२ राजा 25 - नेवाः बाइबलयरूशलेम पतन जूगु २ इति ३६:१३-२१ ; यर ५२:३-११ 1 उकिं सिदकियाहं राज्य यानाच्वंगु गुंगूगु दँया झिगूगु लाया झिगूगु दुखुन्हु बेबिलोनयाम्ह जुजु नबूकदनेसरं थः फुक्क सेना ज्वनाः यरूशलेमय् हमला याः वल। वं शहरया छचाःखेरं चा व ल्वहंया द्वम्बःचात दय्काः शहरयात घेरय् यात। 2 सिदकियाह जुजुं राज्य यानाच्वंगु झिंछगूगु दँय् तक शहरयात घेरय् याना तल। 3 प्यंगूगु लाया गुंगूगु दिंखुन्हु शहरय् तसकं अनिकाल जुल। मनूतय् छुं नं नये मन्त। 4 अबलय् शहरया पःखाः बेबिलोनीतय्सं तछ्यात। चान्हय् हे जुजुया क्यब लिक्कया निगू पःखाःया दथुया लुखां सिदकियाह व फुक्क सिपाइँत बिस्युं वन। बेबिलोनीत शहरया छचाःखेरं दुसां इपिं यर्दन खुसिया ब्यासिपाखे बिंस्यु वन। 5 तर बेबिलोनी सेनां जुजुयात लित, अले वयात यरीहोया ख्यलय् नापलाकाः ज्वन। वया फुक्क सिपाइँत वयात त्वःताः थुखे उखे बिस्युं वन। 6 अले इमिसं जुजुयात ज्वनाः रिब्लाय् बेबिलोनयाम्ह जुजुयाथाय् हल। जुजुं वयात सजाँय बीगु आज्ञा बिल। 7 इमिसं सिदकियाहया काय्पिन्त वयागु हे न्ह्यःने हेस्यात। अनंलि इमिसं वयागु मिखा ल्ह्वकाबिल। वयात कँय्या सिखलं चिनाः बेबिलोनय् यंकल। देगः थुनाब्यूगु यर ५२:१२-२३ 8 बेबिलोनयाम्ह जुजु नबूकदनेसरं राज्य यानाच्वंगु झिंगुंगूगु दँया न्यागूगु लाया न्हय्न्हु दुखुन्हु बेबिलोनया जुजुया हाकिम व जुजुया अङ्गरक्षकतय् सेनापति नबूजरदान यरूशलेमय् वल। 9 वं परमप्रभुया देगः, दरबार व शहरया फुक्क छेँय् मि तयाबिल। ततःखागु फुक्क छेँ वं छ्वयेकाबिल। 10 जुजुया अङ्गरक्षकतय् सेनापतिनापं दुपिं बेबिलोनी सेनां यरूशलेमया चाकःछिं दुगु पखाः थुनाबिल। 11 सेनापति नबूजरदानं शहरय् ल्यंदुपिं मनूत, मेपिं मनूतय्त व बेबिलोनयाम्ह जुजुयाथाय् बिस्युं वंपिन्त ज्वनाः बेबिलोनय् यंकल। 12 तर छुं मदुपिं चीमिपिं मनूतय्त दाखक्यबय् व बुँइ ज्या याकेत यहूदाय् हे त्वःताथकल। 13 बेबिलोनीतय्सं परमप्रभुया देगलय् दुगु कँय्या थां व लिधंसात, कँय्या तग्वःगु त्यांकि नं कुचा कुचा यात अले इमिसं फुक्क कँय् बेबिलोनय् यंकल। 14 इमिसं वेदी सफा याइबलय् छ्यलिगु बेल्चा व नौ तयेगु थल, चिम्ता, गुँगू थनेगु मकः व देगलय् सेवा याइबलय् छ्यलिगु कँय्या थलबलत फुक्क यंकल। 15 जुजुया अङ्गरक्षकतय् सेनापतिं गुँगू थनिगु मकः व छ्वाकिगु बातात, भिंगु लुँ वा वहलं दय्कातःगु फुक्क यंकल। 16 सोलोमनं परमप्रभुया देगःया निंतिं दय्कूगु कँय्या निपु थां, थलबल व छगू त्यांकि तसकं झ्यातु, उकियात लनेफइ मखु। 