१ राजा 21 - नेवाः बाइबलनाबोतया दाखक्यब 1 छुं ई लिपा छगू घटना जुल, यिजरेल शहरय् सामरिया जुजु आहाबया दरबार लिक्क नाबोत धाःम्ह छम्ह यिजरेलीया दाखक्यब दुगु जुयाच्वन। 2 छन्हु आहाबं नाबोतयात धाल, “जितः छंगु दाखक्यब ब्यु। व जिगु दरबारया लिक्क दु, अन जिं वाउँचा पी। उकिया पलेसा जिं छन्त बांलाःगु मेगु दाखक्यब बी, अथे मज्यूसा जिं उकिया गुलि मू तु उलि धिबा बी।” 3 नाबोतं लिसः बिल, “थ्व दाखक्यब छितः बी मखु। थ्व जिगु पुर्खाया सर्बय खः। परमप्रभुं अथे जुइके नं बिया मदीमा।” 4 नाबोतं धाःगु खँ न्यनाः आहाबयात तसकं म्हाइपुल अले व तमं छेँय् वन। व थःगु लासाय् वनाः अंगःपाखे थःगु ख्वाः स्वय्काः ग्वारातुलाच्वन। वं छुं नं मन। 5 वया कलाः ईजेबेलं वनाः वयात न्यन, “छाय् छुं भपिया मदीयागु? छाय् छिगु ख्वाः थपाय्सकं खिउँगु?” 6 अले वं वयात धाल, “जिं यिजरेली नाबोतयात ‘छंगु दाखक्यब जितः म्यु वा मेगु दाखक्यबनापं हिलाबुला या’ धकाः धया, तर वं दाखक्यब बी मखु धाल।” 7 ईजेबेलं वयात धाल, “इस्राएलयाम्ह जुजु छि खः, कि सु खः? लासां दनादिसँ, ख्वाः खिउँकादी मते, छुं भपियादिसँ! जिं नाबोतया दाखक्यब छितः बीके।” 8 अनंलि वं आहाबया नामं पौत च्वल, वयागु लाहा छाप तल, अले यिजरेलयापिं थकालितय्थाय् व ततःधंपिं मनूतय्थाय् छ्वल। 9 पौलय् थथे च्वयातःगु दु, “छन्हु अपसं च्वनेगु दिं घोषणा या, मनूत सकसितं छथाय् मुंकि, नाबोतयात मनूतय् दथुइ इज्जतया थासय् फेतुकि। 10 मेखेपाखे निम्ह लुच्चापिं मनूतय्त फेतुकाः वं परमेश्वर व जुजुयात सराः ब्यूगु दु धकाः धाय्की। अनंलि वयात पिने यंकाः ल्वहँतं कय्काः स्यानाब्यु।” 11 ईजेबेलं धाःथें हे यिजरेलया थकालितय्सं यात। 12 इमिसं छन्हु अपसं तल, फुक्क मनूतय्त छथाय् मुंकल। अले नाबोतयात इज्जतया थासय् फेतुकल। 13 अले निम्ह लुच्चापिं मनूत वया वयागु चुलिंचू च्वन, इमिसं मनूतय् न्ह्यःने नाबोतयात थथे पाः यात, “वं जुजु व परमेश्वरयात सराः बिल।” उकिं वयात शहरं पिने यंकाः ल्वहँतं कय्काः स्यानाबिल। 14 अले इमिसं ईजेबेलयाथाय् थ्व खबर छ्वल, “नाबोतयात ल्वहँतं कय्काः स्याये धुन।” 15 व खबर न्यनेवं ईजेबेलं आहाबयात धाल, “आः वनाः यिजरेली नाबोतं छितः मी मखु धकाः धाःगु दाखक्यब कयादिसँ। नाबोत सी धुंकत।” 16 नाबोत सीगु खँ न्यनाः आहाब थत्थें दाखक्यब कब्जा याः वन। 17 थुबलय् हे परमप्रभुया थ्व वचन तिश्बीया एलियायाथाय् वल, 18 “सामरीयायाय् शासन याइम्ह इस्राएलया जुजु आहाबयात नापलायेत क्वहां हुँ। आहाब नाबोतया दाखक्यबय् दइ। वं दाखक्यब थःगु हे यानाः कायेत्यंगु दु। 19 आहाबयात जिं थथे धाःगु दु धकाः धा, परमप्रभुं थथे धयादी- ‘आहाब नाबोत धाःम्ह मनूयात स्यानाः छं वयागु दाखक्यब नं थःगु यानाः कायेत्यंगु दु। नाबोतया हि खिचातय्सं फ्यःगु थासय् हे छंगु हि नं खिचातय्सं फ्यइ।’” 20 एलियायात खनाः आहाबं धाल, “अय् जिम्ह शत्रु, छं जितः नाप हे लाकल!” एलियां लिसः बिल, “खः, जिं नापलाके धुन। परमप्रभुयात मयःगु मभिंगु ज्या यायेत छिं थःत मियादी धुंकूगु दु। 21 अथे जुयाः परमप्रभुं छितः धयादीगु दु, ‘जिं छंके विपत्ति हयेत्यनागु दु। जिं छिमि सन्तानतय्त भस्म यानाबी। दास थजुइमा वा स्वतन्त्र थजुइमा, इस्राएलया आहाबया परिवारयापिं फुक्क मिजंतय्त स्यानाबी। 22 छं जितः तंचाय्कूगुलिं अले इस्राएलयात पाप याकूगुलिं जिं छंगु घरानायात नबातया काय् यारोबामया घरानायात व अहियाहया काय् बाशाया घरानायात याःथें यानाबी।’ 23 “ईजेबेलया बारे परमप्रभुं धयादीगु दु, ‘यिजरेलया पखाःया लिक्क ईजेबेलयात खिचां नइ।’ 24 “आहाबया घरानायापिं शहरय् सीपिन्त धाःसा खिचां नइ। ख्यलय् सीपिन्त धाःसा गिद्धतय्सं नइ।” 25 (परमप्रभुयात मयःगु मभिंगु ज्या यायेत थःत म्यूम्ह आहाब थें ज्याःम्ह मेपिं सुं हे मदु। थः कलाः ईजेबेलं ग्वाकूगुलिं वं अथे याःगु खः। 26 एमोरीतय्सं थें मूर्ति पुजा यानाः वं दकलय् घच्चाइपुगु पापयात। एमोरीतय्त परमप्रभुं इस्राएलया न्ह्यःनं पितिना छ्वयादीगु खः।) 27 एलियागु खँ न्यनाः आहाबं थःगु वसः खुत। अले भांग्रा हिनाः अपसं च्वन। व भांग्रा हिनाः हे द्यन, अले क्वमिलु जुयाजुल। 28 अबलय् परमप्रभुया थ्व वचन तिश्बी एलियायाथाय् वल, 29 “आहाब जिगु न्ह्यःने क्वमिलु जूगु छु छं खं ला? वं थःत क्वमिलु याःगुलिं जिं व म्वानाच्वंतले वया परिवारयात सजाँय बी मखु। वया काय्या पालय् जिं आहाबया परिवारयात सजाँय बी।” |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.