१ राजा 16 - नेवाः बाइबल1 बाशाया बारे हनानीया काय् येहूयाथाय् परमप्रभुयागु थ्व वचन वल, 2 “जिं छन्त धुलं थकयाः जि प्रजा इस्राएलया शासक याना, तर छ यारोबाम थें जुयाः छं जि प्रजा इस्राएलयात पाप याकल। अले इमिगु पापपाखें छं जितः तंचाय्कल। 3 उकिं जिं छ व छंगु परिवारयात नाश याये त्यनागु दु, जिं छंगु परिवारयात नबातया काय् यारोबामया परिवार थें यानाबी। 4 छंगु छेँयाम्ह सुं शहरय् सित धाःसा वयात खिचां नइ, अले सुं ख्यलय् सित धाःसा वयात गिद्धतय्सं नइ।” 5 बाशा जुजु जुयाच्वंबलय् जूगु फुक्क खँ, वं याःगु फुक्क ज्या अले वयागु बहादुरीया बारे इस्राएलया जुजुपिनिगु इतिहासया सफुलिइ च्वयातःगु मदु ला? 6 बाशा थः पुर्खा थें सित, वयात तिर्साय् थुन। वया काय् एलाह वया लिपा जुजु जुल। 7 बाशां यारोबामया वंशं याःथें परमप्रभुया मिखाय् बांमलाःगु ज्या याःगुलिं अले बाशां यारोबामया वंशयात नाश याःगुलिं परमप्रभु तसकं तंचायादिल अले परमप्रभुया थ्व वचन बाशा व वया वंशया विरोधय् हनानीया काय् येहू अगमवक्तापाखें वल। बाशां याःगु पापं परमप्रभुयात तं पिहां वल। इस्राएलया जुजु एलाह 8 यहूदाया जुजु आसां राज्य यानाच्वंगु निइखुगूगुदँय् बाशाया काय् एलाह इस्राएलया जुजु जुल। वं तिर्साय् निदँ शासन यात। 9 जिम्री धाःम्ह जुजु एलाहयागु बच्छि रथया कप्तानं वयागु विरोधय् ग्वसाः ग्वल। उबलय् एलाह तिर्साय् थःगु दरबारयाम्ह हाकिम आर्साया छेँय् अय्लाखं काय्काच्वंगु खः। 10 यहूदाया जुजु आसां राज्य यानाच्वंगु निइन्हय्गूगुदँ दुबलय् जिम्रीं दुहां वनाः वयात कय्काः स्यात। व हे जिम्री वया लिपा जुजु जुल। 11 जुजु जुयाः गद्दीइ च्वनेवं जिम्रीं बाशाया सकलें छेँजःपिन्त स्यात। वं बाशाया थःथिति व पासापिं मध्ये छम्ह नं मिजंयात बाकि मतः। 12 येहू अमगवक्तापाखें बाशाया बारे धयादीगु परमप्रभुया वचन थें थुकथं जिम्रीं बाशाया सकलें छेँजःपिन्त स्यात। 13 बाशा व वया काय् एलाहं याःगु पाप व इस्राएलयात याकूगु पापं यानाः अले इमिसं थःगु ज्यालगय् मजूगु मूर्तिपाखें परमप्रभु, इस्राएलया परमेश्वरयात तंचाय्कूगुलिं थथे जूगु खः। 14 एलाह जुजु जुयाच्वंबलय् जूगु फुक्क खँ, वं याःगु फुक्क ज्या इस्राएलया जुजुपिनिगु इतिहासया सफुलिइ च्वयातःगु दु। इस्राएलया जुजु जिम्री 15 यहूदाया जुजु आसां राज्य यानाच्वंगु निइन्हय्गूगुदँय् जिम्रीं तिर्साय् न्हय्न्हु तक शासन यात। उबलय् इस्राएली सिपाइँतय्सं पलिश्तीतय्गु शहर गिब्बतोनयात घेरय् यानाच्वंगु खः। 16 जिम्रीं ग्वसाः ग्वयाः जुजुयात स्यात धयागु खँ छाउनीइ दुपिं इस्राएलीतय्सं न्यनाः इमिसं उखुन्हु हे थः सेनापति ओम्रीयात इस्राएलया जुजु दय्कल। 17 ओम्री व इस्राएली सेनां गिब्बतोन त्वःतल, अले इमिसं तिर्साय् हमला यात। 