दानिएल 4 - नेवाः बाइबलनबूकदनेसर जुजुं खंगु सिमाया म्हगस 1 नबूकदनेसर जुजुं संसारया जाति जाति, देश देश व थीथी भाय् ल्हाइपिं मनूतय्थाय् थ्व बुखँ छ्वत– छिमिगु भिं जुइमा! 2 दक्वसिबय् तःधंम्ह परमेश्वरं जिगु निंतिं यानादीगु अजू चाइपुगु चिं व अजू चाइपुगु ज्याया बारे छिमित कने दुगुलिं जि लय्ताया। 3 वय्कःया चिं गुलि तःधं, वय्कःया अजू चाइपुगु ज्या गुलि बल्लाः! वय्कःया राज्य न्ह्याबलें दयाच्वनीगु राज्य खः, अले वय्कःया शासन पुस्तांनिसें पुस्ता तक दयाच्वनी। 4 जि नबूकदनेसर थःगु लाय्कुलिइ याउँक व बांलाक च्वनाच्वना। 5 आकाझाकां छगू म्हगस खनाः जि ग्यात। जि थःगु लासाय् ग्वारातुला च्वनाबलय् जिगु मनय् वःगु बिचाः व जिं खनागु दर्शनं जितः ख्यात। 6 उकिं व म्हगसया अर्थ कनेत बेबिलोनयापिं सकल ज्ञान दुपिं मिजंतय्त जिगु न्ह्यःने हयेगु आज्ञा बिया। 7 जादु क्यनिपिं, ज्वखना स्वइपिं वःबलय् जिं इमित म्हगस कना, ज्योतिषीतय्त व साइत स्वइपिं वःबलय् जिं इमित म्हगस कना, अय्नं इमिसं उकिया अर्थ कने मफुत। 8 लिपतय् दानिएल धाःम्ह मनू जिथाय् वल अले जिं वयात म्हगस कना। (वयागु नां जिमि द्यःया नामय् बेलतसजर तःगु खः। अले वयाके पवित्र द्यःतय् आत्मा दु।) 9 जिं वयात धया, “हे बेलतसजर, जादु क्यनीपिनि नायः, छंके पवित्र द्यःतय्गु आत्मा दु धकाः जिं स्यू। अले छन्त छुं नं सुलाच्वंगु खँया अर्थ कनेत थाकुइ मखु। म्हगसय् जिं खनागु दर्शन न्यँ, अले जितः उकिया अर्थ कँ। 10 लासाय् ग्वारातुला च्वनाबलय् जिं खनागु दर्शन थ्व हे खः – पृथ्वीया दथुइ तःमागु छमा सिमा दु! 11 व सिमा बल्लाः व तःमा जुल अले उकिया च्वकां आकाश थिल। संसारया न्ह्याथासं नं व सिमा खने दु। 12 उकिया हः बांला, माय् गाक्क फल सयाच्वंगु दु। उपिं फल संसारयापिं फुक्कसित नयेत गा। सिमाया क्वय् गुँपशु च्वनीगु अले आकाशय् च्वंपिं झंगःपंक्षी उकिया कचामचाय् बाय् च्वनीगु। अले फुक्क प्राणीतय्सं उकिया फल नइगु। 13 “लासाय् ग्वारातुला च्वनाबलय् आकाझाकां जिं दर्शनय् स्वर्गं छम्ह पवित्रम्ह पिवाः स्वर्गदूत वयाच्वंगु खना। 14 वं तस्सलं धाल, ‘व सिमा पालाः क्वःथलाब्यु, उकिया कचामचा पालाब्यु, उकिया हः हाय्काछ्व, उकिया फल छ्यालब्याल यानाब्यु। पशुत उकिया किचलं व झंगःत उकिया कचां बिस्युं वनेमा। 15 सिमाया थुथायात नँ व कँय्यागु पातां चिनाः उकिया थुथा हा नाप बँय् त्वःताबीमाः। “‘व ख्यःया घाँय्या दथुइ दयेमाः। थ्व मनूयात आकाशया सुति लखं प्याकेमाः। अले पशुतलिसे पृथ्वीया स्वांसिमाया दथुइ च्वनेमाः। 