17 निपु थां उत्थें च्वँ, निपुं हे ८.२ मिटर तजाः। च्वय् कँय्यागु १.३ मिटर तःजाःगु तपुलि दु। कँय्या जालि व धालेसिया बुत्तां चाकःछिं जाःगु दु। मेगु थां उकिया जालिनापं उत्थें च्वँ। यहूदाया मूनूत बेबिलोनय् यंकूगु यर ५२:२४-२७ 18 अङ्गरक्षकतय् सेनापतिं दकलय् तःधंम्ह पुजाहारी सरायाह व निगूगु थासय्याम्ह पुजाहारी सपन्याहयात व स्वम्ह पालेतय्त नं ज्वना यंकल। 19 शहरय् ल्यनाच्वंपिं मध्ये वं सिपाइँतय् कप्तान व न्याम्ह जुजुयात सल्लाह बीपिन्त ज्वन। वं देशयापिं मनूतय्त सिपाँइलय् भर्ना याइम्ह दकलय् तःधंम्ह हाकिम व शहरय् लूपिं खुइम्ह सिपाइँतय्त नं ज्वन। 20 थुमित अङ्गरक्षकतय् कप्तान नबूजरदानं रिब्ला शहरय् बेबिलोनयाम्ह जुजुयाथाय् यंकल। 21 बेबिलोनयाम्ह जुजुं हमात देशया रिब्ला शहरय् इमित स्याकेबिल। थुकथं यहूदायापिं मनूतय्त थःगु देशं ज्वना यंकल। यहूदायाम्ह बडाहाकिम गदल्याह यर ४०:७-९ ; ४१:१-३ 22 बेबिलोनयाम्ह जुजु नबूकदनेसरं शापानया छय्, अहीकामया काय् गदल्याहयात यहूदाय् थःम्हं त्वःताथकूपिं मनूतय् शासक ल्यल। 23 बेबिलोनयाम्ह जुजुं गदल्याहयात बडाहाकिम ल्यःगु खँ न्यनाः सेनाया फुक्क कप्तानत व इमि मनूत मिस्पाय् गदल्याहयाथाय् वल। थुपिं सेनापतित नतन्याहया काय् इश्माएल, कारेहया काय् योहानान, नतोपाती तन्हूमेतया काय् सरायाह व माकातीया काय् याजन्याह खः। 24 गदल्याहं इपिं व इमि मनूतय्त पाफयाः धाल, “बेबिलोनी सिपाइँत खनाः ग्याये मते। देशय् च्वनाः बेबिलोनयाम्ह जुजुया सेवा या, छिमिगु भिं जुइ।” 25 तर न्हय्ला दुबलय् जुजु खलःयाम्ह, एलीशामाया छय् व नतन्याहया काय् इश्माएलं झिम्ह मनूतय्त ज्वनावयाः गदल्याह व वलिसें मिस्पाय् दुपिं यहूदा व बेबिलोनयापिं मनूतय्त स्यानाबिल। 26 उकिं बेबिलोनीतलिसें ग्यानाः चिधिकःपिंलिसें तःधिकःपिं तक, सेनाया कप्तानत नं फुक्क मिश्र देशय् बिस्युं वन। यहोयाकीनयात त्वःतूगु यर ५२:३१-३४ 27 एबील-मरोदक बेबिलोनयाम्ह जुजु जूगु दँय् वं यहोयाकीनयात झ्यालखानां त्वःतल। यहोयाकीनयात ज्वनाः बेबिलोनय् यंकूगु स्विन्हय्दँया झिंनिलाया निइन्हय्न्हु लिपा थथे जूगु खः। 28 वं वलिसें बांलाक न्ववानाः बांलाःगु व्यवहार यात। अले व थें बेबिलोनय् कैदी जुयाच्वंपिं मेपिं जुजुपिन्त स्वयाः वयात अज्ज अप्वः इज्जतया थासय् तल। 29 थुकथं यहोयाकीनं कैदीया वसः त्वःतल अले म्वाःतले न्ह्याबलें जुजुया टेबिलय् नल। 30 जुजुं वयात व म्वानाच्वंतले न्हियान्हिथं खर्च यायेत भत्ता बिल। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.