगु बचं छिं पूवंकादीगु दु। यरूशलेमय् वःगु विपत्ति थें ज्याःगु विपत्ति संसारय् गन नं मवःनि। 13 परमप्रभु जिमि परमेश्वरं जिमित माया यायेगु त्वःतूगु दु। थथे मोशाया व्यवस्थाय् च्वया तः थें थुपिं फुक्क विपत्ति जिमित लाःगु दु। अथे जूसां थःगु पाप त्वःताः वा छिगु सत्यया ल्यू वनाः जिमिसं परमप्रभु जिमि परमेश्वरया ग्वाहालि मालेत अस्वीकार यानागु दु। 14 अथे जूगुलिं छिं जिमिके विपत्ति हयादीगु दु। हे परमप्रभु परमेश्वर, छिं न्ह्यागु ज्या नं पाय्छिकथं यानादी। अय्नं जिमिसं छिगु खँ मन्यना। 15 “हे परमप्रभु जिमि परमेश्वर, छिं थः मनूतय्त बल्लाःगु ल्हातं मिश्र देशं पित हयाः थौं तक नं थःगु निंतिं नां तयादिल। जिमिसं पाप यानागु दु, जिमिसं मभिंगु ज्या यानागु दु। 16 हे परमप्रभु, छिगु फुक्क भिं ज्याकथं छिगु शहर व पवित्र पर्वत यरूशलेमं थःगु तं चीकादिसँ। जिमिगु पाप व जिमि पुर्खातय्गु मभिंगु ज्याया कारणं प्यखेरं लाःगु देश देशयापिं मनूतय्सं, यरूशलेम व छि मनूतय्त हेस्यानाच्वंगु दु। 17 “हे जिमि परमेश्वर, थःदासया प्रार्थना व दुनुगःया बिन्ति न्यनादिसँ। भज्यंक स्यंगु देगःयात छिगु थःगु नांया लागि हाकनं दय्कादिसँ। 18 “हे परमेश्वर, जिपिंपाखे थःगु न्हाय्पं बियादिसँ। थःगु मिखा चाय्काः जिमिगु झिजांमिजां दंगु हालत व छिगु नां दुगु शहरयात स्वयादिसँ। जिपिं धर्मीपिं खः धकाः जिमिसं थ्व इनाप यानाच्वनागु मखु तर छिगु तःधंगु दयाया कारणं खः। 19 “हे परमप्रभु न्यनादिसँ, हे प्रभु पाप क्षमा यानादिसँ, हे प्रभु जिमिगु बिन्ति न्यनाः वकथं ज्या यानादिसँ। छिगु नांया लागि आः लिबाकादी मते। थ्व शहर व छिकपिनि मनूतके छिगु हे नां दु।” गब्रिएल स्वर्गदूतं अगमवाणी थुइकाब्यूगु 20 जिगु व थः इस्राएली दाजुकिजापिनिगु पाप नाला कयाः परमप्रभु जिमि परमेश्वरयात वय्कःया पवित्र पर्वतया निंतिं बिन्ति याना हे च्वना। 21 जिं प्रार्थना यानाच्वनाबलय् जिं थःगु न्हापांयागु दर्शनय् खनाम्ह मनू, गब्रिएल याकनं ब्वयाः सन्ध्याया बां बीगु इलय् जिथाय् वल। 22 वं जितः थुइकाबिल, “हे दानिएल, छन्त बुद्धि व थुइकेगु ग्यां व ग्वाहालि बीत जि छन्थाय् वयागु दु। 23 छं बिन्ति यायेवं छन्त लिसः बियादिल, छाय्धाःसा छ परमेश्वरया लागिं तसकं तःजिम्ह खः। उकिं जि छन्त परमेश्वरया लिसः बीत वयागु दु। आः जिं व दर्शनयागु अर्थ थुइकाबीबलय् बांलाक न्यँ। 24 “पाप व मभिंपाखे छिमिगु जाति व पवित्र शहरयात त्वःतकेत, पाप क्षमा यायेत व अधर्मया प्रायश्चित यायेत परमेश्वरं न्हयेगू वाः क्वछिनादीगु दु। उकिं दर्शन व अगमवाणी पूवनी व पवित्र देगः हानं अभिषेक जुइ। 25 “थ्व सीकि अले थुइकि, यरूशलेमयात हाकनं दय्केत थ्व आज्ञा पिकाःगु इलंनिसें अभिषेक जूम्ह मनू, छम्ह शासक मवतले न्हय्गू वाः अले खुइनिगू वाः जुइ। दुःखया इलय् थ्व शहरयात लँ व चाकःछिं ताहाःगु गाःनापं हाकनं दय्की। 26 “अले खुइनिगू वाः लिपा व अभिषेक जूम्ह मनूयात स्याइगु जुइ अले वयाके छुं ल्यं दइ मखु। अले हमला याःवइम्ह छम्ह शासकया सेनां शहर व देगः नाश याइ। खुसिबाः वःगु थें अन्त वइ। उकिं परमेश्वरं तयार यानादीगु लडाइँ व विनाश हइ। 27 छवाःया लागिं थ्व हे शासकं यक्वनापं क्वातूगु बाचा ची, तर वाःया दथुइ वं बलि व देछा छायेगु दिकी। अले देगलय् घच्चाइपुगु व ग्यानापुगु मूर्ति खने दइ। व मूर्ति तःम्ह शासकयाके परमेश्वरं क्वःछिनादीगु नाश मलातले व मूर्ति अन दइ।” |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.