२ राजा 18 - नेवाः बाइबलयहूदायाम्ह जुजु हिजकिया २ इति २९:१-२ ; ३१:१ 1 इस्राएलया जुजु एलाहया काय् होशियां राज्य यानाच्वंगु स्वंगूगु दँय् आहाजया काय् हिजकिया यहूदायाम्ह जुजु जुल। 2 व निइन्यादँ दुबलय् जुजु जूगु खः। वं यरूशलेमय् निइगुदँ राज्य यात। वया मांया नां जकरियाया म्ह्याय् अबिया खः। 3 वया पुर्खा दाऊदं याःथें वं नं परमप्रभुयात यःगु ज्या यात। 4 वं पुजा याइगु थाय् चीकाछ्वल, च्वखगु ल्वहंया थांत तछ्यानाबिल, अशेरा द्यःमय्जुया थांत त्वाःल्हानाबिल। वं मोशां दय्कूगु कँय्या सर्प कुचा कुचा यानाबिल, छाय्धाःसा अबलय् तक इस्राएलीतय्सं उकिया निंतिं धुपाँय् च्याका वयाच्वंगु खः। इमिसं वयात नहूश्तान धाइगु। 5 हिजकियां परमप्रभु इस्राएलयाम्ह परमेश्वरयाके भलसा तल। यहूदायापिं व स्वयाः न्ह्यःयापिं व लिपायापिं जुजुपिं मध्ये व थें ज्याःम्ह सुं नं मदु। 6 व परमप्रभुया भक्त जुया हे च्वन। वय्कःनापं जुइगु त्वःमतू। वं परमप्रभुं मोशायात बियादीगु फुक्क उजं पालन यात। 7 परमप्रभु वलिसें दीगुलिं वं याःगु फुक्क ज्याय् व ताःलात। व अश्शूरयाम्ह जुजुया विरोधय् विद्रोही जुल, वयात कर पुलेगु त्वःतल। 8 पलिश्तीतय्गु देश गाजा व उकिया लागा तक, पिवाःत च्वनीगु धरहरांनिसें कयाः छचाःखेरं पःखालं ग्वयातःगु शहर तक वं त्याकल। 9 हिजकियां राज्य यानाच्वंगु प्यंगूगु दँय्, गुगु इस्राएलय् जुजु एलाहया काय् होशियां राज्य यानाच्वंगु न्हय्गूगु दँ खः, अश्शूरयाम्ह जुजु शलमनेशेरं इस्राएलय् हमला यात अले सामरियायात घेरय् यात। 10 स्वदँ तक घेरय् यायेधुंकाः अश्शूरीतय्सं सामरिया त्याका काल। थुकथं हिजकियां राज्य यानाच्वंगु खुगूगु दँय्, गुगु इस्राएलया जुजु होशियां राज्य यानाच्वंगु गुंगूगु दँ खः, अश्शूरीतय्सं सामरिया त्याका काल। 11 अश्शूरयाम्ह जुजुं इस्राएलीतय्त ज्वनाः अश्शूरय् यंकल। वं इमित हलहय्, हाबोर खुसिया सिथय् च्वंगु गोजानय् व मादीतय्गु शहरय् तल। 12 इस्राएलीतय्सं परमप्रभुया आज्ञा पालन मयाःगुलिं थथे जूगु खः। इमिसं वय्कःया बाचा त्वाथुल अले गुलि आज्ञा परमप्रभुया दास मोशां ब्यूगु खः उकियात इमिसं वास्ता मयात। यरूशलेमयात अश्शूरीतय्गु ख्याच्वः २ इति ३२:१-१९ ; यशै ३६:१-२२ 13 हिजकियां राज्य यानाच्वंगु झिंप्यदँ दुबलय् अश्शूरया जुजु सनहेरीबं यहूदाया फुक्क पःखाः ग्वयातःगु शहरतय्त हमला यानाः त्याका काल। 14 अले यहूदायाम्ह जुजु हिजकियां लाकीशय् च्वनाच्वंम्ह अश्शूरयाम्ह जुजुयाथाय् थथे धाय्के छ्वल, “जिं द्वंके लात। जिथासं लिहांझासँ! छिं छु छु फ्वन व जिं बी।” अश्शूरयाम्ह जुजुं यहूदायाम्ह जुजु हिजकियायाके १०,००० किलोग्राम वहः व १,००० किलोग्राम लुँ फ्वन। 15 हिजकियां परमप्रभुया देगः व दरबारया धुकुतिइ दुगु फुक्क वहः अश्शूरयाम्ह जुजुयात बिल। 16 उबलय् हिजकियां परमप्रभुया देगःया लुखां नं लुँ लिकाल। अले थःम्हं हे देगःया दुवालय् भुंके ब्यूगु लुँ प्वलाः अश्शूरयाम्ह जुजुयात बिल। 17 अश्शूरयाम्ह जुजुं हमला यायेत सेनापति, जर्नल व कप्तानयात छगू तःधंगु सेना बियाः लाकीशं यरूशलेमय् हिजकिया जुजुयाथाय् छ्वत। यरूशलेमय् थ्यंकः वयाः इपिं धोबितय्गु बुँइ वनीगु च्वय् लाःगु पुखूया धः लिक्कयागु लँय् दित। 18 इमिसं हिजकिया जुजुयात सःतके छ्वत, अले इमित नापलायेत हिजकिया जुजुया थुपिं हाकिमत – दरबारया प्रशासक हिल्कियाहया काय् एल्याकीम, दरबारया छ्यान्जे शेब्ना व ल्याःचाः तइम्ह आसापया काय् योआ पिहां वयाः इमिथाय् वल। 19 सेनापतिं इमित धाल, “हिजकियायात थथे धा, “तःधंम्ह अश्शूरया महाराजं थथे धयादी – ‘छं सुयागु भर कयागु? 