दानिएल 7 - नेवाः बाइबलदानिएलं खंगु दर्शन व उकिया अर्थ ७:१–१२:१३ प्यम्ह जन्तुया दर्शन 1 बेलसजर बेबिलोनयाम्ह जुजु जूगु न्हापांगु दँय्, चान्हय् दानिएलं म्हगस व दर्शन खन। वं व म्हगसया मू खँ च्वल। 2 दानिएलं धाल, “उखुन्हु चान्हय् जिं खनागु दर्शन थथे दु – प्यखेरं वःगु फसं समुद्रया लःयात संकाच्वन। 3 समुद्रं प्यंगू किसिमयापिं ततःधिकःपिं जन्तुत पिहां वल। 4 “न्हापां पिहांवःम्ह सिंह थें च्वंम्ह जन्तु खना, तर वयाके इमायाके थें पपू दु। जिं स्वयाच्वनाबलय् हे वयागु पपू पुल। अले व जन्तुयात मनू थें निपु तुतिं थनाबिल अले वयात मनूयागु मन बिल। 5 “अले भालू थें च्वम्ह निम्हम्ह जन्तु खना। व छखेपाखें दनाच्वंगु दु। वयागु म्हुतुया वायागु दथुइ स्वपु बपिक्वँय् दु। छगू सलं वयात धाल, ‘दनाः प्वाः जाय्क ला न।’ 6 “अनंलि चितुवा थें च्वंम्ह स्वम्हम्ह जन्तु खना। वयागु जँन्हुफातय् झंगःयागु थें प्यपा पपू दु। व जन्तुया प्यंगः छ्यं दु अले वयात शासन यायेगु अधिकार बिल। 7 “लिपा चान्हय् दर्शनय्, जिं प्यम्हम्ह जन्तु खना। व तसकं बल्लाः व ग्यानापुसे च्वं। वयागु नँयागु वां शिकारयात कुचा कुचा याइगु अले नइगु, ल्यं दुगुयात धाःसा वं तुतिं न्हुत्तुन्हुइगु। मेपिं स्वम्ह जन्तु स्वयाः व पाः, वयाके झिपु नेकू दु। 8 “जिं नेकूत स्वयाच्वनाबलय् नेकूतय् दथुइ छक्वलं मेगु चिपुगु नेकू बुयावल। अले व न्हूगु नेकुलिं न्हापायागु स्वंगुलिं नेकूयात हानापं लेहें थनाछ्वल। व नेकुलिइ मनूयागु थें मिखा व तःधंछुयाः खँ ल्हाइगु म्हुतु दु। न्ह्याबलें म्वानाच्वनादीम्ह 9 “जिं स्वयाच्वनाबलय् हे गद्दीत तल। छगू गद्दीइ न्ह्याबलें म्वानाच्वनादीम्ह च्वन। वय्कःया वसः च्वापु थें, सँ धाःसा यचुगु ऊन थें तुयुसे च्वं। वय्कःयागु दन्न थिनाच्वंगु गद्दी ह्वानाह्वाना च्यानाच्वंगु पांग्राया च्वय् तयातःगु दु। 10 अले व गद्दीं तःधाःगु मित्याः मदिक्क पिहां वयाच्वंगु दु। द्वलंद्वः मनूत वय्कःया सेवा यायेत न्ह्यःने दु। वय्कःया न्ह्यःने लखंलख मनूत दनाच्वंगु दु। न्याययागु अदालत अन हे च्वन। अले सफूत प्वल। 11 “जिं स्वयाच्वनाबलय् व चिपुगु नेकुलिं तःधंछुयाः ततःधंगु खँ ल्हाःगु जिं ताल। व जन्तुयात स्यानाः वयागु म्हयात नाश यानाः ह्वाना ह्वाना च्यानाच्वंगु मिइ वांमछ्वतले जिं स्वया हे च्वना। 12 मेपिं जन्तुतय्गु अधिकार लाकाकाल तर छुं ई तक इमित म्वाके बिल। 13 “चान्हय्यागु जिगु दर्शनय् जिं मनूया काय् थें च्वंम्ह सुं छम्ह आकाशया सुपाँय्नापं झायाच्वंगु खना। अले वय्कः न्ह्याबलें म्वानाच्वनादीम्हय्सिया थ्यन अले इमिसं वय्कःयात वय्कःया न्ह्यःने हल। 