प्रेरित 4 - नेवाः बाइबलपत्रुस व यूहन्नायात सभाय् यंकूगु 1 पत्रुस व यूहन्ना थथे मनूत नाप खँ ल्हाना च्वंबलय् पुजाहारीत, देगःया कप्तान व सदुकीत अन वल। 2 पत्रुस व यूहन्नां मनूतय्त येशू सिनाः हानं म्वाना वः थें तुं मेपिं मनूत नं सिनाः म्वाना वइतिनि धकाः स्यनाच्वंगु न्यनाः इपिं तसकं तंम्वय्का च्वन। 3 अले इमिसं इपिं निम्हय्सितं ज्वनायंकाः चच्छि कुनातल, छाय्धाःसा उबलय् बहनी जुइ धुंकल। 4 अथेसां इमिगु खँ न्यनाः यक्वसिनं हे विश्वास यात। थथे विश्वास याःपिं मिजंत जक हे न्याद्वः ति दत। 5 कन्हय् खुन्हु इमि शासकत, थकालिपिं व शास्त्रीत यरूशलेमय् मुन। 6 अन दकलय् तःधंम्ह पुजाहारी हन्नास, वया थःथितिपिं कैयाफा, यूहन्ना, अलेक्जेन्डर व मेमेपिं दकलय् तःधंम्ह पुजाहारीया परिवार नं दु। 7 इमिसं पत्रुस व यूहन्नायात दथुइ थनाः थथे धकाः न्यन – “छुकियागु शक्तिं, अथवा सुयागु नामं छिमिसं थ्व ज्या यानागु?” 8 पवित्र आत्मां जायाः पत्रुसं दनाः थथे लिसः बिल – “शासकत व थकालिपिं, 9 छिकपिन्सं जिमित छम्ह लंग्राम्ह मनूयात लाय्का बियाः भिंगु ज्या यानागुलिं थुलिमछि खँ न्यनादिल। 10 का सा, छिकपिं व इस्राएली मनूत फुक्कसिनं बांलाक न्यनादिसँ – नासरतयाम्ह येशू ख्रीष्टयात छिकपिन्सं क्रूसय् यख्खानाः स्यात, अय्नं परमेश्वरं सीम्हय्सित हानं म्वाकादिल। थ्व हे येशू ख्रीष्टयागु नामं थ्व मनू छिकपिनिगु न्ह्यःने थथे लनाः दनाच्वने फुगु खः। 11 धर्मशास्त्रय् थ्व हे येशूयागु खँ थथे च्वयातःगु दु – “‘दकःमितय्सं ज्यालगय् मजू धकाः वांछ्वःगु ल्वहं हे मू ल्वहं जुल।’ 12 “अय्जूगुलिं येशूयागु नामं जक मुक्ति दइ, मेपिनिगु नामं मुक्ति दइ मखु। सारा संसारय् झीत बचय् याये फुम्ह मेम्हय्सिगु नां परमेश्वरं बियादीगु मदु।” 13 पत्रुस व यूहन्नां आखः मसःसां थथे मग्यासे लिसः ब्यूगु न्यनाः फुक्कं छक्क जुल। अले इपिं येशू नाप जूपिं खः धकाः नं इमिसं सिल। 14 हानं लाःम्ह लंग्राम्ह मनू नं थःपिंनापं दनाच्वंगुलिं इमिसं छुं हे धाये मफुत। 15 अले इपिं निम्हय्सितं पिने छ्वयाः थःथवय् सल्लाह यात – 16 “थ्व मनूतय्त झीसं आः छु यायेगु? इमिसं थ्व अजू चायापुगु चिं यानाक्यंगु यरूशलेमय् च्वंपिं फुक्कसिनं स्यू। झीसं थ्व खँयात मखु धकाः धाये फइ मखु। 17 अय्सां थ्व खँयात न्यंकभनं थ्यंके मज्यू। अय्जूगुलिं इमित आवंलि येशूयागु छुं नं खँ न्यंके दइ मखु धकाः ख्याच्वः बी माल।” 18 अले इमित हानं दुने सःताः येशूयागु नामं सुयातं स्यनेकने याये मते धकाः उजं बिल। 19 अय्नं पत्रुस व यूहन्नां थथे लिसः बिल – “परमेश्वरया न्ह्यःने जिमिसं छिकपिनिगु खँ न्यनेगु ला कि वय्कःयागु खँ न्यनेगु? छिकपिन्सं हे धयादिसँ। 