20 छं धाइ लडाइँया योजना व सिपाइँतय् बल दु धकाः तर छं ला बकंफुसुलु खँ धयाच्वन। छं सुयाके भलसा तयाच्वनागु दु? अले छाय् जिगु विरोधय् विद्रोही जुयागु? 21 न्यँ! छं मिश्र देशयागु भर काःगु दु, व ला तज्याःगु तिंकथि जक खः, उकिं मनूतय्गु ल्हातय् सुइ। उकी लिधन धाःसा घाःपाः जक जुइ। मिश्र देशयाम्ह जुजु फारोयागु भर काःम्ह न्ह्याम्हय्सिगु लागि नं थथे हे खः। 22 अले छं जितः “जिमिसं ला परमप्रभु जिमि परमेश्वरयागु भर कयागु दु” धकाः धाःसा छु! व व हे मखु ला गुम्हय्सिगु पुजा यायेगुथाय् व वेदीत हिजकियां चीकाः यहूदा व यरूशलेमयात थथे धाःगु खः, “छिमिसं यरूशलेमय् थ्व वेदीया न्ह्यःने आराधना यायेमाः।” 23 “‘आः जिमि मालिक अश्शूरयाम्ह जुजुलिसें बाजी तयादिसँ। जिं छन्त निद्वः सल बी। स्व, छं उपिं सलगइपिं तये फु कि मफु? 24 रथत व सलतय्गु निंतिं मिश्र देशय् भलसा याःसां गुकथं छिमिसं जिमि मालिकया हाकिमत मध्ये छम्ह चिधिकःम्ह हाकिमयात नं ख्यानाः छ्वये फइ? 25 थ्व बाहेक छु जिं थ्व थाय्यात हमला यानाः नाश यायेत परमप्रभुं मधाय्कं वयागु दु ला? परमप्रभुं हे जितः “व देशय् वनाः वयात नाश या!” धकाः धयादीगु दु।’” 26 अले हिल्कियाहया काय् एल्याकीम, शेब्ना व योआं लडाइँलय् वःम्ह सेनापतियात धाल, “बिन्ति दु, छिकपिनि दासतनापं आरमेइक भाषां न्ववानादिसँ, छाय्धाःसा जिमिसं व भाय् थू। पखालय् च्वनाच्वंपिं मनूतय्सं ताय्कः हिब्रू भाषां जिपिंनापं न्ववानादी मते।” 27 तर सेनापतिं धाल, “छु जिमि मालिकं जितः छिपिं व छिमि मालिकयात जक थ्व खँ धाय्के छ्वयाहःगु, खः ला? छु वय्कलं जितः पखालय् च्वनाच्वंपिं मनूतय्गु निंतिं नं छ्वयाहःगु मखु ला? इमिसं नं छिमिसं थें थःगु खि नयेमाली अले थःगु हे च्व त्वनेमाली।” 28 अनंलि सेनापति दनाः तःसलं हिब्रू भाषां थथे धाल, “महाराज अश्शूरया जुजुया खँ न्यँ! 29 जुजुं थथे धयादीगु दु, हिजकियां छिमित धोखा मबीमा! जिगु ल्हातं वं छिमित बचय् याये फइ मखु। 30 हिजकियां हेय्काः छिमित थथे धया परमप्रभुयाके भलसा याके नं मबीमा, ‘परमप्रभुं धात्थें हे झीत छुत्कारा यानादी। वय्कलं थ्व शहर अश्शूरया जुजुया ल्हातय् लःल्हानादी मखु।’ 31 “हिजकियायागु खँ न्यने मते। अश्शूरयाम्ह महाराजं थथे धयादी – छिपिं जिनापं मिलय् जूवःसा अले पिहां वयाः जिथाय् वःसा, छिपिं फुक्कसिनं थथःगु दाखमाया फल व यःमरिमाया फल नयेखनी, अले थथःगु त्यांकिपाखें लः त्वनेखनी। 32 लिपा धाःसा छिमिगु हे थें ज्याःगु अन्न व न्हूगु दाखमद्य अले मरि व दाखक्यब, जैतूनया सिमा व कस्तिं जाःगु देशय् जिं छिमित यंके। सीगु पलेसा म्वायेगु ल्य! “हिजकियाया खँ न्यने मते! ‘परमप्रभुं झीत बचय् यानादी’ धकाः धयाः वं छिमित ध्वंलानाच्वंगु दु। 33 छु! गुगुं जातियाम्ह द्यवं थःगु देशयात अश्शूरयाम्ह जुजुया ल्हातं बचय् याये फुगु दु ला? 34 हमात व अर्पादया द्यःत गन वन? सपर्बेम, हेना व इव्वाया द्यःत ग्व लय्? छु! इमिसं सामरियायात जिगु ल्हातं बचय् यात ला? 35 छु! थुपिं देशयापिं द्यःत मध्ये सुनानं थःगु देशयात जिगु ल्हातं बचय् याये फुगु दु ला? परमप्रभुं यरूशलेमयात गथे यानाः बचय् याये फइ?” 36 तर मनूत फुक्क सुम्क च्वन अले छुं नं लिसः मब्यू, छाय्धाःसा जुजुं थज्याःगु आज्ञा ब्यूगु खः, “वयात लिसः बी मते।” 37 अनंलि दरबारया प्रशासक हिल्कियाहया काय् एल्याकीम, दरबारया छ्यान्जे शेब्ना व ल्याःचाः तइम्ह आसापया काय् योआं थःगु वसः खुत, अले हिजकियायाथाय् वयाः अश्शूरयाम्ह लडाइँया सेनापतिं धाःगु खँ कन। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.