16 वयागु मन न्हय्गू कालया लागि पशुया मनय् हिलावनेमा। 17 “‘थज्याःगु फैसला पिवाः स्वर्गदूततय्सं क्वःछ्यूगु खः। दक्वसिबय् तःधंम्ह परमेश्वरया संसारया फुक्क देशय् अधिकार दु, अले वय्कलं थःम्हं हे ल्ययादीपिन्त शासन यायेत देशत बियादी, अज्ज ला उकी शासन यायेत दकलय् चिधंपिन्त नं तयादी, धयागु खँ फुक्क मनूतय्सं सीमा धकाः पवित्रपिन्सं थज्याःगु फैसला घोषणा याःगु खः।’ 18 “जि नबूकदनेसर जुजुं खनागु म्हगस थ्व हे खः। आः हे बेलतसजर, थुकिया अर्थ जितः कनाब्यु। छाय्धाःसा जिगु देशय् दुपिं सुं ज्ञान दुम्हय्सिनं नं थुकिया अर्थ जितः कने फइ मखु। तर छं फइ छाय्धाःसा पवित्र द्यःतय्गु आत्मा छंके दु।” दानिएलं म्हगसया अर्थ कंगु 19 थ्व खँ न्यनाः दानिएल (गुम्हय्सित बेलतसजर नं धाः) पलख थुरथुर खात, म्हगसया अर्थं वयात ख्यात। जुजुं वयात धाल, “हे बेलतसजर, म्हगस व उकिया अर्थ कनेत छ ग्याये मते।” बेलतसजरं धाल, “हे जिमि प्रभु, थ्व म्हगस व उकिया अर्थ छःपिनि शत्रुतय्त जूगु जूसा ला ज्यूगु नि। 20 छःपिन्सं खनादीगु बल्लानाः तःमा जुयाः आकाश थीगु सिमायात संसारय् च्वंपिं सकसिनं खंके फु। 21 उकिया हः बांलाः अले फल संसारयापिं सकसितं नयेत गाः। व सिमाया क्वय् गुँपशुत च्वनीगु अले उकिया कचामचाय् झंगःपंक्षीत स्वँय् च्वनीगु। 22 हे महाराज, व सिमा छःपिं हे खः! छःपिं थाहां झायाः आकाश तक हे थ्यंम्ह तःधंम्ह मनू जुयादीगु दु। अले छःपिनिगु बल संसार न्यंक न्यनावंगु दु। 23 “हे महाराज, छःपिन्सं स्वयाच्वनादीबलय् स्वर्गं छम्ह पवित्र पिवाः स्वर्गदूत वयाः धाल, ‘व सिमायात पालाः नाश यानाब्यु तर उकिया थुथायात हा नाप बँय् हे त्वःताब्यु। उकियात नँ व कँय्यागु सिखलं च्यु अले ख्यलय् घाँय्या दथुइ त्वःताब्यु। व मनू आकाशया सुति लखं प्यायेमाः, न्हय्गू काल तक व गुँपशुत थें म्वायेमाः।’ 24 “हे महाराज, उकियागु अर्थ व दकलय् तःधंम्ह परमेश्वरं छःपिनिगु लागि क्वःछिनादीगु आज्ञा थ्व हे खः। 25 मनूतय् राज्यय् दक्वसिबय् तःधंम्ह परमेश्वरयागु अधिकार दु व वय्कःयात सु यः वयात राज्य बियादी धयागु खँ छःपिन्सं सीकामकातले न्हय्गू काल तक मनूतपाखें छःपिन्त लिनाछ्वइ। छःपिं गुँपशुतलिसें च्वनादीमाः। छःपिन्सं सा द्वहंनं थें घाँय् नयादी अले आकाशया सुति लखं छःपिन्त प्याकी। 