दानिएल 10 - नेवाः बाइबलटाइग्रिस खुसि सिथय् दानिएलं खंगु दर्शन 1 फारसया जुजु कोरेसया स्वँगूगु दँय् दानिएलयात छगू बुखँ बिल (गुम्हय्सित बेलतसजर नं धाः)। थ्व बुखँ धात्थेंगु खः। थ्व छगू तःधंगु लडाइँया बारे खः। वयाथाय् दर्शनय् व बुखँया अर्थ वःगु खः। 2 अबलय् जि दानिएल स्वँगू वाः तक दुखं च्वना। 3 जिं स्वंगू वाः फुना मवंतले छुं साःगु नसा मनया, ला मनया, दाखमद्य मत्वना, सँय् चिकं मतया। 4 व दँया न्हापांगु लाया निइप्यंगूगु न्हिइ, जि तःधंगु टाइग्रिस खुसिया सिथय् दनाच्वनाबलय् 5 जिं च्वय्पाखे स्वया, जिगु न्ह्यःने सुतियागु वसः फिनातःम्ह व जँय् भिंगु लुँया जनी चिनातःम्ह मनूयात खना। 6 वयागु म्ह पुखराज थें च्वं, वयागु ख्वाः हावलासा त्वःगु थें च्वं अले वयागु मिखा मिप्वाः थें च्वं, वयागु ल्हाःतुति प्वाला प्वाला थीगु कँय् थें च्वं अले वयागु सः ग्वाः ग्वाः मनूतय्गु सः थें च्वं। 7 जि दानिएलं जक व दर्शन खनागु खः। जिनापं दुपिं मनूतय्सं छुं नं मखं तर इपिं तसकं ग्यानाः सुपिलेत बिस्युं वन। 8 अथे जुयाः जि जक अन च्वना, थ्व अजू चाइपुसे च्वंगु दर्शन स्वयाच्वना। थुकिं यानाः जिके बल मन्त, जिगु ख्वालय् रंग नं मन्त। 9 अले जिं व न्ववानाच्वंगु सः ताल। जिं वयागु सः न्यनेवं स्याक्क न्ह्यः वयाः जि बँय् भ्वसुल। 10 जि ग्यानाः थुरथुर खानाः च्वंबलय् छपु ल्हातं जितः थियाः जिगु ल्हाः व पुलिं चुइकल। 11 स्वर्गदूतं जितः धाल, “हे दानिएल, छ परमेश्वरया लागि तःजिम्ह खः, तप्यंक दँ अले जिं धायेत्यनागु खँ बांलाक न्यँ। छाय्धाःसा जितः छन्थाय् छ्वयाहःगु दु।” वं थथे धाये धुंकाः जि थुरथुर खाखां दना। 12 हानं वं जितः धाल, “हे दानिएल, ग्याये मते, छं दुग्यां कायेगु क्वछ्यूगु न्हापांगु दिंनिसें व छिमि परमेश्वरया न्ह्यःने थःत क्वमिलु याःबलय् निसें छंगु प्रार्थना न्यनादीगु दु। जि व हे लिसः बीत वयाम्ह खः। 13 तर फारस देशयाम्ह शासकं निइछन्हु तक जिगु विरोध यात। अनंलि अन लिबाकागुलिं छम्ह मू स्वर्गदूत मिखाएल जितः ग्वाहालि बीत वल, छाय्धाःसा जितः फारसयाम्ह शासकनापं त्वःतूगु खः। 14 छिमि जातियापिं मनूतय्त लिपा छु जुइ धइगु खँ छन्त थुइकेत जि वयागु दु। छाय्धाःसा थ्व दर्शन लिपाया ईया बारे खः।” 15 वं अथे धाये धुंकाः जिं थःगु ख्वाः क्वछुकाः छुं हे धाये मफुत। 16 अले मनू थें खने दुम्ह छम्हय्सिनं जिगु म्हुतुसि थिल, जिं हाकनं नवाये फत। अले जिं वयात धया, “जिमि प्रभु, दर्शनं यानाः जितः तसकं सास्ती जुल अले जिके भतिचा नं बल मन्त। 17 जिमि प्रभु, छि दासं प्रभु थें ज्याःम्हलिसें गथे खँ ल्हायेगु? जिके बल नं मदये धुंकल, सासः ल्हायेत नं थाकुइ धुंकल।” 18 अले व मनू थें च्वंम्हय्सिनं हाकनं जितः थियाः बल बिल। 19 वं धाल, “हे दानिएल, छ परमेश्वरया लागिं तसकं तःजिम्ह खः, छ ग्याये मते, छन्त शान्ति दयेमा, बल्ला व साहसी जु।” वं उलि धायेवं हे जिके बल वल अले जिं धया, “हे जिमि प्रभु, छिं जितः बल बियादीगुलिं आः धयादिसँ।” 20-21 अले वं न्यन, “जि छन्थाय् छाय् वयागु धकाः छं स्यू ला? सत्य वचनया सफुलिइ छु च्वयातःगु दु व कनेत जि छन्थाय् वयागु दु। आः जि याकनं हे फारसयाम्ह राजकुमारलिसें ल्वायेत लिहां वने। अनंलि जि वने धुंकाः ग्रीसयाम्ह राजकुमार वइ। जितः ग्वाहालि बीम्ह इस्राएलया मू स्वर्गदूत मिखाएल बाहेक मेपिं सुं मदु।” |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.