१ तिमोथी 3 - नेवाः बाइबलमण्डलीया बिशप व ग्वाहालि याइपिं 1 थथे धयातःगु धात्थें हे खः – सुनानं मण्डलीया बिशप जुइ मास्ति वय्कूसा, वं तसकं बांलाःगु इच्छा यात। 2 बिशप जुइम्ह मनू छुं हे दोष मदुम्ह, छम्ह हे जक मिसालिसे ब्याहा याःम्ह, थातं च्वने फुम्ह, थःत थःम्हं कःघाये फुम्ह, चालचलन बांलाःम्ह, पाहां वःपिन्त दुनुगलंनिसें दुकाइम्ह, बांलाक स्यनेकने याये फुम्ह, 3 अय्लाखं काय्का मजुइम्ह, ल्वाना मजुइम्ह, भिंम्ह, हाला जुइ मखुम्ह, धिबायागु लोभ मदुम्ह, 4 थःगु छेँ बांलाक कःघाये फुम्ह, थः मस्तय्त कजय् यानातये फुम्ह जुइमाः। 5 छाय्धाःसा थःगु छेँ हे बांलाक कःघाये मफुम्हय्सिनं गय् यानाः मण्डली कःघाइ? 6 थज्याःम्ह मनू नकतिनि जक विश्वास याःम्ह नं जुइ मज्यू। मखुसा व नं अप्वः तःधंछुयाः शैतान थें नाश जुयावनी। 7 अले मण्डलीं पिने नं नांजाःम्ह जुइमाः, अथे जूसा जक वयात मनूतय्सं हेबाय्चबाय् याइ मखु, अले शैतानयागु जालय् नं लाइ मखु। 8 ग्वाहालि याइपिं नं अथे हे भिंपिं व दुग्यंपिं जुइमाः। इपिं निता खँ मल्हाइपिं, अय्लाखं काय्का जुइ मखुपिं, अले धिबायागु लोभ मयाइपिं जुइमाः। 9 इपिं विश्वासयागु सत्य खँयात मनंनिसें बांलाक थुइका काये फुपिं जुइमाः। 10 बांलाक जाँचय् याये धुंकाः तिनि इमित मण्डली ग्वाहालि याकेबीमाः। 11 इमि कलाः नं अथे हे भिंपिं, दुग्यंपिं, मेपिन्त हेबाय्चबाय् याना मजुइपिं, थातं च्वने फुपिं व न्ह्यागु खँय् नं विश्वास यायेबहःपिं जुइमाः। 12 थथे ग्वाहालि याइम्ह नं छम्ह हे मिसालिसे ब्याहा याःम्ह जुइमाः। अले व नं थः मस्तय्त कजय् याये फुम्ह व छेँ कःघाये फुम्ह जुइमाः। 13 बांलाक ज्या याइम्हय्सित फुक्कसिनं मानय् याइ। अले इमिसं येशू ख्रीष्टयात थःम्हं विश्वास यानागु खँ मेपिन्त नं मग्यासे धाये फइ। तःधंगु गुप्ति खँ 14 थ्व पौ च्वया च्वनाबलय् नं जिं याकनं हे छन्थाय् वयेगु मतिइ तयागु दु। 15 अय्नं छुं जुयाः जि वये लिबात धाःसा परमेश्वरयागु छेँय् झीसं गय् यानाः च्वनेमाः धकाः थ्व हे पौपाखें सीकाति। परमेश्वरयागु छेँ धयागु हे मण्डली खः। अले थ्व सत्ययागु थां व किल्ला नं खः। 16 थ्व तसकं तःधंगु गुप्ति खँ खः धकाः झीसं स्यू – वय्कः झी थें मनू जुयाः झाल, आत्मायापाखें वय्कः धर्मी ठहरय् जुल। स्वर्गदूततय्सं वय्कःयात खंकल, जात जातियापिन्त वय्कःयागु खँ न्यंकल, संसारय् च्वंपिन्सं वय्कःयात विश्वास यात, अले वय्कःयात तःधंकाः स्वर्गय् तुं थत यंकल। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.