14 वय्कःयात अधिकार, हनाबना व राज्य बिल। जाति जाति, देश देश व थीथी भाय् ल्हाइपिं सकसिनं वय्कःयागु आराधना यात। वय्कःया शासन न्ह्याबलें दयाच्वनी अले वय्कःया राज्य गुबलें क्वचाइ मखु। दर्शनया अर्थ 15 “जि दानिएलयात छु याये छु याये जुल। जिं खनागु दर्शनं जिगु नुगः भाराभारा मिन। 16 अन दनाच्वंपिं मध्ये जि छम्हय्सिथाय् वनाः थुपिं फुक्क खँया अर्थ न्यना। वं थथे धयाः जितः अर्थ कन। 17 ‘थुपिं ततःधिकःपिं प्यम्ह जन्तु पृथ्वीइ पलिस्था जुइगु प्यंगू राज्य खः। 18 लिपतय् दक्व शक्ति दुम्ह परमेश्वरया पवित्र मनूतय्त राज्य दइ। उकी इमिसं सदां सदांया लागि अधिकार याइ।’ 19 “अले जितः व मेपिं स्वयाः पाःम्ह तसकं ग्यानापुसे च्वंम्ह प्यम्हम्ह जन्तुया अर्थ सीकेमास्ति वल। वयागु नँया वा व कँय्यागु लुसिं शिकारयात कुचा कुचा याइगु अले नइगु, ल्यं दुगुयात धाःसा तुतिं न्हुत्तुन्हुइगु। 20 वयागु छेनय् दुगु झिपु नेकू व अनं पिहां वःगु मेगु नेकूया खँ थुइके मास्ति वल। अले न्हापायागु स्वपु नेकू पुया ब्यूगु खँ छु जुल धकाः नं सीकेमास्ति वल। थ्व हे मेगु फुक्क नेकू स्वयाः ग्यानापुस्से च्वंगु नेकुलिइ मिखा व तःधंछुयाः न्ववाइगु म्हुतु दु। 21 जिं स्वयाच्वनाबलय् व हे नेकुलिं परमेश्वरया पवित्र मनूतलिसें लडाइँ यात अले इमित बुकल। 22 अनंलि व न्ह्याबलें म्वानाच्वनादीम्हय्सिनं झायाः दक्वसिबय् तःधंम्ह परमेश्वरया पवित्र मनूतय्गु पंलिनाः फैसला यात। उबलय् परमेश्वरया पवित्र मनूतय्सं राज्य अधिकार याइगु ई वःगु खः। 23 “जितः उकियागु अर्थ थुकथं थुइकल, ‘व प्यम्हम्ह जन्तु पृथ्वीइ पलिस्था जुइगु प्यंगूगु राज्य खः। थ्व हे राज्य मेगु फुक्क राज्य स्वयाः पाइ। वं फुक्क पृथ्वीयात नयाबी अले उकियात न्हुयाः धू यानाबी। 24 उपिं झिपु नेकूया अर्थ व राज्यं वइपिं झिंम्ह जुजुपिं खः। इपिं लिपा मेम्ह छम्ह जुजु वइ। व न्हापायापिं जुजुपिं स्वयाः पाइ, वं उपिं स्वम्ह जुजुपिन्त बुकी। 25 वं दक्वसिबय् तःधंम्ह परमेश्वरयागु विरोधय् खँ ल्हाइ, अले परमेश्वरया पवित्र मनूतय्त क्वत्यला तइ। वं धार्मिक नियम व नखःचखः हिलेत स्वइ। अले पवित्र मनूतय्त वयागु ल्हातय् छगू काल, निगू काल व बच्छि कालया निंतिं लःल्हानाबी। 26 “‘अय्नं न्यायया अदालत च्वनी, अले वयागु बल लाकाकयाः वयात सदांया निंतिं नाश हे यानाबी। 27 पृथ्वीया फुक्क राज्यतय्गु शक्ति व तःधंसू दकलय् तःधंम्ह परमेश्वरया पवित्र मनूतय्गु ल्हातय् बी। वय्कःया राज्य न्ह्याबलें दयाच्वनीगु राज्य जुइ। फुक्क राज्यं वय्कःया खँ न्यनी व वय्कःयागु सेवा याइ।’ 28 “जिगु खँ थन हे सिधल। जि दानिएल तसकं ग्यात, जिगु ख्वाः हे वँचुसे च्वन। अय्नं जिं थ्व खँ थःगु मनय् हे तया।” |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.