२ राजा 12 - नेवाः बाइबलयोआशं देगः ल्ह्वंगु २ इति २४:१-१६ 1 इस्राएलया जुजु येहूनं राज्य यानाच्वंगु न्हय्गूगु दँय् योआश जुजु जुल। वं यरूशलेमय् पिइदँ राज्य यात। वया मां बेर्शेबायाम्ह सिब्या खः। 2 यहोयादा पुजाहारीं योआशयात स्यनेकने याःगु फुक्क दँय् वं परमप्रभुया यःगु बांलाःगु ज्या यात। 3 अय्नं वं पुजा याइगु थाय् चीकामछ्व। अन मनूतय्सं बलि छायेगु व धुपाँय् च्याकेगु ज्या याना हे च्वन। 4 योआशं पुजाहारीतय्त धाल, “परमप्रभुया देगलय् पवित्र देछाकथं जनगणना काःबलय् मुंगु धिबा, मनूतय्सं भाकल याःगु धिबा व थःयसें देगलय् हःगु धिबा फुक्क मुं। 5 पुजाहारीत सकसिनं सुं छम्ह दांभरियाके धिबा कायेमा, अले देगलय् गनं स्यंगु दुसा ल्ह्वनेत व धिबा छ्यलेमा।” 6 तर योआश जुजुं राज्य यानाच्वंगु निइस्वंगूगु दँय् तक नं पुजाहारीतय्सं देगः मल्ह्वं। 7 उकिं योआश जुजुं यहोयादा पुजाहारी व मेपिं पुजाहारीतय्त सःताः धाल, “छिमिसं छाय् देगः मल्ह्वनागु? आवंलि छिमिसं थः दांभरितके धिबा काये मते, तर देगः ल्ह्वनेत धिबा लःल्हानाब्यु।” 8 पुजाहारीत मनूतय्के धिबा मकायेत व देगः ल्ह्वनेगु ज्या थःम्हं जिम्मा मकायेत मानय् जुल। 9 अले यहोयादा पुजाहारीं छगः सनू कयाः उकिया पुसाय् प्वाः खनाबिल। उकियात परमप्रभुया देगःया ध्वाखाया जवपाखे वेदीया लिक्क तयाबिल। अले मू लुखाय् पाः च्वनिपिं पुजाहारीतय्सं परमप्रभुया देगलय् हःगु फुक्क धिबा उकी तयाबीगु। 10 सनू जाइबलय् जुजुया छ्यान्जे व दकलय् तःधंम्ह पुजाहारी परमप्रभुया देगलय् वइगु अले धिबा ल्याः कायाः म्हिचाय् तइगु। 11 अले ल्याः खाये धुंकूगु धिबा इमिसं परमप्रभुया देगः ल्ह्वनेगु जिम्मा काःपिन्त बीगु अले इमिसं उकिं देगः दय्कीपिं, 12 सिँकःमित, दकःमित व ल्वहं चाइपिनिगु ज्याला बीगु। इमिसं परमप्रभुया देगः ल्ह्वनेत सिँ व चानातःगु ल्वहं न्यात अले देगः ल्ह्वनेत मामाःथाय् खर्च यात। 13 इमिसं परमप्रभुया देगःया निंतिं वहःया ख्वला, इताःया चिम्ता व छ्वाकिगु बाता व तुरही वा लुँ वहःया छुं नं ज्वलं दय्केत परमप्रभुया देगलं हःगु धिबा खर्च मयाः। 14 तर व इमिसं ज्या याइपिन्त बिल, इमिसं व कयाः परमप्रभुया देगः ल्ह्वन। 15 ज्या याइपिं मनूतय्त ज्याला बीपिन्के इमिसं ल्याःचाः मकाः। छाय्धाःसा इमिसं विश्वास यायेबहः जुयाः ज्या याइगु खः। 16 दोषबलि व शुद्ध जुइगु बलिं वःगु धिबा परमप्रभुया देगलय् हइ मखु, व पुजाहारीतय्गु हे जुइगु। 17 अबलय्पाखे हे अरामया जुजु हजाएलं गात शहरय् हमला यानाः उकियात त्याका काल। अनंलि यरूशलेमयात हमला यायेत फहिलावन। 18 तर यहूदाया जुजु योआशं यहोशापात, योराम व अहज्याह नांयापिं थः पुर्खा यहूदाया जुजुपिन्सं छाःगु फुक्क पवित्र ज्वलँत, वं थःम्हं देछाःगु क्वसेलि अले परमप्रभुया देगः व लाय्कूया धुकुतिइ दुगु फुक्क लुँ कयाः उपिं फुक्क अरामया जुजु हजाएलयाथाय् छ्वल। अनंलि व यरूशलेमं लिहां वन। 19 योआश जुजु जुयाच्वंबलय् जूगु फुक्क खँ, वं याःगु फुक्क ज्या यहूदाया जुजुपिनिगु इतिहासया सफुलिइ च्वयातःगु दु। 20 वया भारदारतय्सं वयागु विरोधय् ग्वसाः ग्वल, अले वयात सिल्लाया पाचाय् दुगु लँय् बेथ-मिल्लोय् स्यात। 21 वयात स्याःपिं भारदारत शिम्मतया काय् योजाबाद व शोमेरया काय् यहोजाबाद खः। व सित अले वयात वया पुर्खातनापं दाऊदया शहरय् थुनाबिल। वया लिपा वया काय् अमस्याह जुजु जुल। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.