26 थुथा हा नाप बँय् त्वःताब्यु धाःगु आज्ञायागु अर्थ थ्व खः – स्वर्गं शासन याइ धइगु खँ छःपिन्सं सीकादीबलय् छःपिन्त हाकनं राज्य लितबी। 27 उकिं हे महाराज, जिगु सल्लाह स्वीकार यानादिसँ। खःगु ज्या यानाः थःगु पापयात त्वःतादिसँ अले छुं मदुपिन्त माया यानाः मभिंगु ज्या त्वःतादिसँ। अथे याःसा छःपिनिगु भिं जुया हे च्वनी।” म्हगसया खँ पूवंगु 28 थ्व फुक्क खँ जुजु नबूकदनेसरयात जुल। 29 झिंनिला लिपा जुजु बेबिलोनयागु लाय्कूया कःसिइ चाःहिला च्वंबलय् 30 वं धाल, “छु थ्व जिं थःगु नां व महिमाया लागि जिगु बलं राजधानी दय्काःगु तःधंगु बेबिलोन मखु ला?” 31 जुजुं थथे धयाच्वंबलय् हे स्वर्गं छगू थज्याःगु सः वल, “नबूकदनेसर जुजु, छंगु निम्ति छगू आज्ञा दु। छंगु राज्य छंकेनं लाकाकाःगु दु। 32 मनूतय् राज्यय् दक्वसिबय् तःधंम्हय्सिगु फुक्क अधिकार दु, व वय्कःयात सु यः वयात बियादी धयागु खँ छं सीकामकातले न्हय्गू काल तकया लागि मनूतय् दथुं छन्त लिनाछ्वइ, अले छ गुँपशुत लिसे च्वनी। छं सा द्वहंनं थें घाँय् नयेमाली।” 33 नबूकदनेसरया बारे धाःगु खँ थत्थें पूवन। वयात मनूतय् दथुं लिनाछ्वत अले वं सा-द्वहंतय्सं थें घाँय् नयाहल। आकाशया सुति लखं वयागु म्ह प्यात अले वयागु सँ इमाया पा थें व लुसि झंगःया लुसि थें जुल। नबूकदनेसरं दक्वसिबय् तःधंम्ह परमेश्वरयात च्वछाःगु 34 न्हय्गू काल बिनावने धुंकाः जि नबूकदनेसरं थःगु मिखा थस्वकाः स्वर्गपाखे स्वया अले जिगु बुद्धि न्हापा थें तुं जुल। जिं दकलय् तःधंम्ह परमेश्वरयात च्वछाया अले न्ह्याबलें म्वानादीम्हय्सित हनाबना व महिमा बिया। वय्कलं न्ह्याबलें राज्य यानादी अले वय्कःया राज्य पुस्तांनिसें पुस्ता तक दयाच्वनी। 35 “पृथ्वीयापिं सकलें मनूत परमेश्वरया न्ह्यःने छुं नं मखु, स्वर्गया दूतत व पृथ्वीयापिं मनूतय्त वय्कलं थः यःथें यानादी। सुनानं वय्कःया ल्हाः पने फइ मखु अले वय्कःयात छिं छु यानादियागु? धकाः न्यने फइ मखु।” 36 जिगु बुद्धि लिहां वःबलय् जिगु महिमा, हनाबना, व जिगु राज्यया गौरव जितः लित बिल। जितः सल्लाह बीपिं व भारदारत जितः नापलाः वयेगु यात। अले जि हाकनं थःगु गद्दीइ लिहां वया अले जि न्हापा स्वयाः तःधन। 37 आः जि, नबूकदनेसरं, स्वर्गयाम्ह जुजुयात तःधंके, वय्कःयात तःधंके, अले हनाबना याये छाय्धाःसा वय्कलं यानादीगु फुक्क खँ पाय्छि जू व वय्कःया फुक्क लँपु न्यायलं जाः। तःधंछु जुया जुइपिन्त वय्कलं क्वमिलु यानादी फु। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.