२ शमूएल 20 - नेवाः बाइबलशेबा विरोधी जूगु 1 शेबा नांयाम्ह छम्ह मभिंम्ह मनू गिलगालय् दु। व बेन्यामीनी बिक्रीया काय् खः। वं तुरही पुल अले तःसलं थथे धाल, “दाऊदयाके जिमिगु छु भाग दु? यिशैया काय्याके जिमिगु छुं नं अधिकार मदु। हे इस्राएल, छिपिं फुक्क थथःगु पालय् हुँ!” 2 अय्जूगुलिं इस्राएलया मनूत दाऊदयात त्वःताः बिक्रीया काय् शेबाया ल्यूल्यू वन। तर यहूदाया मनूत धाःसा दाऊदनापं हे वन अले इपिं यर्दनंनिसें यरूशलेम तक हे दाऊदया ल्यूल्यू वन। 3 दाऊद यरूशलेमय् थःगु दरबारय् थ्यंबलय् थःम्हं दरबार स्वयेत तयातःपिं झिम्ह मथ्याःपिं कलाःतय्त यंकाः मेगु छेँ कुनातल। वं इमित नयेत्वनेगु मिलय् यानाबिल, अय्नं इपिं नापं द्यं मवं। थुकथं इमित मसीतले हे कुनातल। इपिं भाःत मदुपिं मिसातय्सं थें जीवन हनाच्वने माल। 4 अनंलि जुजुं अमासायात धाल, “यहूदाया मनूतय्त छथाय् मुंकि, अले स्वन्हुया दुने इमित छनापं जिथाय् हजि।” 5 तर अमासा यहूदाया मनूतय्त मुंकेत वंबलय् जुजुं क्वछिनाब्यूगु ई स्वयाः नं वं अप्वः ई बीकल। 6 दाऊदं अबीशैयात धाल, “बिक्रीया काय् शेबां झीत अब्शालोमं स्वयाः नं अप्वः दुःख बी थें च्वं। छं जि सिपाइँत ब्वना यंकाः वयात लिनायंकी मखुसा व पखाः दुगु शहरय् थ्यन धाःसा व झीपाखें बिस्युं वनी।” 7 अथे जुयाः योआबया मनूत, करेती, पेलेथी व लडाइँ ल्वायेत बल्लाःपिं मनूत अबीशैया ल्यूल्यू वन। इमिसं बिक्रीया काय् शेबायात लीत यरूशलेमं वन। 8 इपिं गिबोनया तःग्वःगु ल्वहंधी लिक्क थ्यंबलय् अमासां इमित नापलात। उबलय् योआबं सिपाइँया वसः पुनातःगु खः। अले वयाके जँनी नं दु। उकी वं दाप नापं छपु चुपि स्वथनातःगु खः। व न्ह्यज्याःबलय् वयाके दुगु दापं चुपि कुतुंवन। 9 अले योआबं अमासायात धाल, “हे जिमि किजा अमासा, छन्त आराम हे दु जुइ मखु ला?” अले योआबं अमासायात चुप्पा नयेत जव ल्हातं वयागु दाह्री ज्वन। 10 अमासां योआबयाके ल्हातय् चुपि दुगु खँ वास्ता हे याये मफुत। योआबं वयागु प्वाथय् चुपिं सुयाबिल अले आतापुति पिहां वयाः बँय् कुतुंवन। वं हाकनं सुइ म्वाल छाय्धाःसा व सी धुंकल। अनंलि योआब व वया किजा अबीशैनं बिक्रीया काय् शेबायात ल्यू वन। 11 योआबया मनूत मध्ये छम्हय्सिनं अमासाया सीम्ह लिक्क दनाः तःसलं थथे धाल, “योआब व दाऊदया पाखेयापिं फुक्कं योआबया ल्यूल्यू हुँ।” 12 उबलय् अमासाया सीम्ह हिया हि जुयाः मू लँया दथुइ लानाच्वंगु खः। अले व मनुखं सिपाइँतय् फुक्क पुचः अन हे च्वनाच्वंगु खन। अनंलि अनं वयाच्वंपिं फुक्क मनूत अमासाया सीम्ह दुथाय् दिनाच्वंगु खन। अनंलि वं अमासाया सीम्हयात मूलँय् दथुं साला यंकाः तापाक्क बुँइ वान्छ्वयाः कापतं त्वपुयाबिल। 