18 शहर कब्जा याये धुंकूगु खनाः जिम्री दरबारया किल्ला दुने दुहां वन। अले थःगु छचाःखेरं मि तल, व थः नं मिं नयाः सित। 19 वं याःगु पापं यानाः थथे जूगु खः, छाय्धाःसा वं परमप्रभुयात मयःगु मभिंगु ज्या यात। वं यारोबामं थें थःम्हं नं पाप यात अले इस्राएलयात नं पाप याकल। 20 जिम्री जुजु जुयाच्वंबलय् जूगु फुक्क खँ व वं याःगु विद्रोहया खँ इस्राएलया जुजुपिनिगु इतिहासया सफुलिइ च्वयातःगु दु। इस्राएलया जुजु ओम्री 21 इस्राएलयापिं मनूत निगू पुचलय् बाल। बच्छि मनूतय्सं गीनतया काय् तिब्नीयात जुजु दय्केत ग्वाहालि यात। बच्छि मनूतय्सं ओम्रीयात ग्वाहालि यात। 22 तर ओम्रीयात ग्वाहालि याःपिन्सं गीनतया काय् तिब्नीयात ग्वाहालि याःपिन्त बुकल। उकिं तिब्नीयात स्यात अले ओम्री जुजु जुल। 23 आसा यहूदाया जुजु जूगु स्विछदँ दुबलय् ओम्री इस्राएलया जुजु जुल। वं इस्राएलय् झिंनिदँ तक शासन यात। न्हापां वं खुदँ तक तिर्साय् शासन यात। 24 वं ६८ किलो वहः बियाः शेमेरया ल्हातिं सामरियाया डाँडा न्यानाः डाँडाय् छगू शहर दय्कल। उगु डाँडाया न्हापांम्ह थुवाः शेमेरया नामय् उकिया नां सामरिया तल। 25 तर ओम्रीं परमप्रभुयात मयःगु मभिंगु ज्या यात। वं व स्वयाः न्ह्यःयापिं फुक्क जुजुपिन्सं स्वयाः अज्ज अप्वः पापयात। 26 यारोबाम थें थःम्हं हे पाप यानाः अले इस्राएलीतय्त मूर्ति पुजा व पाप याकाः वं परमप्रभु, इस्राएलया परमेश्वरयात तंचाय्कल। 27 ओम्री जुजु जुयाच्वंबलय् जूगु फुक्क खँ, वं याःगु फुक्क ज्या अले वयागु बहादुरीया बारे इस्राएलया जुजुपिनिगु इतिहासया सफुलिइ च्वयातःगु दु। 28 ओम्री थः पुर्खा थें सित, वयात सामरीयाय् थुन। वया काय् आहाब वया लिपा जुजु जुल। इस्राएलया जुजु आहाब 29 यहूदाया जुजु आसां राज्य यानाच्वंगु स्विच्यागूगु दँय् ओम्रीया काय् आहाब इस्राएलया जुजु जुल। वं सामरीयां इस्राएलय् निइनिदँ तक शासन यात। 30 ओम्रीया काय् आहाबं थः स्वयाः न्ह्यःयापिं फुक्क जुजुपिन्सं स्वयाः अप्वः परमप्रभुयात मयःगु मभिंगु ज्या यात। 31 नबातया काय् यारोबामं याःगु पाप वयागु निंतिं कम खः। वं सीदोनीतय् जुजु एताबालया म्ह्याय् ईजेबेलयात ब्याहा यात अले बालद्यःयात पुजा यानाः अझ अप्वः पाप यात। 32 सामरीयाय् वं बालद्यःयात पुजा यायेत देगः दय्कल। उकी बालया निंतिं छगू वेदी नं दय्कल। 33 वं अशेरा द्यःमय्जुया छगू थां नं दय्कल। वं थः स्वयाः न्ह्यःयापिं इस्राएलया फुक्क जुजुपिन्सं स्वयाः अप्वः परमप्रभु, इस्राएलया परमेश्वरयात तंचाय्केगु ज्या यात। 34 आहाबया इलय् बेथेलया हीएलं यरीहोयात हाकनं दय्कल। परमप्रभुं नूनया काय् यहोशूपाखें धयादीगु वचन थें हीएलं यरीहोयागु जग तःबलय् वया न्हापां बूम्ह काय् अबीराम सित, अले शहरया ध्वाखा तःबलय् वया चिधिकःम्ह काय् सगूब सित। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.