२ कोरिन्थी 11 - नेवाः बाइबलपावल व फताहा प्रेरितत 1 जिं नवाइगु च्वःप्वः मदुसां छिमिसं सह यानाबी धकाः जिं आशा यानाच्वना। 2 परमेश्वरं थें जिं छिमित बिचाः यानातयागु दु। छिपिं ख्रीष्टलिसे ब्याहा यानाबीत जिं ल्ययातयापिं मिसामचात थें खः। 3 तर जि सर्पं हव्वायात छलय् याः थें छिमित नं ख्रीष्टयागु सेवा व च्वखगु भक्तिपाखें तापाकी धकाः ग्यानाच्वनागु दु। 4 मेपिन्सं जिमिसं धा हे मधयाम्ह येशूयागु मखुगु मखुगु खँ न्यंकः वःसां छिमिसं लय्तायाः न्यनीगु जुयाच्वन। अथे हे जिमिसं मबियागु मेगु हे आत्मा व खँयात नं छिमिसं पत्याः याइगु जुयाच्वन। 5 थथःम्हं तःधना जुइपिं थुपिं प्रेरितत स्वयाः जि चिधं मजू थें च्वं। 6 नवायेत जि बांलाक मसये फु, अय्नं जिके बुद्धि मगाः मजू। थ्व खँय् जिमिसं छिमित तःकः मछि धयाः थुइकाबी नं धुन। 7 परमेश्वरयागु भिंगु खँ न्यंकः वयाबलय् जिं छिमिके छुं नं कयागु मदु। छिमित तःधं यायेत जि चिधं जुया बिया। छु जिं द्वंकागु जुल ला? 8 जि छिमिथाय् ज्या यानाच्वनाबलय् मेथाय् च्वंगु मण्डलीपाखें धिबा कयाः छिमिगु सेवा यानाः इमित लुतय् याना थें जक जुल। 9 जि छिपिंलिसे च्वना च्वनाबलय् धिबा मालं नं जिं छिमिके मफ्वना। अबलय् माकेडोनियां वःपिं दाजुकिजापिन्सं जितः माक्व हयाबिल। न्हापा नं जिं छिमिके छुं कयागु मदु, अथे हे लिपा नं जिं छिमिके छुं काये मखु। 10 ख्रीष्टयागु सत्य जिके दतले जिगु थ्व फुइँयात अखैया देशय् सुनानं पने फइ मखु। 11 छिमित मयःगुलिं जिं थथे धयाच्वना धकाः छिमिसं मतिइ तइ। जिं छिमित माया या कि मया धकाः परमेश्वरं स्यू। 12 जिमिसं याना थें याना धकाः फुइँ याना जूपिं मेपिं प्रेरितय्त पनेत जिं थथे याना हे च्वने। 13 प्रेरितत धयाजूपिं थुपिं परमेश्वरया प्रेरितत मखु, फताहा प्रेरितत खः। ख्रीष्टयापिं प्रेरितत थें जुइत थुमिसं मखुगु खँ ल्हाना जुइ। 14 थुमिसं थथे याना जुल धकाः अजू चायेमाःगु मदु, छाय्धाःसा शैतान नं परमेश्वरयाम्ह स्वर्गदूत थें जुया जुइफु। 15 थ्व अजू चायेमाःगु खँ मखु, शैतानया च्यःत नं परमेश्वरया च्यःत थें जुइफु। परमेश्वरं न्याय यानादीबलय् थुमिगु ज्याकथंया सजाँय नं बियादी। पावलं दुःखकष्ट स्यूगु 16 जिं हानं धाये – सुनानं जितः मूर्ख भाःपी मते। छिमिसं जितः मूर्ख हे खः धकाः मतिइ तःसां छिमिसं जिगु खँ मानय् या, अले भतिचा जक जूसां जिं फुइँ यायेथाय् दइ। 17 प्रभुं थथे धा धकाः धयादीगुलिं जिं थथे धयाच्वनागु मखु। धात्थें थथे फुइँ यानाः खँ ल्हानाः जि मूर्ख थे जुयाच्वना। 