20 जिमिसं थःपिन्सं खंगु व ताःगु खँ मधासे च्वने मफु।” 21 इमिसं याःगु अजू चायापुगु ज्या खनाः अन च्वंपिं फुक्क मनूत परमेश्वरयागु नां कयाः लय्लय् ताया च्वंगुलिं व सजाँय बीत त्वहः लुइके मफयाः ख्या जक ख्यानाः इमित त्वःता छ्वल। 22 व लाःम्ह लंग्राम्ह मनू पिइदँ मयाये धुंकूम्ह खः। मग्यासे नवाये फयेमा धकाः प्रार्थना याःगु 23 थथे त्वःता हये धुंकाः पत्रुस व यूहन्ना थः पासापिन्थाय् वन। इमिसं तःधंपिं पुजाहारीतय्सं व थकालिपिन्सं धयाहःगु खँ फुक्कं इमित कन। 24 इमिगु खँ न्यनाः इपिं फुक्कं मिलय् जुयाः परमेश्वरयात थथे प्रार्थना यात – “प्रभु, छिं हे स्वर्ग, पृथ्वी, समुद्र व अन दुगु दक्व फुक्कं दय्कादीगु खः। 25 छिं हे जिमि तापाःबाज्या दाऊदयागु म्हुतुं पवित्र आत्मां थथे धाय्कादीगु खः – “‘जाति जाति छाय् मुना जुइ? अले मनूतय्सं छाय् म्वाः मदुगु जाः ग्वयाजुइ? 26 छाय् परमप्रभु व वय्कःया अभिषेक जूम्हय्सिगु विरोधय् पृथ्वीया जुजुत दं वइ, अले शासकत जानाः जाः ग्वयाजुइ?’” 27 “थथे हे थ्व हे शहरय् नं छिं ल्यया तयादीम्ह छिकपिनि पवित्रम्ह सेवक येशूयागु विरोधय् हेरोद व पन्तियस पिलातस नं, यहूदीत व यहूदीमखुपिंनापं मुंगु खः। 28 थ्व ला छिं न्हापांनिसें हे ग्वसाः ग्वयादी थें जक इमिसं याःगु खः। 29 आः ला प्रभु, इमिसं जिमित गय् च्वंक ख्यानाच्वन। अथे जूगुलिं छिकपिनि दासतय्त अझ हे मग्यासे नवाये फय्कादिसँ। 30 थथे हे ल्वय् लाय्केत छिं ल्हाः चकंकादिसँ। छिकपिनि पवित्रम्ह सेवक येशूयागु नामं अजू चायापुगु ज्या व चिं यानाक्यने फय्कादिसँ।” 31 प्रार्थना याये सिधये धुंकाः इपिं मुनाच्वंगु थाय् सन। अले इपिं फुक्कं पवित्र आत्मां जाल। अले इमिसं परमेश्वरयागु वचन मग्यासे नवाना जुल। दक्व सम्पत्ति मंकाः याःगु 32 फुक्क विश्वासीतय्गु मन व नुगः छगू थें जू। अथे जूगुलिं सुनानं थ्व जिगु व छंगु धकाः मधासे फुक्कं मंकाः याना तल। 33 अले सीम्ह येशूयात म्वाकादीगु खः धकाः प्रेरिततय्सं ग्यसुलाःगु साक्षी बियाजुल। परमेश्वरं नं इमित तसकं दया माया यानादी। 34 इमिथाय् छम्ह मनू हे नये मखंम्ह मदु। छेँबुँ दुपिन्सं छेँबुँ मियाः 35 वःगु धिबा प्रेरिततय्त बी हइगु, अले माःमाःपिं विश्वासीतय्त इनाबीगु। 36-37 थथे हे योसेफं नं थःगु जग्गा मियाः वःगु धिबा प्रेरिततय्त बिल। व साइप्रस धाःथाय् बूम्ह छम्ह लेवी खः। वयात प्रेरिततय्सं बारनाबास धकाः नां तःगु खः। थुकिया अर्थ “सकसितं साहस बी फुम्ह” खः। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.