२ शमूएल 3 - नेवाः बाइबल1 शाऊलया घराना व दाऊदया घरानाया दथुइ यक्व दिं तक लडाइँ जुयाच्वन। दाऊद झन झन बल्लानावन, अले शाऊलया घराना धाःसा झन झन बमलाना वन। दाऊदया काय्पिं 2 हेब्रोनय् बूपिं दाऊदया काय्पिं थुपिं हे खः – तःधिकःम्ह काय् अमनोन, थ्वया मां यिजरेलयाम्ह अहीनोम खः। 3 वया माइलाम्ह काय् किलाब खः, थ्वया मां कर्मेलयाम्ह सी धुंकूम्ह नाबालया कलाः अबीगेल खः। साहिँलाम्ह काय् अब्शालोम खः, थ्वया मां गशूरयाम्ह जुजु तल्मैया म्ह्याय् माका खः। 4 काहिँलाम्ह अदोनियाह खः, थ्वया मां हग्गीत खः। ठाहिँलाम्ह शपत्याह खः, थ्वया मां अबीतल खः। 5 अले कान्छाम्ह धाःसा यित्राम खः, थ्वया मां दाऊदया कलाः एग्ला खः। थुपिं फुक्कं हेब्रोनय् बूपिं दाऊदया काय्पिं खः। दाऊदनापं अबनेर मिलय् जूगु 6 शाऊलया घराना व दाऊदया घरानाया दथुइ लडाइँ जुयाच्वंबलय् अबनेरं बुलुहुं बुलुहुं थःत बल्लाका यंकाच्वंगु खः। 7 अले अय्याया म्ह्याय् रिश्पा नांयाम्ह शाऊलया छम्ह मथ्याःम्ह कलाः दु। ईश्बोशेतं अबनेरयात न्यन, “छ जिमि अबुया मथ्याःम्ह कलाःनापं छाय् द्यनागु?” 8 थ्व खं अबनेरं तसकं तंम्वयाः धाल, “छु धया! छं स्वय्बलय् जिं छिमि घरानायात ध्वखा बियाः यहूदा कुलनापं ज्या याइ धकाः च्वना ला? आः तक ला जि छिमि अबु शाऊलया घराना, वया दाजुकिजापिं व वया पासापिनि भक्त खः, अले जिं छितः दाऊदया ल्हातय् बियाः बेइमान यानागु मदु। अय्नं छाय् थ्व मिसाया बारे जितः ज्यालगय् मजूगु द्वपं बियागु! 9 जिं दाऊदयात परमप्रभुं वयात जिं याये धकाः बियादीगु बचंया लागिं ग्वाहालि मयात धाःसा परमेश्वरं हे जितः कडा सजाँय बियादीमा। 10 जिं शाऊलया घरानायात क्वफायेगु अले दाऊदयात दानंनिसें बेर्शेबा तक इस्राएल व यहूदायात सिंहासनय् तयेगु ज्या याये।” 11 व अबनेरनापं तसकं ग्याःगुलिं ईश्बोशेतं मेगु छुं हे धाये मफुत। 12 अनंलि अबनेरं हेब्रोनय् दाऊदयाथाय् थथे धकाः दूतत छ्वल, “थ्व देय् सुयागु खः? झीपिं मिलय् जुइ नु, अले जि फुक्क इस्राएलयात छिगुपाखे हयेत फयांफत्तले कुतः याये।” 13 अले दाऊदं थथे लिसः बिल, “ज्यू, जि छनापं मिलय् जुइ, तर जिगु छता खँ न्यने धुंकाः जक, शाऊलया म्ह्याय् मीकलयात जिथाय् हयेधुंका जक छ जिथाय् वा।” 14 दाऊदं शाऊलया काय् ईश्बोशेतयाथाय् नं थथे धकाः दूतत छ्वत, “जिं सछिम्ह पलिश्तीया खलडीया धिबा पुलाः क्वःछिनाम्ह जिमि कलाः मीकल जितः लःल्हानाब्यु।” 15 अथे जुयाः ईश्बोशेतं मनूत छ्वयाः मीकलयात थः भाःत लेशया काय् पल्तिएलयाथाय्पाखें कयाः हल। 16 अबनेरं वयात छेँ लिहां हुँ धकाः हुकुम मयातले पल्तिएल ख्वःख्वं बहूरीम तक मीकलया ल्यूल्यू वल। 17 अले इस्राएलया थकालितय्थाय् वयाः अबनेरं थथे धाल, “यक्व न्ह्यवंनिसें हे छिकपिन्सं दाऊदयात थःपिनि जुजु दय्केत कुतः यानाः वयाच्वंगु दु। 18 आः व ज्या पूवंकीगु ई थ्व हे खः, छाय्धाःसा दाऊदया बिषय्लय् परमप्रभुया बचं थ्व दु, जिमि दास दाऊदया ल्हातं हे जिमि प्रजा इस्राएलयात पलिश्तीतय्गु व इमि फुक्क शत्रुतपाखें बचय् याइ।” 19 अबनेरं बेन्यामीनीतय्नापं नं खँ ल्हात। अनंलि इस्राएलीत व बेन्यामीनीत राजी जूगु खँ न्यंकेत अबनेर हेब्रोनय् दाऊदयाथाय् वन। 20 अबनेर निइम्ह मनूतनापं दाऊदयाथाय् थ्यंकः वल, दाऊदं इपिं फुक्कसित भ्वय् नकल। 