13 सीम्हयात मू लँया दथुं सालायंके धुंकाः फुक्क मनूत बिक्रीया काय् शेबायात लीत योआबया ल्यूल्यू वन। 14 हाबिल-बेथ-माकाय् मथ्यंतले योआब इस्राएलया फुक्क कुलपाखें व बरीतय् फुक्क देशं जुयाः वन। अले उपिं बरीत छथाय् मुनाः सकले वयागु ल्यूल्यू वन। 15 अले योआबया पुचः वयाः शेबायात हाबिल-बेथ-माकाय् घेरय् यात। अले इमिसं शहरयात घेरय् यानातःगु पखालय् थाहां वनेत लँ दय्केत ल्वहं व चा द्वंचिन। व पिनेया पखाःया न्ह्यःने खः। अले पखाः थुनेत इमिसं उकियात हमला यात। 16 अनं छम्ह बुद्धि दुम्ह मिसा पिने पखालय् दनाः तःसलं थथे धाल, “न्यँ! न्यँ! योआबयात थन वा धयाब्यु, जि वनापं खँ ल्हाये।” 17 अनंलि योआब वयाथाय् लिक्क वल अले व मिसां धाल, “छु छि हे योआब खः ला?” योआबं लिसः बिल, “खः जि हे योआब खः।” व मिसां धाल, “स्वयादिसँ, जिगु खँ न्यनादिसँ।” योआबं धाल, “धयादिसँ, जिं न्यनाच्वनागु दु।” 18 व मिसां धाल, “न्हापा थथे धायेगु चलन दु, ‘हाबिल शहरय् वनाः लिसः ज्वनाः वा’ अले फुक्कसिनं अथे हे याइगु। 19 जिमिगु शहर छगू मू शहर खः। इस्राएलय् थ्व छगू शान्त शहर व राजभक्त शहर खः। छाय् छिसं थ्व शहरयात नाश याये त्यनागु? गुगु शहर परमप्रभुयागु खः, छु छिसं व शहरयात नाश यायेगु ला?” 20 “थ्व जिगुपाखें तापाक्क जुइमा!” योआबं लिसः बिल, “नाश यायेगु खँ जिगुपाखें तापाक्क जुइमा। 21 व जिमिगु बिचाः मखु। तर एफ्राइमया पहाडया देशया छम्ह मनू, बिक्रीया काय् शेबा दाऊद जुजुया विरोध यायेत दंगु दु। व मनूयात जिमिगु ल्हातय् ब्यु अले जि थ्व शहर त्वःताः वने।” व मिसां योआबयात धाल, “शेबाया छ्यं पःखालं छिथाय् वांछ्वयाहइ।” 22 अनंलि व मिसा वन अले फुक्क मुनाच्वंपिं मनूतय्त थःगु बुद्धिया सल्लाह न्यंकल। अले इमिसं बिक्रीया काय् शेबाया छ्यं ध्यनाः योआबया न्ह्यःने वांछ्वयाबिल। अनंलि योआबं तुरही पुल, अले फुक्क सिपाइँत शहर त्वःताः थथःगु छेँय् लिहां वन। योआब धाःसा जुजुयाथाय् यरूशलेमय् लिहां वन। 23 योआब फुक्क इस्राएली पुचःया सेनापति खः, अले यहोयादाया काय् बनायाह धाःसा करेती व पेलेथीतय् कप्तान खः। 24 दास थें ज्या याइपिं ज्यामितय्त ज्या याकीगु जिम्मा अदोनीरामयागु ल्हातय् बियातःगु खः। अहीलूदया काय् यहोशापात जूगु खँ च्वयातइम्ह खः। 25 शेभा धाःसा छ्यान्जे खः, अले सादोक व अबियाथार पुजाहारीत खः। 26 याईरी ईरा धाःसा दाऊदया पुजाहारी खः। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.