१ तिमोथी 6 - नेवाः बाइबलदासतय्त अर्ती बीगु 1 दासं थः मालिकयात हनाबना तयेमाः। अले जक परमेश्वरयागु नां व जिमिसं स्यनागु भिंगु खँयात क्वह्यंकाः खँ ल्हाये फइ मखु। 2 विश्वासी दाजुकिजा ला खः नि धकाः सुनानं थः विश्वासी मालिकयात हनाबना मतयेगु याये मते, बरु इमिगु बांलाक सेवा या। छाय्धाःसा इमित भिनिगु थः हे दाजुकिजायात भिनिगु खः। थ्व हे खँ छं मेपिन्त नं स्यनेकने या। धिबायागु लोभ 3 सुनानं मेकथं स्यनेकने याना जुल, अले झी प्रभु येशू ख्रीष्टयागु सत्यगु वचन व झीसं परमेश्वरयात मानय् यायेमाःगु खँ मन्यन धाःसा 4 वं छुं हे मसीकं तःधंछुया जुइ। अले म्वाःमदुगु खँ पिकयाः जवाःसवाः यानाः ल्वापुथया जुइ। थुकिं मनूतय्त ल्वाकेगु, नुगः मुइकेगु, मेपिन्त मभिंका जुइगु व म्वाःमदुगु संका जक याकी। 5 थुमिसं न्ह्याबलें ल्वापु जक थया जुइ, थुमिगु न्ह्यपु हे खतं नयेधुंकल, थुमिके सत्य धयागु हे मदु। थुमिसं धर्म हे धिबा कमय् यायेगु लँपु खः धकाः धयाजुइ। 6 खः, दुगुलिं लुधंकाः परमेश्वरयात मानय् यानाः च्वनेगु हे तःमि जुइगु खः। 7 बूबलय् नं झीसं थ्व संसारय् छुं ज्वना वयागु मदु। अले सीबलय् नं छुं ज्वनावने फइ मखु। 8 नयेत व पुनेत जक दुसा ला झीत गा हे गात नि। 9 तःमि जुइत स्वइम्ह मनू पापयागु ल्हातय् लाइ, वं मभिंगु व थःत हे स्यंकीगु खँ मनंतुना जुइ। थुकिं हे यानाः व नाश जुइ। 10 फुक्क मभिंगु व बांमलाःगु ज्याया हा हे धिबायागु माया खः। गुलिखय् मनूतय्सं धिबायागु लोभय् लानाः विश्वास यायेगु हे त्वःताब्यूगु दु। उकिं सह याये मफयेक दुःखकष्ट जुयाः नुगः हीका च्वनेमाली। 11 अय् तिमोथी, परमेश्वरया मनू, छ थज्याःगु मभिंगु खं तापाक च्वनाच्वँ। परमेश्वरया न्ह्यःने धर्मी ठहरय् जुइगु, वय्कःयात मानय् यानाच्वनेगु व भिंम्ह जुयाच्वनेगु खँय् मन बिया च्वँ। 12 विश्वासयागु लँपुइ न्ह्यज्याना तुं च्वँ। अले अनन्त जीवन काय्त स्व। थुकियागु निम्ति हे परमेश्वरं छन्त सःतादीगु खः, अले थुकियागु निम्ति हे छं यक्व मनूतय्त थःगु विश्वासयागु साक्षी ब्यूगु खः। 13 फुक्कसितं म्वाका तःम्ह परमेश्वरयागु न्ह्यःने व पन्तियस पिलातसयागु न्ह्यःने सत्ययागु निंतिं नवानादीम्ह ख्रीष्ट येशूयागु न्ह्यःने जिं छन्त धयाच्वना – 14 झी प्रभु येशू ख्रीष्ट मझातले छं जिं धया थें बांलाक व सुनानं धाये ल्हाये थाय् मदय्क याना च्वँ। 15 परमेश्वरं वय्कःयात पाय्छि इलय् छ्वयाहयादी। परमेश्वर हे दक्वसिबय् तःधंम्ह, फुक्क शक्तिया थुवाः, जुजुतय् नं जुजु, अले प्रभुतय् नं प्रभु खः। 16 वय्कः न्ह्याबलें दयाच्वनीम्ह, सुं हे वने फइ मखुगु जलय् च्वनीम्ह खः। वय्कःयात आः तक सुनानं खंगु मदुनि, अले खनी नं मखु। सदां दयाच्वनीगु शक्ति वय्कःयाके हे दयाच्वनेमा, अले वय्कः न्ह्याबलें तःधनेमा। आमेन। 17 थ्व संसारय् च्वंपिं तःमि धाय्का च्वंपिन्त अप्वः तःधंछुया जुइ मते धकाः धयाब्यु। इमिगु धनसम्पत्ति सदां दयाच्वनी मखु। उकिं इमित धनसम्पत्तिइ मखु, बरु झीत फुक्कं बियादीम्ह परमेश्वरयाके भरोसा तया च्वँ धकाः धयाब्यु। 18 भिंगु ज्या यायेगु, भिंगु ज्याय् तःमि जुइगु व नुगः चक्कंकाः मेपिन्त ग्वाहालि यायेगु या धकाः इमित धयाब्यु। 19 थुकथं इमिसं लिपायात स्यल्लाःगु धनसम्पत्ति मुंके फइ, अले धात्थेंगु जीवन कायेखनी। 20 तिमोथी, छु छन्त लःल्हाना बियातःगु खः व बांलाक बिचाः याना ति। संसारयागु म्वाःमदुगु खँपाखें व गुलिखय् मनूतय्सं “ज्ञान” धकाः धयातःगु मखुगु खँपाखें तापाक हे च्वँ। 21 छाय्धाःसा गुलिसिनं ला थज्याःगु खँय् जुयाः विश्वासयागु लँ हे त्वफिका छ्वःगु दु। परमेश्वरं छिमित दया माया यानादीमा। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.