18 मनूतय्सं संसारया खँय् फुइँ याना जूगुलिं जिं नं अथे हे फुइँ यानाः खँ ल्हानागु खः। 19 बुद्धि दुपिं मनूत जुयाः छिमिसं मूर्खतय्त नं लय्तातां सह यात। 20 धात्थें हे सुनानं छिमित क्वत्यला तःसां, थगय् याःसां, लुतय् यानाकाःसां, थःत तःधंकूसां, ख्वालय् हे दाःसां छिमिसं सह यानाच्वनी। 21 इमिसं याःथें यायेत जिके आँट मदु, थथे धायेत जितः लज्या चाः। सुनानं छुं खँय् घमण्ड याःसा जिं नं याये फु। तर थ्व मूर्ख ज्या जक खः। 22 इपिं हिब्रू खःसा, जि नं हिब्रू खः। इपिं इस्राएली खःसा, जि नं इस्राएली खः। इपिं अब्राहामया सन्तान खःसा, जि नं अब्राहामया सन्तान खः। 23 इपिं ख्रीष्टया च्यः खःसा जि झन इपिं स्वयाः भिंम्ह च्यः खः। थथे धायेबलय् जि वें थें च्वने फु। तर जिं थाकुक्क ज्या यानागु दु, तःकः मछि झ्यालखानाय् नं च्वना। तःकः मछि हे जितः कोर्रां दाःगु दु, तःकः मछि जितः सितुपातु वंक दाःगु दु। 24 न्याकः तक यहूदीतय्सं जितः स्विगुथु स्विगुथु कोर्रां दायाहये धुंकल। 25 स्वकः तक जितः कथिं दायाहल, छकः ला ल्वहँतं कय्काहल। स्वकः तक ला जि च्वनागु जहाज हे स्यन, छकः ला चच्छि व न्हिच्छि हे समुद्रय् च्वनेमाल। 26 न्ह्याबलें थाय् थासय् वनेमाल, तःकः मछि हे जि खुसिबाः वःथाय् लात, दाखुँतय्गु ल्हातय् लात, थः हे यहूदीतय्सं व यहूदीमखुपिन्सं जितः स्यायेत स्वल। शहरय् नं जितः उतिकं हे स्यायेत स्वल, जंगलं जंगलं नं जुइ माल। समुद्रय् नं जुइ माल। अले हानं फताहा दाजुकिजापिनिपाखें बचय् जुया जुइ माल। 27 द्यँ हे मद्यंसे नं जिं चच्छि चच्छिं ज्या याये धुन। तःकः मछि नयेत्वने मखन। अप्वः यानाः गाक्क नये मखं, द्यनेत थाय्, अले पुनेत वसः मदय्का जुइ धुन। 28 थुलि जक मखु, जितः थाय् थासय् मण्डलीया खँय् चितासू मदु। 29 सुं विश्वासी बमलात धाःसा जि हे नं बमलाः थें जुइगु। अले सुनानं छम्ह विश्वासीयात पापय् लाकल धाःसा जिगु नुगः हीसे च्वनीगु। 30 जिं फुइँ हे याये माःसा, जि बमलाःगु खँय् फुइँ याना जुइ। 31 जिं थथे धयाच्वनागु खँ मखुगु मखु धकाः सदां तःधंके बहःम्ह परमेश्वर प्रभु येशूया बाः नं स्यू। 32 जि दमस्कसय् दुबलय् जितः ज्वनेत जुजु अरितसया तःधंम्ह हाकिमं शहरयागु ध्वाखाय् ध्वाखाय् पाः तया तल। 33 अबलय् जितः खमुलिइ तयाः पःखालं क्वछ्वयाः बिसिके छ्वत। थुकथं जि इमिगु ल्हातं बचय् जुया। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.