21 अले अबनेरं दाऊदयात धाल, “आः जि वने, फुक्क इस्राएलीत छिनापं मिलय् जुइ फयेमा धकाः जिं इमित थः प्रभु महाराजयाथाय् मुंके। अनंलि छिं थः इच्छा यानादी थें शासन यानादिसँ।” दाऊदं अबनेरयात बिदा बिल, अले व खुशी जुयाः वन। योआबं अबनेरयात स्याःगु 22 भचा लिपा दाऊदया मनूत व योआब छगू लडाइँलय् थःपिन्सं लाकाकाःगु मालताल ज्वनाः लिहां वल। इपिं अन थ्यंबलय् अबनेर दाऊदयाथाय् हेब्रोनय् मदु। छाय्धाःसा दाऊदं अबनेरयात बांलाक बिदा बियाः याउँक छ्वये धुंकूगु खः। 23 योआब व वया सिपाइँत लिहां वयाः अन थ्यंकः वल, नेरया काय् अबनेर जुजुयाथाय् वयाः याउँक लिहां वंगु खँ मनूतय्सं योआबयात कन। 24 योआब जुजुयाथाय् वनाः धाल, “स्वयादिसँ, छिं थ्व छु यानादियागु? अबनेर थन छिथाय् वःगु खः। छिसं वयात गय् यानाः अथें वने बियादियागु? व ला अथें हे बिस्युं वन। 25 छिसं नेरया काय् अबनेरयात म्ह हे मस्यू खनिसा। व ला छितः झंगलाय्त, छि छु यानाच्वनादी धकाः सीकेत थन छिथाय् वःगु खः।” 26 योआब दाऊदयात त्वःतावन, वं अबनेरया ल्यूल्यू दूतत छ्वल। इमिसं अबनेरयात सीराया तुंया लिक्कसं लितब्वनाहल। तर दाऊदं थ्व फुक्क खँ मस्यू। 27 अबनेर हेबोनय् लिहां वःबलय् योआबं वलिसें सुं मदुथाय् खँ ल्हायेगु त्वह चिनाः मू ध्वाखाया लिक्क यंकल। अले वं थःकिजा असाहेल स्याःगुया बदला कायेत अबनेरयात चुपिं प्वाथय् सुयाः स्यानाबिल। 28 अले दाऊदं थ्व खँ लिपतय् तिनिं सिल, दाऊदं धाल, “नेरया काय् अबनेरयात स्याःगुया बारे जि व जिगु राज्य परमप्रभुया न्ह्यःने सदां दोषी जूगु मदु। 29 बरु योआब व वया अबुया फुक्क परिवारया छेनय् व दोष लायेमा। अले योआबया परिवारय् कइया ल्वय् वा छेंगूया पुनेयःगु ल्वय् नं गुबलय् नं मत्वःतेमा। कथिया भरय् इपिं जुइमालेमा वा तरवारं पालाः स्याइपिं वा फ्वनाजुइपिनि सन्तानत मगाःमचाः मजुइमा।” 30 अथे हे गिबोनया लडाइँलय् अबनेरं इमि किजा असाहेलयात स्याःगुलिं योआब व वया किजा अबीशैनं अबनेरयात स्याःगु खः। 31 अनंलि दाऊदं योआब अले वनापं दुपिं फुक्क मनूतय्त थःगु लं खुनाः भांग्रा फिइत व अबनेरया सीम्ह न्ह्यः न्ह्यः विलाप यायां हुँ धकाः हुकुम यात अले जुजु थः नं सीम्हया ल्यूल्यू वन। 32 इमिसं अबनेरयात हेब्रोनय् थुन, अले चिहानय् जुजु तसकं ख्वल। अले फुक्क मनूत नं वनापं हे ख्वल। 33 अले जुजुं अबनेरया निंतिं थ्व बिलापया म्ये दय्कल, “छु अबनेर छम्ह अपराधी थें सीमाःगु ला? 34 छंगु ल्हाः चिनातःगु मदु, छंगु तुति नं चिनातःगु मदु। छ ला दुष्टतय्गु ल्हातय् लाःम्ह थें हे क्वदल।” अले मनूत वयागु निंतिं हाकनं हे ख्वल। 35 दाऊदं न्हिच्छि हे छुं मन। अले मनूतय्सं दाऊदयात छुं भपियादिसँ धकाः धायेत वल, तर दाऊदं पाफयाः थथे धाल, “सूर्य बिनावने न्ह्यः छुं नयेगु नसा थिल धाःसा परमेश्वरं जितः कडा सजाँय बियादीमा।” 36 अले मनूतय्सं थ्व खँ थुल, अले इपिं मानय् जुल। जुजुं याःगु फुक्क खँय् इपिं तसकं लय्ताल। 37 उखुन्हु इस्राएलया फुक्क झिंनिगू कुलतय्सं नेरया काय् अबनेरयात स्याःगु खँय् जुजुया ल्हाः मदु धयागु खँ सीकल। 38 जुजुं थः मनूतय्त धाल, “इस्राएलय् थौंया दिंलय् छम्ह तसकं बल्लाःम्ह, छम्ह तःधंम्ह मनू सीत धकाः छिमिसं मस्यू ला? 39 जि अभिषेक जूम्ह जुजु जूसां सरूयाहया थुपिं दयामदुपिं काय्पिनि न्ह्यःने जि बमलाःम्ह व शक्ति मदुम्ह जूगु दु। इपिं जिगु निंतिं तसकं हे बल्लाःपिं खः। परमप्रभुं मभिंगु ज्या याइपिन्त उकिया पाय्छिगु लिच्वः बियादीमा।” |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.